စစ်ကောင်စီ၏ လက်နက်ကြီး ပစ်ခတ်မှုများကြောင့် မီးလောင်ပြာကျသွားသည့် ဆီဆိုင်မြို့ဈေးထဲရှိ ပစ္စည်းများကို စစ်ကောင်စီက ကျပ်သိန်း (၇၀) ဖြင့်လေလံတင်ရောင်းချခဲ့ကြောင်း ဒေသခံများထံမှ သိရသည်။

လက်နက်ကြီးများကြောင့် မီးလောင်ပျက်စီးသွားသည့် ဆီဆိုင်မြို့မဈေးကို အသစ်ပြန်လည် တည်ဆောက်ရန်အတွက် လက်ကျန်သံတိုသံစများ၊ သွပ်များကို ကျပ်သိန်း ၇၀ ဖြင့် ပြီးခဲ့သည့် ရက်ပိုင်းအတွင်း စစ်ကောင်စီက လေလံတင်ရောင်းချခဲ့ကြောင်း ဆီဆိုင်မြို့ဒေသခံတစ်ဦးက သျှမ်းသံတော်ဆင့်ကိုပြောသည်။

“ဆီဆိုင်ဈေးထဲမှာ ပျက်သွားတဲ့အဆောက်အဦးအားလုံးကို သန့်ရှင်းရေးလုပ်ပြီး လေလံတင်ရောင်းလိုက်တယ် ပြောတယ်။ သံတိုသံစတွေ၊ သွပ်တွေ ရောင်းလိုက်တာပေါ့။ ဘယ်သူကဝယ်သွားလဲတော့ မသိဘူး။ ပစ္စည်းတောင်မှအခုစရှင်းနေပြီ။ ဈေးကြီးပတ်ပတ်လည်ကဆိုင်တွေတော့ ကိုယ်ဟာကိုယ်ရှင်းကြတယ်။ တချို့လည်း ရောင်းလိုက်တယ်” ဟု ၎င်းကပြောသည်။

စစ်ကောင်စီမှ လေလံတင်ရောင်းချပြီး ရရှိထားသည့် ငွေများအား စစ်ကောင်စီတပ်ဖွဲ့ဝင်များက ရရှိပြီး၊ နစ်နာသူ ဆိုင်ခန်းပိုင်ရှင်များက တစ်ကျပ်တစ်ပြားမှမရရှိကြောင်း သိရသည်။

အဆိုပါ မြို့မဈေးတွင် ဆိုင်ခန်းပေါင်း ၈၀၀ ခန့်ရှိပြီး ဖေဖော်ဝါရီလ ၁၅ ရက်က စစ်ကောင်စီ၏ လက်နက်ကြီး ကျရောက်ပေါက်ကွဲမှုကြောင့် ဆိုင်ခန့်တချို့သာကျန်၍ ဆိုင်ခန်းများအားလုံးနီးပါး မီးလောင်ပြာကျသွားခြင်း ဖြစ်သည်။

ပြီးခဲ့သည့် မတ်လ ၂၅ ရက်မှစ၍ ဆီဆိုင်မြို့ကို စစ်ကောင်စီက ပြန်လည်ထိန်းချုပ်ပြီးနောက် ၎င်းတို့အုပ်ချုပ်ရေး ယန္တရား ပြန်လည်ပတ်နိုင်ရန် ဌာနဆိုင်ရာရုံးဝန်ထမ်းများကို ပြန်ပို့ခြင်း၊ ဖုန်းလိုင်းများ ပြန်လည်ပြုပြင်ခြင်းနှင့် စစ်ရှောင်များ နေရပ်ပြန်နေထိုင်ရန် ခေါ်ယူခြင်း စသည့်ဖြင့် လုပ်ဆောင်နေသည်ဟု ဆီဆိုင်မြို့ဒေသခံတစ်ဦးက ပြောသည်။

“ဒါကတော့ တော်လှန်ရေးတပ်ဖွဲ့တွေ ဖျက်စီးလို့၊ အကြမ်းဖက်တွေ ဖျက်စီးလို့ ငါတို့ကပြန်လည်ပြုပြင် ရတာဆိုပြီး နိုင်ငံရေးအမြတ်ယူနေတာပဲ။ အမှန်ကသူတို့ဖျက်စီးတာပဲ၊ အခုမှသူတို့ပြန်လုပ်ပေးတာပါ” ဟု ၎င်းကပြောသည်။

စစ်ကောင်စီဘက်မှ အုပ်ချုပ်ရေး ယန္တရားပြန်လည်ပတ်နိုင်ရန် စစ်ဘေးရှောင်များကို ခေါ်ယူနေသော်လည်း လူနေအိမ်ရပ်ကွက်များတွင် စစ်လက်နက်အကြွန်းများ ကျန်ရှိနေသကဲ့သို့ ဆီဆိုင်မြို့တောင်ဘက် ကျေးရွာတွင်လည်း တိုက်ပွဲများဆက်လက် ဖြစ်ပွားနေသေးသဖြင့် ဒေသခံများနေရပ်မပြန်နိုင်သေးပေ။

“အခုဆီဆိုင်မှာကတိုက်ပွဲလုံးဝမပြီးသေးဘူး။ ဆီဆိုင်မြို့ရဲ့ တောင်ဘက်မှာ တောက်လျောက်တိုက်ပွဲ ဆက်ဖြစ်နေသေးတယ်။ ဒီနေ့ဆို နောင်ရေးရွာ၊ နောင်ဘိုရွာတို့ဘက်က ၃ ရွာ၊ ၄ ရွာမှာ တိုက်ပွဲတွေ ဖြစ်နေတယ်။ အဲ့ရွာကလူတွေ အယောက် ၁ ထောင်ကျော် ဆိုက်ခေါင်ကိုရှောင်လာကြတယ်” ဟု ဆီဆိုင်မြို့ စစ်ဘေးရှောင်ကူညီသူတစ်ဦးက ပြောသည်။

သျှမ်းတောင် ဆီဆိုင်မြို့အပြင် ဟိုပုံးမြို့နယ်၊ ပင်လောင်းမြို့နယ်နှင့် ညောင်ရွှေမြို့နယ်တွင် တိုက်ပွဲများကြောင့် ၃ လကြာ အရပ်သားသေဆုံးမှု ၆၆ ဦးထိရှိပြီး ကလေးငယ်နှင့် အမျိုးသမီးအပါအဝင် အရပ်သားထိခိုက်သေဆုံးမှု ၈၃ ဦးအထိ မြင့်တက်လာနေကြောင်း ပအိုဝ်းလူငယ်အစည်းအရုံးက ယနေ့ဧပြီလ ၂၉ ရက်တွင် ထုတ်ပြန်ထားသည်။