သျှမ်းပြည်မြောက်ပိုင်း နမ့်ခမ်းမြို့နယ် ကောင်းတပ်ကျေးရွာအနီးတွင် ယနေ့ နံနက်ပိုင်း၌ ပေါက်ကွဲမှုကြီး တစ်ခုဖြစ်ပွားခဲ့ကြောင်း ဒေသခံများထံမှ သိရသည်။
အဆိုပါ ပေါက်ကွဲမှုအတွင်း ၂၀ ဦးကျော် သေဆုံးကြောင်း ကနဦး သိရှိရပြီး ထိခိုက်ဒဏ်ရာရသူ (၇၀)ကျော်နှင့် ပိတ်မိနေသူများကိုလည်း ဆက်လက် ကယ်ထုတ်နေဆဲ ဖြစ်ကြောင်း နမ့်ခမ်းမြို့ခံတစ်ဦးက ပြောသည်။
“သေတဲ့လူကတော့ ၂၀ ကျော်သွားပြီ၊ ထိခိုက်ဒဏ်ရာရတဲ့သူတွေလည်း များတယ်။ အခုဆေးရုံမှာ ရောက်နေတဲ့သူတွေလည်း ၇၀ လောက်ရှိပြီ” ဟု နမ့်ခမ်းမြို့ခံတစ်ဦးက သျှမ်းသံတော်ဆင့်သို့ ပြောသည်။
နမ့်ခမ်းမြို့ခံများ၏ ပြောပြချက်အရ လက်ရှိပေါက်ကွဲမှုသည် တအာင်း (ပလောင်) အမျိုးသားလွတ်မြောက်ရေး တပ်မတော် (TNLA) ၏ လက်နက်ခဲယမ်း သိုလှောင်ထားသည့် နေရာဖြစ်ကြောင်း ပြောဆိုသော်လည်း သျှမ်းသံတော်ဆင့်အနေဖြင့် သီးခြား အတည်မပြုနိုင်သေးပေ။
” ကျနော်တို့အိမ်ရဲ့ မှန်တွေ အားလုံးကွဲကုန်တယ်၊ ဘာမှ ရစရာမရှိတော့ဘူး၊ လူထိခိုက်မှုမရှိဘူး။ အသံက လန့်စရာတော်တော်ကောင်းတယ်” ဟု နမ့်ခမ်း ဒေသခံ အမျိုးသားတစ်ဉီးက သျှမ်းသံတော်ဆင့်ကိုပြောသည်။
ထို့အပြင် လက်ရှိ ထိခိုက်ဒဏ်ရာရရှိသူများကို နမ့်ခမ်းပြည်သူ့ဆေးရုံသို့ ပို့ဆောင်ထားပြီး၊ လူနာများအတွက် အရေးပေါ်သွေးလိုနေကြောင်းလည်း သွားရောက်ကူညီပေးသည့် ပရဟိတအဖွဲ့ဝင်တစ်ဉီးကပြာသည်။
” ကျနော်တို့ ထိခိုက်ဒဏ်ရာရသူနဲ့ အလောင်းတွေကို ကယ်ထုတ်နေတယ်။ နမ့်ခမ်းဆေးရုံကိုပို့ထားတယ်။ အခု သွေးအဓိကလိုအပ်နေတယ်” ဟု ၎င်းကဆိုသည်။
လက်ရှိတွင် ပေါက်ကွဲမှုဖြစ်စဉ်နှင့် ပတ်သက်၍ ပေါက်ကွဲရသည့် အကြောင်းအရင်း၊ ထိခိုက်ပျက်စီးမှု အခြေအနေနှင့် အခြားဆက်စပ်အချက်အလက်များကို သက်ဆိုင်ရာ တာဝန်ရှိသူများက စုံစမ်းစစ်ဆေးလျက်ရှိကြောင်း TNLA က ထုတ်ပြန်ထားသည်။
ထို့ကြောင့် မိဘပြည်သူများအနေဖြင့် ဖြစ်စဉ်နှင့် ပတ်သက်၍ မလိုအပ်ဘဲ စိုးရိမ်ထိတ်လန့်မှုများ မဖြစ်ပေါ်ကြရန်နှင့် လူမှုကွန်ရက်ပေါ်ရှိ အတည်မပြုနိုင်သေးသော သတင်းအချက်အလက်များကို မျှဝေခြင်း မပြုကြရန် TNLA က တိုက်တွန်းထားသည်။
Leave a Comments