သျှမ်းပြည် ကျောက်မဲမြို့နယ် အတွင်း လက်နက်ကြီးကျပေါက်ကွဲမှုကြောင့် ဦးဇင်းတစ်ပါး နှင့် အမျိုးသမီးတစ်ဦး လက်နက်ကြီးကျည်စ ထိမှန်ခဲ့ကြောင်း စုံစမ်းသိရသည်။
ယနေ့ (နိုဝင်ဘာ ၂၇)ရက် နံနက် ၈နာရီခွဲဝန်းကျင်တွင် ကျောက်မဲမြို့နယ် လွယ်ခေါ်ကျေးရွာတွင် လက်နက်ကြီးကျပေါက်ကွဲမှုကြောင့် အမျိုးသမီး တစ်ဦး ကျည်စထိမှန် ဒဏ်ရာရရှိခဲ့ကြောင်း နမ့်ခုံး ပရဟိတအသင်းမှ တာဝန်ရှိသူ တစ်ဦးက သျှမ်းသံတော်ဆင့်ကိုပြောသည်။
“ဟုတ်တယ် အမျိုးသမီး တစ်ဦး ကျည်စမှန်တာဟုတ်ပါတယ်။ ကျနော်တို့အသင်းကို ဆက်သွယ်တယ် ဒီနေ့ (နိုဝင်ဘာ ၂၇)ရက် မနက်မှာ ဆက်သွယ်လာလို့ သွားခေါ်လာတာပါ။ အခုကျောက်မဲမြို့ ပြည်သူ့ဆေးရုံမှာပါ” ဟုနမ့်ခုံးပရဟိတ အသင်းမှ တာဝန်ရှိသူတစ်ဦးက ပြောသည်။
အဆိုပါ ကျည်စထိမှန်သည့် အမျိုးသမီးသည် အသက် ၂၉နှစ်အရွယ်ရှိ နန်းမွမ်းဆိုင် ဖြစ်သည်။
အလားတူ ယမန်နေ့ (နိုဝင်ဘာ ၂၆)ရက် ည ၁၁နာရီဝန်းကျင်တွင်လည်း ကျောက်မဲမြို့နယ် နမ့်ဟူးကျေးရွာတွင် လက်နက်ကြီးကျပေါက်ကွဲမှုကြောင့် ဦးဇင်း တစ်ပါး လက်နက်ကြီးကျည်စ ထိမှန် ကာ ကျောက်မဲပြည်သူ့ဆေးရုံသို့ ပို့ဆောင်ခဲ့ကြောင်း နမ့်ခုံးပရဟိတ အသင်းမှ တာဝန်ရှိသူ က ဆက်ပြောသည်။
“မနေ့က ည ၁၁နာရီအချိန်မှာ ဦးဇင်းက ကျိန်းနေတာ၊ အဲ့မှာ လက်နက်ကြီးက ကျောင်းဆောင်ကို လာထိတော့ ဦးဇင်းကို ကျည်စမှန်သွားတာ၊ လက်နဲ့ခြေထောက်ကို ထိသွားတယ်။ ၃နေရာလောက်ထိတယ်” ဟု သွားရောက်ကူညီခဲ့သည့် သူက ဆိုသည်။
ယခုရက်ပိုင်း ကျောက်မဲမြို့နယ်အတွင်း လက်နက်ကြီးပစ်ခတ်သံများ ဆက်တိုက်ကြားနေရပြီး၊ အရပ်သားနေအိမ်ထိမှန်မှု ပြည်သူကို ကျည်စထိမှန်လာသည့်အနေအထားထိရောက်လာသည်။
ထို့ပြင် ပြည်သူများက တိုက်ပွဲပြင်းထန်လာမည်ကို စိုးရိမ်ထိတ်လန့်နေကြသည်။
“သူတို့ (စကစ) က သတင်းရတဲ့ဘက်ကိုလက်နက်ကြီးနဲ့ ပစ်ပြီးတော့ သျှမ်းရွာတွေထဲ ပဲလက်နက်ကြီးကျတာလေ။ စစ်ပွဲတကယ်ဖြစ်နေလို့ ပစ်ရင် လည်းတမျိုး။ လက်နက်ကြီးက ပြည်သူတွေပေါ်ပဲကျတော့ စိုးရိမ်ရတာ ပေါ့ ပြည်သူတို့ပဲ ဒုက္ခတွေ ရောက်ပြီး ပြည်သူတွေပဲပြေးရတာလေ။ အိမ်တွေလည်း ပျက်စီးရတယ်။ ဒီလိုတွေတော့ မဖြစ်စေချင်ဘူး” ဟု ကျောက်မဲဒေသခံ အသက် ၄၀ကျော် အရွယ်ရှိ အမျိုးသားတစ်ဦးက သျှမ်းသံတော်ဆင့်ကိုပြောသည်။
ကျောက်မဲမြို့နယ်အတွင်း လက်နက်ကိုင်ပေါင်းစုံ လှုပ်ရှားသည့်နေရာဖြစ်ပြီး၊ စစ်ရေး မကြာခဏ ဖြစ်ပွားသည့် ဒေသတစ်ခုလည်းဖြစ်ကာ မြေမြုပ်မိုင်းများ မကြာခဏ နင်းမိခြင်း လက်နက်ကြီးထိမှန်ခြင်း လေယာဉ်များဖြင့် ဗုံးကြဲခြင်းများကြောင့် အသက်သေဆုံးမှုများရှိကြောင်း သိရသည်။
