သျှမ်းပြည်တောင်ပိုင်း အောင်ပန်းမြို့ရှိ KTV များတွင် မူးယစ်ဆေးဝါးသုံးစွဲသည့် HI ခန်းများ ပြုလုပ်နေခြင်းနှင့် ဒုစရိုက်မှုများ များပြားလာခြင်းကြောင့် ဒေသခံပြည်သူများ အနှောင့်အယှက်ဖြစ်ကာ လုံခြုံရေးအတွက် စိုးရိမ်နေကြရကြောင်း ဒေသခံများထံမှ သိရသည်။

အောင်ပန်းမြို့ပေါ်ရှိ KTV ဆိုင်အချို့တွင် HI ခန်းများပြုလုပ်ကာ အော်ဟစ်ဆူညံခြင်း၊ လှည်းရိုးရပ်ကွက်အတွင်း စားသောက်ဆိုင်အမည်ခံကာ ပြည်တန်ဆာလုပ်ငန်းများ လုပ်ကိုင်နေခြင်းတို့ကြောင့် ညသန်းခေါင်အချိန်များတွင် ရပ်ကွက်အတွင်း ခိုက်ရန်ဖြစ်ပွားမှုများ ရှိနေကြောင်း ဒေသခံများက ပြောသည်။

“ဒီဆိုင်တွေကြောင့် ရပ်ကွက်ထဲမှာ အော်ဟစ်ဆူညံတာ၊ ရန်ဖြစ်တာတွေက ခဏခဏပဲ။ ကျနော်တို့ မြို့ခံတွေမှာ ညဘက်အိပ်မရသလို လုံခြုံရေးလည်း အရမ်းစိုးရိမ်နေရတယ်” ဟု အောင်ပန်းမြို့ခံ အသက် (၃၀) ကျော် အမျိုးသားတစ်ဦးက သျှမ်းသံတော်ဆင့်ကို ပြောသည်။

အဆိုပါ ဒုစရိုက်လုပ်ငန်းများကို ထိရောက်စွာ အရေးယူပေးရန် အောင်ပန်းမြို့အုပ်ချုပ်ရေးမှူးရုံးသို့ တိုင်ကြားခဲ့သော်လည်း အရေးယူဆောင်ရွက်မှု မရှိကြောင်း ၎င်းက ပြောသည်။

ထို့ကြောင့် ဒေသခံများက အောင်ပန်းမြို့ပေါ်ရှိ KTV ၁၃ ဆိုင်၏ အမည်စာရင်းများနှင့်တကွ ပြည်ထဲရေးဝန်ကြီးဌာနနှင့် လွှတ်တော်ကိုယ်စားလှယ်များထံ ထပ်မံတိုင်ကြားရန် စီစဉ်နေကြကြောင်း သိရသည်။

“ပြည်ထဲရေးဝန်ကြီးက လွှတ်တော်မှာ ဖြေတုန်းက တရားမဝင် ရောင်းချနေမှုကို တိုင်ကြားရင် တိတိကျကျ စိစစ်အရေးယူဆောင်ရွက်ပေးမယ်လို့ ဖြေကြားထားတာ တွေ့ရတယ်။ ဒါကြောင့် ကျနော်တို့ ရပ်ကွက်ထဲက KTV တွေကို လိုင်စင်ရှိ၊ မရှိနဲ့ တရားဝင်ဖွင့်ခွင့်ပေးထားတဲ့ဆိုင် ဟုတ်၊ မဟုတ် သက်ဆိုင်ရာက ထိထိရောက်ရောက် စစ်ဆေးပေးစေချင်ပါတယ်” ဟု အဆိုပါ အမျိုးသားက ဆက်ပြောသည်။

လက်ရှိတွင် အောင်ပန်းမြို့ပေါ်၌ The King, DJ, 135, VIP, KKK, Alinkar, Top Free, Royal Flower, ရွှေရှမ်းကန်၊ ဟာမိုနီ၊ ရွှေယမုံ၊ ငွေစည်းစိမ် (၁) နှင့် (၂) စသည့် KTV လုပ်ငန်းပေါင်း (၁၃) ခုခန့် ရှိနေကြောင်း ဒေသခံများ၏ ပြောကြားချက်အရ သိရသည်။

ပြီးခဲ့သည့် မတ်လအတွင်းက အောင်ပန်းမြို့အနီးရှိ H2O KTV ကို ဝင်ရောက်ဖမ်းဆီးခဲ့သော်လည်း မြို့ပေါ်ရှိ KTV ဆိုင်များမှာမူ ယနေ့တိုင် ပွင့်လင်းစွာ လုပ်ကိုင်နေဆဲ ဖြစ်ကြောင်း သိရသည်။

အောင်ပန်းမြို့သည် ကုန်သွယ်ရေးနှင့် ခရီးသွားလာရေးအတွက် အချက်အခြာကျသော မြို့တစ်မြို့ ဖြစ်သော်လည်း ထိုကဲ့သို့ ဒုစရိုက်မှုများ များပြားလာခြင်းက မြို့၏ပုံရိပ်နှင့် လူမှုပတ်ဝန်းကျင်အေးချမ်းမှုကို ထိခိုက်စေနိုင်သည့်အတွက် ဒေသခံများက စိုးရိမ်လျက်ရှိကြသည်။