သျှမ်းပြည်တောင်ပိုင်း အောင်ပန်းမြို့နယ် လေးအိမ်ကုန်းကျေးရွာတွင် အရက်မူးနေသည့် ဖခင်မှ သမီးဖြစ်သူကို သေသည့်အထိ ရိုက်နှက်မှု ဖြစ်ပွားခဲ့ကြောင်း သတင်းသိရသည်။
ပြီးခဲ့သည့် ဇူလိုင် ၁၇ ရက်နေ့တွင် အရက်မူးသည့်ဖခင်မှ သမီးဖြစ်သူကို ရိုက်နှက်ပြီး ယမန်နေ့ (ဇူလိုင် ၁၉) ရက်တွင် ဒဏ်ရာများဖြင့် သေဆုံးသွားခဲ့ခြင်းဖြစ်ကြောင်း အိမ်နီးချင်း တစ်ဦးက သျှမ်းသံတော်ဆင့်ကို ပြောသည်။
“သူတို့သားအဖနှစ်ယောက်တည်းနေတာပါ၊ သူ့အဖေအရက်မူးလာတိုင်း သူ့ကို ရိုက်နှက် ပြုလေ့ရှိတော့ အဲ့နေ့က ရိုက်နှက်တဲ့အသံတွေ ကြားနေရပေမဲ့ ဘယ်သူမှ ဝင်မကြည့်ဖြစ်ဘူး၊ ဒါပေမဲ့ နှစ်ရက်သုံးရက်လောက် ကောင်မလေးအပြင်ထွက်တာ မတွေ့ရလို့ အိမ်နီးချင်းစုပြီးသွားကြည့်တဲ့အခါတော့ ကောင်မလေးက ဆုံးနေပြီ” ဟု အမည်မဖော်လိုသူ အိမ်နီးချင်း အမျိုးသမီးက သျှမ်းသံတော်ဆင့်ကို ပြောသည်။
အိမ်နီးချင်းများ ရောက်ရှိလာပြီး အမျိုးသမီးငယ်၏ အခြေအနေများ တွေ့မြင်ရသည့်အချိန်တွင် သက်ဆိုင်ရာ နှင့် လူမှုကူညီရေးအသင်းများကို ဖုန်းဆက်အကြောင်းခဲ့ရကြောင်း ၎င်းက ဆက်လက်ပြောဆိုထားသည်။
“ကျနော်တို့ ရောက်သွားတဲ့အချိန်တော့ ကောင်မလေးက အသက်မရှိတော့ဘူး၊ လက်နှစ်ဖက်လုံး ညိုမဲဒဏ်ရာနဲ့ ဦးခေါင်းမှာ အဖုတစ်ခု၊ ဦးခေါင်းခွံ ပျော့နေတယ်၊ ဦးခေါင်းက ဒဏ်ရာကပဲသေစေခဲ့တာလို့ ယူဆပါတယ်၊ လက်ရှိ Dead Body ကို အောင်ပန်းပြည်သူ့ဆေးရုံကို ပို့ထားတယ်၊ ဖခင်ဖြစ်သူတော့ သက်ဆိုင်ရာက ခေါ်သွားပြီ” ဟု နာရေးကူညီမှုအသင်း (အောင်ပန်း) တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။
သေဆုံးသူ အမျိုးသမီးငယ်သည် အသက် ၂၀ ဝန်းကျင်ခန့်သာ ရှိနေပြီး ကျူးလွန်သူ ဖခင်ဖြစ်သူက အသက် ၆၀ ဝန်းကျင်ရှိကြောင်းလည်း သတင်းသိရသည်။
သေဆုံးသူ၏ ရုပ်အလောင်းကို ယမန်နေ့ ဇူလိုင် ၁၉ ရက်၊ ညပိုင်းက နာရေးကူညီမှုအသင်း (အောင်ပန်း) မှ သယ်ဆောင်၍ အောင်ပန်းဆေးရုံရှိ ရင်ခွဲရုံသို့ ပို့ဆောင်ပေးခဲ့ပြီး ယနေ့ မွန်းလွဲပိုင်းအချိန်တွင် ဆရာဝန်မှ ခွဲစိတ်စစ်ဆေးမှု ပြုလုပ်မည်ဖြစ်ကြောင်းလည်း သိရသည်။
