တရုတ်-မြန်မာ နယ်စပ် တရုတ်နိုင်ငံဘက်ခြမ်းတွင် ကျည်အစစ်နှင့် ပစ်ခတ်မည့် စစ်ရေး လေ့ကျင့်ခန်းများကို နိုဝင်ဘာ ၂၅ ရက်တွင် စတင်ပြုလုပ်ခဲ့ကြောင်း တရုတ် တောင်ပိုင်းတိုင်း စစ်ဌာနချုပ်မှ ထုတ်ဖော်ပြောကြားကြောင်း ဆင်ဟွာသတင်းဌာနမှ သိရှိရသည်။
တရုတ်တောင်ပိုင်းတိုင်းစစ်ဌာနချုပ် ကြည်းတပ်အနေဖြင့် နှစ်စဉ်ပြုလုပ်သော စစ်ရေးလေ့ကျင့်ခန်း အစီအစဉ်အရ မြန်မာနှင့် နယ်စပ်ချင်းထိစပ်နေသော နယ်စပ်ဒေသတွင် ကျည်အစစ်ဖြင့် ပစ်ခတ်လေ့ကျင့်မည့် အစီအစဉ်များပါဝင်သော စစ်ရေးလေ့ ကျင့်ခန်းကို နိုဝင်ဘာလ၂၅ ရက်နေ့တွင် စတင်မည်ဖြစ်ကြောင်းသည်။
လက်ရှိမှာ မြန်မာ-တရုတ် နယ်စပ်တည်ငြိမ်ရေး နှင့် တောင်ပိုင်းစစ်ဌာနချုပ်တပ်ဖွဲ့ဝင်များ၏ ပစ်ခတ်မှုစွမ်းရည်မြှင့်တင်ရေး တို့အတွက် ရည်ရွယ်ကာ ပြုလုပ်ခြင်းဖြစ်ကြောင်း တရုတ်တောင်ပိုင်းစစ်ဌာနချုပ် သတင်းနှင့်ပြန်ကြားရေးမှ ထုတ်ဖော်ပြောဆို သည်။
“နိုဝင်ဘာ၂၃ရက်က နယ်စပ်မှာ ကုန်ကားအစီးရေ တစ်ရာကျော် မီးလောင်ပျက်စီးပြီး သူတို့ဘက်က ဒီလို ထလုပ်တာ ၊ရှမ်းမြောက်မှာ ရောက်နေတဲ့ တရုတ်လူမျိုးတွေအကုန်လုံး လည်း အမြန်ဆုံးရှောင်ကြဖို့ တရုတ်မီဒီယာတွေကနေ နှိုးဆော်နေကြတယ် အချိန်ကိုက်လုပ်ကြတာ တစ်ခုခုတော့ တစ်ခုခုဘဲ “ဟု မူဆယ်ဒေသခံတစ်ဦးမှ သျှမ်းသံတော်ဆင့်သို့ပြောသည်။
တရုတ်_မြန်မာ နယ်စပ် ရှမ်းပြည်မြောက်ပိုင်းတွင်စစ်ကောင်စီ နှင့် တိုင်းရင်းသားလက်နက်ကိုင်အဖွဲ့များ တိုက်ပွဲများဖြစ်လာခဲ့ပြီး နောက် တရုတ်စစ်ဘက်က ရုတ်ချည်းဖြစ်ပေါ်လာမည့် အခြေအနေအမျိုးမျိုးကို ရင်ဆိုင်ရန် ယခုကဲ့သို့ စစ်ရေးလေ့ကျင့်မှုများ လုပ်ဆောင်ပြီး အသင့်ပြင်ဆင်ထားခြင်းဖြစ်ကြောင်းလည်း ထုတ်ဖော်ပြောဆိုသွားကြောင်း သိရသည်။
ထို့ပြင် တရုတ်စစ်တပ်သည် ပြည်သူများ၏ အသက်အိုးအိမ်စည်းစိမ်နှင့် နယ်စပ်တည် ငြိမ်ရေး၊ အချုပ်အခြာအာဏာပိုင်နက်များကို ကာကွယ်ရန်အတွက် အရေးပေါ် တုံ့ပြန်ရန် အမြဲတမ်းပြင်ဆင်နေကြောင်း ဆိုသည်။
တရုတ်စစ်တပ်သည် အဆိုပါစစ်ရေးလေ့ကျင့်ခန်းကို အချိန်မည်မျှကြာကြာ ပြု လုပ်မည်ဆိုသည်နှင့် အင်အားမည်မျှသုံးမည်ကို သတင်းထုတ်ပြန်ခြင်းမရှိကြောင်းလည်း စုံစမ်းသိရှိရသည်။
