သျှမ်းပြည် ပင်လောင်းမြို့နယ်တွင် စစ်ဘေးရှောင်များအား ရောက်ရာအရပ်မှ ပြန်လာခိုင်းပြီး မဲထည့်ခိုင်းကာ မဲမထည့်ပါက နောင်တွင် ရွာထဲ၌နေခွင့်မပြုဟုဆိုကာ ရွာသူကြီးများက ဖိအားပေးနေကြောင်း ဒေသခံများက ပြောသည်။
ယနေ့ ဇန်နဝါရီလ ၂၅ ရက် နံနက်ပိုင်းမှစတင်၍ ပင်လောင်းမြို့ပေါ် ရပ်ကွက်နှင့် ကျေးရွာအုပ်စု အသီးသီးရှိ မဲရုံများတွင် ရွေးကောက်ပွဲ အပိုင်း (၃) ကို ကျင်းပလျက်ရှိရာ မဲပေးသူ နည်းပါးနေ၍ ထိုကဲ့သို့ ဖိအားပေးကာ မဲထည့်ခိုင်းနေကြောင်း ပင်လောင်းမြို့ခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“တချို့စစ်ဘေးရှောင်တွေရင် တောင်ကြီးမှာ ရှောင်နေပေမယ့် ဆောင်းပြောင်းထိ မဲပြန်လာထည့်ခိုင်းတယ်။ ရွာမှာပြန်နေချင်ရင် မဲလာထည့်လို့ ရွာလူကြီးက ပြောနေကြတယ်။ PNO အားကောင်းတဲ့ ဒေသဖြစ်နေတော့ PNO ရှုံးမှာကို ကြောက်နေလားမသိဘူး။ ပင်လောင်းမှာ သကြားမင်း လာပြိုင်ရင်လည်း PNO ကို ရှုံးပြီးသားပါ” ဟု ၎င်းက ပြောသည်။
ပင်လောင်းမြို့နယ်တွင် မဲရုံ (၁၄၀) ရုံရှိပြီး မဲဆန္ဒရှင်ပြည်သူ (၁၃၈,၃၄၉) ဦးရှိကြောင်း ရွေးကောက်ပွဲကော်မရှင်အဖွဲ့ခွဲထံမှ သိရသည်။
သို့သော် ပင်လောင်းမြို့နယ်အတွင်းရှိ စစ်ဘေးရှောင် ဦးရေ ၈,၀၀၀ ခန့်သည် ဆောင်းပြောင်းကျေးရွာအုပ်စုရှိ မဲရုံသို့ မဲသွားထည့်ရကြောင်း ဒေသခံများ၏ ပြောပြချက်အရ သိရသည်။
“ပင်လောင်းဘက်က စစ်ဘေးရှောင်တွေကတော့ ဆောင်းပြောင်းဘက်မှာ မဲသွားပေးရတယ်။ အခုမဲပေးသူ သိပ်မရှိလို့လားမသိဘူး၊ ရပ်ကွက်ထဲမှာ မဲပေးထို့ ဆော်သြနေသေးတယ်” ဟု အထက်ပါ အမျိုးသားတစ်ဦးက ထပ်လောင်းပြောသည်။
ရွေးကောက်ပွဲ အပိုင်း (၃) ကို သျှမ်းပြည်တောင်းပိုင်းရှိ ပင်လောင်း၊ ညောင်ရွှေ၊ ဖယ်ခုံ၊ မိုးနဲနှင့် ကျေးသီး အပါအဝင် သျှမ်းပြည်မှ ၉ မြို့နယ်တွင် ယနေ့ ဇန်နဝါရီလ ၂၅ ရက် နံနက်မှစတင်၍ ကျင်းပနေသည်။
Leave a Comments