စစ်တက္ကသိုလ်တည်ရှိသည့် ပြင်ဦးလွင်မြို့နှင့် ၁၀ မိုင်အကွာ၊ နောင်ချိုမြို့နယ်၊ သရက်ကုန်းကျေးရွာ အနီးတဝိုက် စစ်ကောင်စီတပ်က နေ့စဥ် လက်နက်ကြီး ပစ်ခတ်ပြီး လေကြောင်း တိုက်ခိုက်မှု ပြုလုပ်ကာ မြေပြင်မှ စစ်ကြောင်းထိုးနေသည်ဟု စစ်ရေးသတင်းရင်းမြစ်က ယနေ့ (ဧပြီလ ၂၉ ရက်) တွင် ပြောသည်။

သရက်ကုန်းရွာရှိ စစ်ကောင်စီ တပ်စခန်းကို MDY- PDF တိုက်ခိုက်သိမ်းပိုက်ပြီးနောက် စစ်ကောင်စီတပ် ပြန်လည် ထိုးစစ်ဆင်နေရာက တိုက်ပွဲ ပြင်းထန်နေပြီး လေကြောင်း တိုက်ခိုက်မှုများ နေ့စဥ် ပြုလုပ်နေရာ ယမန်နေ့ (ဧပြီလ ၂၈ ရက်) က တနေကုန်နီးပါး ဗုံးကြဲပြီး လက်နက်ကြီး ပစ်ခတ်ခဲ့သည်ဟု သတင်းရင်းမြစ်က ဆိုသည်။

“မနေ့ကတော့ တနေကုန်နီးပါး လေကြောင်းက ပစ်ခတ် ဗုံးကြဲနေတယ်လို့ သိရပါတယ်။ စစ်တပ်က ဒရုန်းတွေပါ သုံးနေပါတယ်။ ပြင်ဦးလွင်က တိုက်ခိုက်ရေး ရဟတ်ယာဥ်တွေ တောက်လျှောက် တက်လိုက် ဆင်းလိုက်ပဲ” ဟု ၎င်းကရှင်းပြသည်။

ယနေ့ (ဧပြီလ ၂၉ ရက်) မနက်ပိုင်းက ပြင်ဦးလွင်၊ မိုးကြိုးကျေးရွာအနီးရှိ စစ်ကောင်စီတပ်က လက်နက်ကြီးများ ပစ်ခတ်နေရာ လက်ရှိအချိန်အထိ အဆက်မပြတ် ပစ်ခတ်နေကြောင်း၊ ရပ်ကွက်ကြီး (၇) စစ်ဆေးရုံ အနီး လမ်းသွားလမ်းလာများကို စစ်ဆေးနေကြောင်း ဒေသခံ တစ်ဦးက ဆိုသည်။

ပြီးခဲ့သည့် ဧပြီလ ၂၇ ရက်တွင်လည်း သီပေါနှင့် ကျောက်မဲရှိ စစ်ကောင်စီတပ်များ နောင်ချိုမှ တိုက်ပွဲဖြစ်ပွားရာ သရက်ကုန်း ကျေးရွာဘက် ထွက်ခွာသွားသည်ဟု ဒေသခံများက ပြောဆိုသည်။

“စစ်တပ်က သီပေါ၊ ကျောက်မဲ ဘက်ကနေ နောင်ချိုဘက်ကို အလုံးအရင်းနဲ့ စစ်ကြောင်းထိုးနေတဲ့ သဘောပါ။ ပြင်ဦးလွင်ဘက်ကတော့ ယောင်ပြအနေနဲ့ တပ်နည်းနည်း လွှတ်ထားတယ်လို့ သတင်းရပါတယ်” ဟု စစ်ရေးသတင်းရင်းမြစ်က သုံးသပ်သည်။

ယခုဖြစ်ပွားနေသည့် တိုက်ပွဲများ အတွင်း ၂ ဖက်တပ် ထိခိုက် ကျဆုံးမှုနှင့် ပြည်သူလူထု ထိခိုက်မှုရှိမရှိ စုံစမ်း မေးမြန်းနေဆဲ ဖြစ်သည်။

ပြီးခဲ့သည့် ဧပြီလ ၁၄ ရက်နေ့၊ ညပိုင်းက စစ်တက္ကသိုလ် (DSA) တည်ရှိရာ ပြင်ဦးလွင်မြို့ စစ်ရေးပစ်မှတ်များကို MDY-PDF က ရှော့တိုက်ဒုန်းအလုံး ၂၀ ပစ်ခတ် တိုက်ခိုက်ပြီးနောက် နောက်တရက် ဧပြီလ ၁၅ ရက်နေ့ မနက် အစောပိုင်း သရက်ကုန်းရွာရှိ စစ်ကောင်စီတပ် စခန်းကို တိုက်ခိုက် သိမ်းပိုက်ခဲ့ရာက ယနေ့တိုင် တိုက်ပွဲများ ဖြစ်ပွားနေခြင်း ဖြစ်သည်။

တစ်ရက်နီးပါး ဖြစ်ပွားသည့် သရက်ကုန်းရွာ စခန်းသိမ်းတိုက်ပွဲတွင် စစ်ကောင်စီတပ် ထိခိုက်သေဆုံးမှု များပြားခဲ့ပြီး စစ်လက်နက်ပစ္စည်းများ ရရှိခဲ့သည်ဟု NUG ကာကွယ်ရေးက ထုတ်ပြန်ထားသည်။

အဆိုပါစစ်စခန်း ပြန်လည်ရရှိရေး ဧပြီ ၁၉ ရက်နေ့မှ စတင်ကာ စစ်ကောင်စီတပ် ကြည်းကြောင်းနှင့် လေကြောင်း အသုံးပြု တန်ပြန်ထိုးစစ်ဆင်နေရာ တိုက်ပွဲများ ဆက်လက်ဖြစ်ပွားခဲ့သည်ဟု NUG ကာကွယ်ရေး ဝန်ကြီးဌာန၏ ထုတ်ပြန်ချက်တွင် ဖော်ပြထားသည်။