သျှမ်းပြည်တောင်ပိုင်း၊ ရွာငံမြို့နယ်တွင် ဓားပြမှုများ မကြာခဏ ဖြစ်ပွားလာသောကြောင့် ဒေသခံများ စိုးရိမ်ပူပန်မှု ဖြင့်နေထိုင်နေရကြောင်း သတင်းရရှိသည်။

ပြီးခဲ့သည့် ဇွန်လ မှစပြီး ရွာငံမြို့နယ်တွင် အုပ်စုဖွဲ့ ဓားပြတိုက် လုယက်မှုများ မကြာခဏ ဖြစ်ပွားလာနေပြီး ရွာငံမြို့ပေါ်နှင့် ကျေးရွာများတွင် ဓားပြတိုက်ခံရ၍ ငွေသား ကျပ်သိန်းတစ်ရာနှင့် ရွှေထည်များသွးကြောင်း ဒေသခံများပြောပြချက်အရသိရသည်။

အဆိုပါ ဓားပြတိုက် လုယက်မှုများသည် ဇွန်လ တစ်လအတွင်း သုံးကြိမ်ထက် မနည်းဖြစ်ပွားခဲ့၍ ရွာငံဒေသခံများ စိတ်လုံခြုံမှုမရှိဘဲ စိုးရိမ်စိတ်ဖြင့် နေထိုင်နေရကြောင်း သိရသည်။

“ကြားရသလောက်ဆို ရွာငံမြောက်ဘက်က ရွာတွေမှာ ပိုပြီး ဓားပြတိုက်ခံရတယ်၊ သတင်းတော့ သိပ်မထွက်ရဲကြဘူး။ တစ်ခုခုလာပြီး အသက်ရန်ရှာမှာကြောက်ရတယ်၊ သူတို့က မျက်နှာတွေကို အုပ်ထားတယ်။ ၆ဦးလောက်ရှိတယ် သေနတ်တွေ ဓားတွေပါတယ်၊အသိထဲကဆို သိန်း တစ်ရာကျော် ပါသွားတယ်။”ဟု ဖြစ်စဉ်သိရှိသူ ရွာငံဒေသခံ အမျိုးသားတစ်ဦးက ပြောသည်။

ဓားပြတိုက်မှုကျူးလွန်သူများသည် အများအားဖြင့် ညသန်းခေါင်ယံအချိန်နှင့် လူပြတ်လတ်သည့် အချိန်တွင် ဓားပြတိုက်လုယက်ကြပြီး ငွေကြေး ချမ်းသာသည့် နေအိမ်များကို အဓိကထားလုယက်ကြကြောင်း ၎င်းက ဆက်ပြောသည်။

ဆက်လက်ပြီး ရွာငံမြို့နယ်တွင် လူသတ်မှုအပြင် ဓားပြတိုက်မှုများလည်း တိုးလာသောကြောင့် ဒေသခံများ စိတ်လုံခြုံမှု ကင်းမဲ့လာပြီး မြို့ပေါ်တွင်လည်း သေနတ်သံများ မကြာခဏ ကြားလာရကြောင်း ဒေသခံများထံမှ သိရသည်။

“ခုတလော ညပိုင်းတွေဆို သေနတ်သံတွေ ကြားလာရတယ်၊ မြို့ပေါ်မှာ စစ်တပ်ရှိလည်း လူသတ်မှုတွေ ဓားပြမှုတွေ ဖြစ်တာပဲ၊ ပြည်သူတွေကတော့ အကုန်ကြောက်နေရတာ အရာရာ သတိထားနေရတာ၊ ဓားပြတိုက်တဲ့သူတွေက ဘယ်အိမ်မှာ ဘာရှိတယ် အသေးစိတ် စုံစမ်းပြီးမှ တိုက်တာ၊ အခန့်မသင့်ရင် လူပါသတ်ခံရမှာ ကြောက်တယ်။”ဟု ရွာငံ ဒေသခံ အမျိုးသမီးတစ်ဦးက ပြောသည်။

တရားဥပဒေ စိုးမိုးမှု အားနည်းလာသည်နှင့် ရွာငံမြို့နယ်တွင် အုပ်ချုပ်ရေးမှူးများ မရှိတော့သည့်အပြင် လူသတ်မှုများ ၊သက်ငယ်မုဒိမ်းမှုများနှင့် ခိုးဆိုးလုယက် ဓားပြတိုက်မှုများ မကြာခဏ ဖြစ်ပွားလာပြီး အရေးယူ ဆောင်ရွက်ပေးမည့် အဖွဲ့လည်း မရှိသောကြောင့် ဒေသခံများ စိုးရိမ်စိတ်ဖြင့် နေထိုင်နေကြရသည်။

သျှမ်းပြည်တောင်ပိုင်း ၊ ရွာငံမြို့နယ်တွင် ဓနုဒေသအခြေစိုက် (၁၀၀၃) တပ်ရင်း အမည်ကို အလွှဲသုံးစားလုပ်၍ ဓားပြတိုက်သူ အမျိုးသားတစ်ဦးကို ဖမ်းဆီးထားကြောင်း (၁၀၀၃) တပ်ရင်းမှ ပြီးခဲ့သည့် ဇွန်လ (၂၂)ရက်တွင် ထုတ်ပြန်ထားသည်။