သျှမ်းတောင်ရောက် စစ်ဘေးရှောင်များသည် ယခု မိုးရာသီ ကာလအတွင်း ရာသီတုတ်ကွေး နှင့် ဝမ်းပျက်ဝမ်းလျှော ရောဂါများ ဖြစ်ပွားနေကြောင်း သတင်းရရှိသည်။

ပြီးခဲ့သည့် ဇူလိုင်လတွင် သျှမ်း-ကရင်နီနယ်စပ် မိုးဗြဲ၊ ဖယ်ခုံဘက်တွင် စစ်ကော်မရှင်တပ်၊ ပအိုဝ်းပြည်သူ့စစ် (PNO) နှင့် တော်လှန်ရေးတပ်တို့ကြား တိုက်ပွဲဖြစ်ပွားခဲ့ပြီးနောက် စစ်ဘေးရှောင်များသည် နီးစပ်ရာ စစ်ရှောင်စခန်းနှင့် ပင်လောင်း၊ တောင်ကြီး၊ အေးသာယာ ဘက်သို့ လာရောက်တိမ်းရှောင်နေကြရသည်။

စစ်ဘေးရှောင်များ နေထိုင်ရာ နေရာသည် အများအားဖြင့် ချုံနွယ်များ ထူထပ်ပြီး ရေမြောင်းများ ပိတ်ဆို့နေခြင်းကြောင့် ခြင်ပေါများကာ ခြင်ကိုက်ခံရပြီး ရာသီတုတ်ကွေးရောဂါနှင့် ဝမ်းပျက်ဝမ်းလျှော ရောဂါများ ဖြစ်ပွားနေကြကြောင်း စစ်ရှောင်များ ပြောပြချက်အရသိရသည်။

“ရှောင်လာတဲ့သူတွေတော့ ၁၀၀ နီးပါးလောက်ရှိမယ် မိုးရာသီဆိုတော့ ခြင်လည်း တအားပေါတယ်၊ ဝမ်းပျက် ဝမ်းလျှော ဖြစ်တာ တုတ်ကွေး ဖြစ်တာတွေ များတယ်၊ ကလေးနဲ့ ကိုယ်ဝန်ဆောင် မိခင်တွေ သက်ကြီးပိုင်းတွေ ဖြစ်တာ ပိုများတယ်၊ ဆေးကုတာတော့ အဖွဲ့အစည်းက လာကုပေးတယ် စားသောက်ဖို့တော့ ကူညီပေးတဲ့သူ မရသေးဘူး။”ဟု အေးသာယာရောက် စစ်ဘေးရှောင် အမျိုးသားတစ်ဦးက ပြောသည်။

အဆိုပါ စစ်ရှောင်များသည် စစ်ဘေးရှောင်တဲတွင် နေထိုင်သူနှင့် ငှားရမ်းနေထိုင်သူများလည်း ရှိပြီး စားနပ်ရိက္ခာအတွက် အကူညီများ ထောက်ပံ့ပေးစေလိုကြောင်း ၎င်းအမျိုးသားက ပြောသည်။

စစ်ဘေးရှောင်များသည် လက်ရှိ ပြောင်းရွှေ့လာခဲ့သည်မှာ လပိုင်းသာရှိပြီး နေ့စားလိုက်ရမည့်အလုပ်များ၊ နယ်မြေအခြေအနေများမသိရှိသေးသဖြင့် အလုပ်အကိုင်မရှိကြသေးကြောင်း ကလေးများလည်း ကျောင်းတက်ရန် ခက်ခဲနေသေးကြောင်း သိရဿည်။

“ ပြောင်းလာတာ မကြာသေးတော့ ဘာမှ မလုပ်ရသေးဘူး။ နေ့စားခေါ်မယ့်သူလည်းမရှိဘူး လာကူတဲ့သူလည်း မရှိတော့ စားဝတ်နေရေးခက်ခဲတယ်။ ဝင်ငွေမရှိ ထွက်ငွေပဲရှိတော့ အလုပ်လုပ်ချင်တယ်”ဟု တောင်ကြီးရောက် စစ်ဘေးရှောင် အမျိုးသမီးတစ်ဦးက ပြောသည်။

ထို့အပြင် ရပ်ကွက်လူကြီးအချို့နှင့် အုပ်ချုပ်ရေးမှူးများက စစ်ရှောင်များရောက်လာသည်ကို အခွင့်ကောင်းယူ၍ အိမ်ငှားခ ဈေးမြှင့်ခြင်း၊ ဧည့်စာရင်းကို နှစ်ပတ် တစ်ကြိမ်တိုင်စေပြီး ငွေကြေးကောက်ခံခြင်းများ ပြုလုပ်နေကြောင်း၎င်း အမျိုးသမီးတစ်ဦးက ပြောသည်။

ဆက်လက်ပြီး စစ်ဘေးရှောင်ရောက်လာသည်နှင့် အသက်ပြည့်ပြီးသူများ ပါလျှင် စစ်မှုထမ်းရန်အတွက် ရပ်ကွက်များက စာရင်းကောက်ခံနေကြောင်းလည်း စစ်ရှောင်များ ပြောပြချက်အရသိရသည်။

“ ဝင်ငွေက မရှိ အိမ်ငှားခလည်း စျေးတက်။ ဧည့်စာရင်းကလည်း တိုင်ရင် ပိုက်ဆံပေးရတယ်။နောက်တခုက စစ်ရှောင်တွေကို အသုံးချပြီး စစ်မှုထမ်းကောက်တာပဲ။ ကျမတို့လည်း ဘယ်လာချင်မှာလဲ။” ဟု စစ်ဘေးရှောင် အမျိုးသမီးက ပြောသည်။

ပြီးခဲ့သည့် ဇူလိုင်လတွင်လည်း တောင်ကြီးမြို့နယ်အတွင်း ကရင်နီပြည်ဘက်မှ လာရောက်စစ်ရှောင်သူများကို စစ်ကော်မရှင်တပ်က နေရပ်ပြန်ရန် အတင်းဖိအားပေးနေပြီး၊ မပြန်လာလျှင် အိမ်ခြံမြေများ သိမ်ဆည်း မည်ဟု ခြိမ်းခြောက်ပြောဆိုနေ၍ နေရပ် ပြန်ခဲ့သူများလည်း ရှိကြောင်း သိရသည်။