သျှမ်းပြည် နမ့်ခမ်းမြို့အတွင်း ယနေ့ (နိုဝင်ဘာ ၂၆)ရက် နံနက်ပိုင်းတွင် စစ်ကောင်စီ မှ ဂျက်လေယာဥ်ဖြင့် ဗုံးကြဲမှုကြောင့် အသက် (၁၇)နှစ်အရွယ်ရှိ မိန်းကလေး၏ ခန္ဓာကိုယ် တစ်ပိုင်းတစ်စ ဖြစ်သွားခဲ့ကြောင်း စုံစမ်းသိရသည်။
နမ့်ခမ်းမြို့ စစ်ကောင်စီမှ ဂျက်လေယာဥ်ဖြင့် ဗုံးကြဲတိုက်ခိုက်မှုကြောင့် မန်နားရပ်ကွက်တွင် နေထိုင်သည့် နေအိမ်ပေါ်ကျကာ အသက် (၁၇)နှစ် အရွယ်ရှိ မိန်းကလေး၏ ခန္ဓာကိုယ်သည် တစ်ပိုင်းတစ်စဖြစ်သွားကာ ပွဲချင်းပြီးသေဆုံးခဲ့ရပြီး၊ ဖခင်ဖြစ်သူက ခြေထောက်ပြတ်သွားကြောင်း သွားရောက်ကူညီသည့်အမျိုးသားတစ်ဦးက သျှမ်းသံတော်ဆင့်ကိုပြောသည်။
“ ဒီမနက် ပစ်တဲ့လက်နက်ကြီးက ပြင်းအားတော်တော်ရှိတယ်။ မန်နားမှာ ကွမ်းယာရောင်းတဲ့ မိန်းကလေးရဲ့ ခန္ဓာကိုယ်က တစ်စစီဖြစ်သွားတယ်။ သူ့ခေါင်းကတခြား၊ ခြေထောက်က တခြား၊ ခန္ဓာကိုယ်က တခြားလွှင့်တာ။ ကြောက်စရာ ကောင်းတယ်။ သူ့အဖေကလည်း ခြေထောက်ပြတ်သွားတယ်” ဟု ၎င်းအမျိုးသားက ပြောသည်။
လက်ရှိ အချိန်ထိ နမ့်ခမ်းမြို့အတွင်း စစ်ရေးပြင်းထန်နေပြီး၊ ပြည်သူ့ကို ပစ်မှတ်ထားပြီး တိုက်ခိုက်မှုများလည်းရှိနေကြောင်း သိရသည်။
” အခု ကျနော်တို့ အိမ်ထဲမှာ နေရတာတောင် မလုံခြုံတော့ဘူး။ အိမ်ကိုလည်းထိ၊ လူကိုလည်းထိ၊ အိမ်စောင့်အနေနဲ့ ကျန်ခဲ့တာတောင် ဘယ်နေ့ ကိုယ့်အလှည့်ရောက်လာမယ်မှန်းမသိဘူး။ ရင်တထိတ်ထိတ်နဲ့နေနေရတယ်” ဟု နမ့်ခမ်းအသက် ၄၈နှစ်အရွယ် အမျိုးသားက ပြောသည်။
စစ်ကောင်စီနှင့် ညီနောင်မဟာမိတ်တို့ ဖြစ်ပွားသည့်တိုက်ပွဲတွင် နမ့်ခမ်းမြို့ အရပ်သားနေအိမ်အများအပြားထိခိုက်မှုရှိသလို အရပ်သားသေဆုံးမှုထိလည်းရှိနေပြီး ပြည်သူများစစ်ဘေးတိမ်းရှောင်နေရသည်။
ပြီးခဲ့သည့် နိုဝင်ဘာ ၂၁ရက်တွင်လည်း နမ့်ခမ်းပေါက်နေရပ်ကွက်ရှိ စည်ပင်ရုံးရှေ့တွင် လက်နက်ကြီးကျပေါက်ကွဲပြီး အမျိုးသးတစ်ဦး နှင့် အမျိုးသမီး တစ်ဦး ပွဲချင်းပြီးသေဆုံးခဲ့ပြီး၊ အရပ်သား၄ဦး ထိခိုက်ဒဏ်ရာရရှိခဲ့သည်။
#SHANBurmese
#Shannews
#သျှမ်းသံတော်ဆင့်
#ဗုံးကြဲ #ဂျက်လေယာဥ် #အမျိုးသမီးတစ်ဦးသေဆုံး #နမ့်ခမ်း #စစ်ကောင်စီ
Leave a Comments