သျှမ်းပြည် မြောက်ပိုင်း သီပေါမြို့နယ် ကုန်းဆော့ ကျေးရွာ အုပ်စု အတွင်း စစ်ရေး တင်းမာမှုကြောင့် ဒေသခံ ၅၀၀ ကျော် ထွက်ပြေးတိမ်းရှောင်နေရကြောင်း သတင်းရရှိသည်။
မြောက်ပိုင်းမဟာမိတ်တပ်ဖွဲ့ဝင် SSPP/SSA နှင့် တောင်ပိုင်း သျှမ်းပြည်တပ်မတော် RCSS/SSA တို့ကြားစစ်ရေးတင်းမာမှုများဖြစ်ပွါးခဲ့ကြပြီး လက်ရှိ အချိန်ထိ တိုက်ပွဲမှာ မဖြစ်ပွားခဲ့သော်လည်း ဒီဇင်ဘာ ၁၇ ရက် ယမန်နေ့က စစ်ရေးတင်းမာမှုများရှိသဖြင့် ကုန်းဆော့အုပ်စု ခိုင်းဟျိုးရွာမှ ဒေသခံများ တိုက်ပွဲဖြစ်ပွားမည် ကို စိုးရိမ်ကာ သီပေါမြို့နယ် နမ့်ယန်းကျေးရွာ အုပ်စု နောင်ကော့ဘုန်းတော်ကြီးကျောင်း သို့ စစ်ရှောင် ၅၀၀ ထွက်ပြေး တိမ်းရှောင်လာကြောင်း အသက် ၄၀ ကျော်အရွယ်ရှိ စစ်ဘေးရှောင် စိုင်းလုံ ကပြောသည်။
“ ဟို တနေ့ကတော့ သေနတ်သံကြားတယ်။ မနေ့ကတော့ သေနတ်သံမကြားဘူး။ တိုက်ပွဲတော့ မဖြစ်ကြဘူး။ ဒါပေမယ့် တိုက်ပွဲဖြစ်မှာကို စိုးရိမ်လို့ထွက်ပြေးလာကြတာ” ဟု စိုင်းလုံ ကဆိုသည်။
ယနေ့ ဒီဇင်ဘာ ၁၈ ရက်နေ့မှာတော့ နောင်ကော့ကျေးရွာ ဘုန်းကြီးကျောင်းသို့ လာရောက် စစ်ရှောင်သည့် အရပ်သား ပြည်သူ တချို့ သည် သီပေါဘက်သို့ ရွှေ့ပြောင်းသွားကြပြီး၊ တချို့မှာ တိုက်ပွဲသံမကြားရသဖြင့် မိမိနေရပ်သို့ ပြန်သွားကြောင်း၊ လက်ရှိ မှာ စစ်ရှောင် ၂၅၀ ကျော်သာ ကျန်ကြောင်းလည်း စစ်ရှောင် စိုင်းလုံ ကပြောပြသည်။
“ ဒီမှာတော့ အသက်ကြီးတဲ့သူတွေ၊ အမျိုးသမီးတွေ နဲ့ ကလေးငယ်တွေပဲကျန်တယ်။ သေနတ်သံတွေ မကြား တိုက်ပွဲဖြစ်သံမကြားတော့ နေရပ်ပြန်ကြည့်ကြတယ်။ တချို့က သီပေါဘက် သွားနေတယ်” ဟု ၎င်း က ဆိုသည်။
ဆက်လက်ပြီး သီပေါမြို့နယ် မှ လူငယ်အမျိုးသားတဦး က “ ကျနော်တို့ အချင်းချင်းဖြစ်တဲ့ တိုက်ပွဲ ဘာပြောရမှန်းမသိတော့ဘူး။ လူမျိုးအချင်းချင်းဖြစ်တဲ့အတွက် ပြောရခက်တယ်။ အရပ်သားပြည်သူတွေရဲ့ မျက်နှာ ကြည့်ပေးပါလို့ပဲ တောင်းဆိုချင်ပါတယ်” ဟု ဆိုသည်။
နိုဝင်ဘာ ၂၃ ရက်နေ့ကလည်း သီပေါမြို့နယ် အတွင်း သျှမ်းလက်နက်ကိုင် အချင်းချင်း ပစ်ခတ်မှုကြောင့် ဒေသခံ ၃ ဦး သေဆုံးခဲ့ပြီး၊ ၃ ဦး ဒဏ်ရာရရှိခဲ့ကြောင်း သိရသည်။
သျှမ်းပြည် မြောက်ပိုင်း သီပေါမြိုု့နယ်၊ လားရှိုးနှင့် နမ္မတူမြို့နယ် တို့တွင် တိုက်ပွဲများ ဆက်တိုက်ဖြစ်ပွားမှုကြောင့် အရပ်သားပြည်သူများ စစ်ဘေးရှောင်နေရပြီး၊ လယ်ယာများ ကောင်းမွန်စွာမလုပ်ကိုင်နိုင်ကြကာ စားဝတ်နေရေး အတွက် စိုးရိမ်ပူပန်နေရကြောင်း သိရသည်။
အရပ်သားပြည်သူများ အား ပစ်မှတ်ထားပြီး ပစ်ခတ်နေခြင်း နှင့် တိုက်ပွဲများရပ်တန့်ရန် အတွက် တိုင်းရင်းသားခေါင်းဆောင် အချင်းချင်း တွေ့ဆုံ ဆွေးနွေးပေးရန် လည်း သျှမ်းပြည်နယ် အရပ်ဖက် လူမှုအဖွဲ့အစည်းမှ နိုဝင်ဘာ ၂၉ ရက်နေ့ တွင် ထုတ်ပြန်ကြေညာခဲ့သည်။
Leave a Comments