မိုးနဲမြို့နယ် နမ့်ဟူးရေထွက်ဦး မပျောက်ပျက်စေရန် ဒေသန္တရအမိန့်ထုတ်ပြန်ထားသော်လည်း ထိရောက်မှုမရှိသဖြင့် အဆိုပါအမိန့်ပယ်ဖျက်သင့်ကြောင်း မိုးနဲမြို့နယ် ပြည်နယ်လွှတ်တော်ကိုယ်စားလှယ် စိုင်းမွမ်းလိန်ကပြောဆိုလိုက်သည်။

ဒီဇင်ဘာလ ၁၄ ရက်နေ့ကကျင်းပသော သျှမ်းပြည်နယ်လွှတ်တော် ဒုတိယအကြိမ် သျှမ်းပြည်နယ်လွှတ်တော် ၁၂ ကြိမ်မြောက် ပုံမှန် အစည်းအဝေး တွင် စိုင်းမွမ်းလိန်က – မိုးနဲမြို့အတွင်း ရှေးဟောင်းအမွေအနှစ်များ ထိန်းသိမ်း စောင့်ရှောက်ရေးနှင့်ပတ်သက်သည့်မေးခွန်းများမေးမြန်းရာ မိုးနဲမြို့တောင်သူလယ်သမားများနှင့် ဒေသခံလူထု အဓိက အားထားပြုရသော နမ့်ဟူးရေးထွက်ဦးဧရိယာအတွင်း ကျူးကျော်နေထိုင်သူများ ယာယီတဲဆောက်နေ မှုနှင့်ပတ်သက်သည့်မေးခွန်းများမေးမြန်ရာတွင် ဒေသန္တရအမိန့် ပယ်ဖျက်ပေးရန်အစီအစဉ်ရှိမရှိ မေးမြန်း ခဲ့ခြင်းဖြစ်သည်။

“အဓိကကတော့ ရေထွက် ပြန်လည်ထိန်းသိမ်းဖို့အတွက် တောင်သူလယ်သမားတွေရဲ့အများဆန္ဒ သဘောထားရယူပြီး ပြန်လည်ထိန်းသိမ်းရမယ်။ တောင်သူ အတွက် အကျိုးမဖြစ်ထွန်းသော ဒေန္တရ အမိန့်ကို ပြန်လည်ပယ်ဖျက်ပေးဖို့ပေါ့။ ဒီဒေသန္တရအမိန့်ကြီးက မြေပိုင်ရှင်ကိုအကာအကွယ်ပေးနေသလိုဖြစ်နေပါတယ်။ အခု အဲဒီနမ့်ဟူးရေထွက်ဦး ဧရိယာအတွင်းမှာ သဲတွေ ဗြုန်းတွေဖြည့်ဆီးနေပြီး ကျူးကျော်တဲဆောက်နေတာတွေရှိနေ တယ်။ ဒါကြောင့် ဒေသန္တရအမိန့်ကို ဖျက်သိမ်းပေးဖို့ ဒေသခံလူထုက ကျနော်တို့ဆီ စာရေးပြီးတင်ပြလာတယ်။ နမ့်ဟူးရေထွက်ဦးဧရိယာ ၂၃ ဧက ကို အရင်တုန်းကအတိုင်းဘဲ သဘာဝနယ်မြေအဖြစ်ပြန်လည်ထားရှိပေးဖို့ တောင်းဆိုလာကြတာကြောင့် ကျနော်ကနေ လွှတ်တော်မှာတင်ပြရတာဖြစ်ပါတယ်။ ” – ဟု ကျားခေါင်းပါတီ၏ မိုးနဲမြို့နယ် ပြည်နယ်လွှတ်တော်ကိုယ်စားလှယ် စိုင်းမွမ်းလိန်က သျှမ်းသံတော်ဆင့်အားပြောသည်။

၄င်း၏မေးခွန်းအား သဘာဝသယံဇာတ နှင့်သဘာဝပတ်ဝန်းကျင်ထိန်းသိမ်းရေးဝန်ကြီး ဒေါက်တာညီညီအောင်က – ရေထွက်များကိုကာကွယ်ထိန်းသိမ်းရန်အတွက် (က) ရေထွက်၏ ရေဝေရေလဲဋ္ဌရိယာများထိန်းသိမ်းခြင်း၊ (ခ) ရေထွက်နေရာများအားထိန်းသိမ်းခြင်း၊ (ဂ) ရေထွက်မှ စီးထွက်သွားသောချောင်းများရှိပါက အဆိုပါချောင်း များ အား ထိန်းသိမ်းခြင်း တို့ရှိရမည်ဖြစ်ကြောင်း၊ နမ့်ဟူးရေထွက်သည် သစ်တောနယ်မြေ (ကြိုးဝိုင်း ကြိုးပြင် ကာကွယ် တော၊ သဘာဝ နယ်မြေ)အတွင်းကျရောက်မှုမရှိဘဲ အစိုးရစီမံခန့်ခွဲပိုင်ခွင့်ရှိသော နယ်မြေအတွင်းတည်ရှိသဖြင့် မိုးနဲမြို့ နယ် စီမံကိန်းကော်မတီမှ (၁၃၊၁၊ ၂၀၁၅) ရက်စွဲက ဒေသန္တရ တားမြစ်မိန့် အမှတ် (၁၊၂၀၁၅) ထုတ်ပြန် ကာကွယ်ထားပြီးဖြစ်ကြောင်း၊ ဒေသန္တရအမိန့်ထုတ်ပြန်ပြီးနောက် အဆိုပါဧရိယာအတွင်း ကျူးကျော် အဆောက်အဦးဆောက်လုပ်လာသူမျာကိုလည်း မိုးနဲမြို့ စီမံခန့်ခွဲမှုကော်မတီ၏ ၁၀၊၁၁၊၂၀၁၆ ရက်စွဲ၊ ၁၂၊ ၁၁၊ ၂၀၁၈ ရက်စွဲတို့ဖြင့် တားမြစ်ခဲ့သဖြင့် လက်ရှိတွင် အဆောက်အဦးဆောက်လုပ်ခြင်းမရှိတော့ကြောင်း – ဖြေကြားသွားခဲ့သည်။

ထိုသို့သော ကျူးကျော်သူများအပြင် နမ့်ဟူးသဘာဝရေထွက်ဦးအနီးတဝိုက်တွင် စီးပွါးရေးလုပ်ငန်းရှင်များက ကျောက်မီးသွေးတူးဖော်ရန်အတွက် ကြိုးစားနေမှုကြောင့် မိုးနဲမြို့ဒေသခံလူထုများနှင့် လွှတ်တော်အမတ်များက နမ့်ဟူးရေထွက်ဦးအား ထိန်းသိမ်းစောင့်ရှောက်ရေးအစဉ်ပြုလုပ်လျှက်ရှိသည်။ တနှစ်တကြိမ် နမ့်ဟူးကန်အတွင်း ဒိုက်အမှိုက်များအား ရှင်းလင်းခြင်း၊ ရေစီးရေလာကောင်းစေရေး မြောင်းများရှင်းလင်းခြင်း၊ သဘာဝပတ်ဝန်းကျင် ရေရှည်တည်တ့ံစေရေးအတွက် တောစောင့်နတ် တောင်စောင့်နတ်များအား တိုင်တည်ဆုတောင်းခြင်းများနှစ်စဉ်ပြုလုပ်ခဲ့ကြပါသည်။

နမ့်ဟူးရေထွက်ဦးသည် မိုးနဲမြို့မြောက်ဘက် ၁၀ မိုင်ခန့်အကွာတွင်တည်ရှိပြီး ၀မ့်ယေးရွာနှင့် ပန်အူရွာကြားတွင်တည်ရှိပါသည်။

လွယ်စက်တော် တောင်ခြေရှိ နမ့်ဟူးရေထွက်မှရေသည် ပန်အူရွာအလွန်တွင် ချောင်း ၄ ဖြာခွဲကာ မိုးနဲမြို့အားဖြတ်သန်းစီးဆင်းကြောင်း အဆိုပါချောင်း ၄ ခုအား အဓိကအသုံးပြုကာ မိုးနဲမြို့သားများ လယ်ယာမြေရေသွင်းစိုက်ပျိုးကြကြောင်း သိရပါသည်။