သျှမ်းပြည် တောင်ကြီးခရိုင် အေးသာယာရှိ စစ်ကောင်စီဂိတ်တွင် စစ်ဆေးမှုပိုမိုတင်းကျပ်လာကာ အမျိုးသားများကို အဓိကထားပြီး စစ်ဆေးမှုများရှိနေကြောင်းခရီးသည်များ ပြောပြချက်အရသိရပါသည်။
သျှမ်းပြည်တောင်ပိုင်း၊ အေးသာယာရှိ စစ်ကောင်စီဂိတ်တွင် ယခင်ကထက် ကားများကို စစ်ဆေးမှုပြုလုပ်နေပြီး လိုက်ပါစီးနှင်လာသည့် ခရီးသည်အများစုထဲမှ အမျိုးသားများကို ကားပေါ်မှ ဆင်းခိုင်းကာ နေရပ်ဒေသများကိုမေးမြန်းပြီး ကရင်နီပြည်ဖက်မှလာသည့် ခရီးသည်အမျိုးသားများ ရွာငံဖက်ကလာသည့် ခရီးသည်အမျိုးသားများကို အဓိကထားစစ်ဆေးနေကြောင်း စုံစမ်းသိရှိရပါသည်။
ထိုကဲ့သို့ စစ်ဆေးမှုများ ပြုလုပ်နေပြီး ခရီးသည်အမျိုးသားများကို အချိန်တန်ကြာအောင် သွားခွင့်မပြုပဲ မေးမြန်းနေသဖြင့် ခရီးများနှောင့်နှေးမှုဖြစ်စေကြောင်း ခရီးသွားအမျိုးသားတစ်ဦးက ယခုလိုပြောသည်။
” ယောကျာ်းလေးတွေကို ပိုစစ်တာဗျ။ အရေးကြီးကိစ္စနဲ့ တောင်ကြီးကို သွားဖို့လိုနေပြီ သူတို့ကမေးမြန်းလို့မပြီးနိုင်ဘူး၊ တော်တော်နဲ့ပေးမသွားဘူး။ အလုပ်ကိစ္စတွေ နောက်ကျသွားတာမျိုးဖြစ်တယ်။ “ဟု ဆိုသည်။
ထိုသို့မေးမြန်းရာတွင် အမည် ၊နေရပ်ဒေသ၊ မှတ်ပုံတင်များကို စစ်ဆေးမေးမြန်းမှုများ ပြုလုပ်နေပြီး ကရင်နီပြည်မှလာသည့် အမျိုးသားနှင့် ရွာငံဖက်ကလာသည့် အမျိုးသားများကို ပိုပြီးမေးမြန်းနေကြောင်း ထိုအမျိုးသားက ဆက်ပြောထားသည်။
ရွာငံဖက်မှ လာသည့်ခရီးသည်တစ်ဦးမှ မေးမြန်း စစ်ဆေးခံရပြီး စိုးရိမ်စိတ်တွေများစွာရှိကာ နောက်နောင် ခရီး မသွားရဲသည့်အကြောင်းကို ယခုလိုပြောလာသည်။
” ကျနော့် မှတ်ပုံတင်ယူကြည့်ပြီး နင်ကရွာငံကလား တောင်ကြီးကိုဘာသွားလုပ်မှာလဲ မင်းတို့ရွာငံက PDF တွေများတယ်၊ နင်ကတောင်ကြီး ဘယ်နားမှာနေမှာလဲ၊ နေမဲ့နေရာ အပြည့်စုံပြောခဲ့ ဆိုပြီးတော့ ကျနော်ကို ပြောတယ်၊ ကျနော်က လန့်သွားတယ် တောင်ကြီးထိလာစစ်မလားပေါ့ နောက်တစ်ခေါက်ခရီးဆို မသွားရဲတော့ဘူး” ဟု အသက်၃၀ ဝန်းကျင် အမျိုးသားတစ်ဦးက သျှမ်းသံတော်ဆင့်ကိုပြောသည်။
စစ်ကောင်စီက အာဏာသိမ်းပြီးနောက် အေးသာယာနှင့် တောင်ကြီး အတက်လမ်းတွင် စစ်ကောင်စီဂိတ်များချထားကာ ကရင်နီပြည်မှ စစ်ဘေးရှောင်များကို အဓိကထားစစ်ဆေးမှုများရှိခဲ့ပြီး ယခုချိန်ထိ စစ်ဆေးမှုများရှိ နေကြောင်းစုံစမ်းသိရှိရ ပါသည်။
