သျှမ်းပြည် ကွတ်ခိုင်မြို့တွင် ကိုးကန့်တပ်ဖွဲ့ (MNDAA) တပ်စွဲသည့်နေရာကို တအာင်း(ပလောင်) အမျိုးသား လွတ်မြောက်ရေးတပ်မတော် TNLA က အကြောင်းကြားခြင်းမရှိဘဲ ဝင်ရောက်နေရာယူသဖြင့် အချင်းချင်းကြားစစ်ရေးတင်းမာမှုရှိနေကြောင်း စုံစမ်းသိရသည်။
ယမန်နေ့ (ဧပြီလ ၂၇ ရက်) နေ့လယ်အချိန်တွင် ကွတ်ခိုင်မြို့ ကောင်းခါးလမ်းခွဲရှိ စိုက်ပျိုးရေးခြံတွင် တပ်စွဲထားသည့် ကိုးကန့်တပ်ဖွဲ့ MNDAA နေရာကို တအာင်း(ပလောင်)တပ်ဖွဲ့ TNLA တပ်သားများက ကြိုတင်အကြောင်းကြားခြင်း မရှိဘဲ ဝင်ရောက်နေရာယူရန် လုပ်ဆောင်ခဲ့ခြင်းကြောင့် နှစ်ဖက်တပ်ဖွဲ့အကြား စစ်ရေးတင်းမာနေကြောင်း ကွတ်ခိုင်ဒေသခံများက ပြောသည်။
“မနေ့ကတော့ စိုက်ပျိုးရေးခြံမှာ သူတို့နေရာလုကြတာ။ ကိုးကန့်တွေရှိတဲ့ စိုက်ပျိုးရေးခြံ နေရာမှာ TNLA က မပြောမဆိုနဲ့ နေရာသန့်ရှင်းရေးတွေလုပ်၊ အလံတွေထူ အဲ့လိုမျိုးလုပ်လို့ ရန်ပွဲဖြစ်လာတယ်။ ငြင်းခုံတာထက်ပိုတာ ရန်ဖြစ်တာပေါ့၊ ပစ်ခတ်ကြတယ်လို့ ပြောတယ်”ဟု ကွတ်ခိုင်မြို့မှ အသက် (၅၀) ကျော်အရွယ်ရှိ ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။
ကွတ်ခိုင်မြို့ တအာင်း(ပလောင်)တပ်ဖွဲ့ TNLA နှင့် ကိုးကန့်တပ်ဖွဲ့ MNDAA တို့ တင်းမာမှုဖြစ်ပွားခဲ့သည့် ၎င်းစိုက်ပျိုးရေးခြံ နေရာရှိ TNLA တပ်သား ၅ ဦးထက်မနည်း၏ သေနတ်များကို MNDAA တပ်သားများက သိမ်းဆည်းလိုက်ပြီးနောက် နှစ်ဘက်တပ်ဖွဲ့စလုံးက စစ်အင်အား ဖြည့်တင်းလာခဲ့ကြောင်း ဒေသခံများထံမှ သိရသည်။
ထို့နောက် ယမန်နေ့ (ဧပြီလ ၂၇ ရက်) ည ၁၁ နာရီခန့်တွင် ကွတ်ခိုင်မြို့ အနောက်ဘက်ရှိ TNLA တပ်စခန်းထဲမှ တစ်ဖက်သက် ပစ်ခတ်သည့် လက်နက်ကြီး၊ လက်နက်ငယ်အသံများကို ခပ်စိပ်စိပ် ကြားခဲ့ရကြောင်း ကွတ်ခိုင်ဒေသခံများက ပြောသည်။
“မနေ့ညကဆိုရင် ၁၁ နာရီကျော်မှာ TNLA တွေ နေတဲ့ဘက်မှာ သေနတ်သံ လက်နက်ကြီးကော လက်နက်ငယ်ကော တော်တော်များများတော့ အသံမြည်တယ်။ တစ်ဖက်သက်ကြီးပဲ အဲ့လိုခံရတော့ မကျေနပ်မှုတွေကို သူတို့ရှိတဲ့ စစ်တပ်ထဲကနေ လက်နက်နဲ့ ပြန်ပြီးမှ စိတ်ဖြေတာပေါ့။ စမ်းသပ်ပစ်တာ မဟုတ်ဘူး၊ ထင်တာကတော့ သူတို့အနေနဲ့ လက်နက်ကြီးတွေ ပစ်ပြီးမှ သူတို့ရဲ့ ဒေါသကို စိတ်ဖြေတဲ့သဘောပေါ့”ဟု ကွတ်ခိုင်မြိုမှ ၎င်းဒေသခံ အမျိုးသားက သုံးသပ်ပြောဆိုသည်။
ကွတ်ခိုင်မြို့နယ်တွင် ဖြစ်ပွားခဲ့သည့် ခြိမ်းခြောက်ပစ်ခတ်မှုနှင့် ပတ်သက်ပြီး TNLA တပ်ဖွဲ့ သတင်းနှင့် ပြန်ကြားရေးဌာနမှူးထံသို့ လည်းကောင်း၊ ကိုးကန့်တပ်ဖွဲ့ MNDAA ပြောရေးဆိုခွင့်ရှိသူ လီကျားဝင်းထံသို့ လည်းကောင်း သျှမ်းသံတော်ဆင့်မှ စာပို့မေးမြန်းထားသော်လည်း နှစ်ဘက်စလုံးက ပြန်လည်ဖြေကြားခြင်း မရှိသေးပါ။
အလားတူ ဧပြီလ ၁၉ ရက်ကလည်း ကွတ်ခိုင်မြို့နှင့် တာမိုးညဲမြို့အကြားရှိ မော်ဟန်ကျေးရွာအုပ်စုအနီး တအာင်း(ပလောင်) တပ်ဖွဲ့ TNLA နှင့် ကိုးကန့်တပ်ဖွဲ့ MNDAA စစ်ကြောင်းတို့ နှစ်ဘက်ထိတွေ့မှု ဖြစ်ပွားပြီး ညီနောင်မဟာမိတ်အချင်းချင်း သေနတ်ခြိမ်းခြောက်ပစ်ခတ်မှု ရှိခဲ့ကြောင်း ကွတ်ခိုင်ဒေသခံများက ပြောသည်။
“သူတို့ကိုယ်စီကိုယ်ငှ တော်တော်များများက ကွတ်ခိုင်ကနေ စစ်သားတွေကိုယ်စီနဲ့ ကာလိုင်ဘက်ကို ဆင်းလာတာတွေ့တယ်။ ပြဿနာ ဖြေရှင်းပြီးသွားလို့ ဆင်းလာတဲ့သဘောပေါ့လေ။ အဲ့တာကို ကြည့်ရရင် တမျိုးမျိုး ဖြစ်လာရင် သူတို့က နေရာတကာကနေပြီးမှ လူတွေအလုံးအရင်း စုပြီးလာတယ်ဆိုတာ တွေ့ရတာပေါ့”ဟု ကွတ်ခိုင်မြို့မှ စစ်ရေးသတင်းရင်းမြစ်တစ်ဦးက သျှမ်းသံတော်ဆင့်ကို ပြောသည်။
“၁၀၂၇ စစ်ဆင်ရေး”တွင် အတူတကွ တိုက်ပွဲဆင်နွှဲခဲ့ကြသည့် တအာင်း(ပလောင်)တပ်ဖွဲ့ TNLA နှင့် ကိုးကန့်တပ်ဖွဲ့ MNDAA တို့သည် ကွတ်ခိုင်မြို့နယ်တွင် နယ်မြေစိုးမိုးရေးနှင့် ပတ်သက်ပြီး ဒုတိယအကြိမ် စစ်ရေးတင်းမာလာကြခြင်း ဖြစ်သည်။
ထို့အပြင် ကွတ်ခိုင်မြို့နယ် နမ့်ဖတ်ကာ ကျေးရွာအထွက်ရှိ ပြည်ထောင်စုလမ်းမကြီးပေါ်ရှိ ကချင်လွတ်လပ်ရေးတပ် KIA ၏ စစ်ဆေးရေးဂိတ်တွင် MNDAA ကိုးကန့်တပ်သားများက လာရောက်ပြီး အချင်းချင်း စကားများ၍ ရိုက်နှက်ကန်ကျောက်ခဲ့ခြင်းကြောင့် တင်းမာမှုများ ရှိခဲ့ကြောင်း ဒေသခံများထံမှ သိရသည်။
Leave a Comments