သျှမ်းပြည်တောင်ပိုင်း ရွာငံမြို့နယ်တွင် စစ်ကော်မရှင်တပ်နှင့် တော်လှန်ရေး တပ်ပေါင်းစုတို့ ထိတွေ့တိုက်ပွဲဖြစ်လျှင် ပြည်သူများ အခြေအနေ ကြည့်ပြီး ဘေးလွတ်ရာသို့ ရှောင်တိမ်းသွားကြရန် ဓနုဒေသအခြေစိုက် (၁၀၀၃) တပ်ရင်းမှ ယနေ့ (ဖေဖော်ဝါရီလ ၂၇) ရက်စွဲဖြင့် ထုတ်ပြန်လာသည်။

ပြီးခဲ့သည့် ဖေဖော်ဝါရီလ (၁၇)ရက်တွင် ရွာငံမြို့နယ်အတွင်း ဖြစ်ပွားခဲ့သော တိုက်ပွဲအတွင်း ပြည်သူများ၏ ကားတစ်စီး ဝင်ရောက်လာခဲ့ရာ တော်လှန်ရေးတပ်ပေါင်းစုဘက်မှ တိုက်ပွဲနောက်ဆုတ်ခဲ့ရပြီး စစ်ကော်မရှင်တပ်ဘက်မှ တပ်သား(၅)ဦး ထွက်ပြေးလွတ်မြောက် သွားသောကြောင့် ပြည်သူများ အခြေအနေကြည့် ရှောင်တိမ်းရန် အသိပေးထားသည်။

“တိုက်ပွဲဖြစ်တော့ ပြည်သူတွေရဲ့ ကားတစ်စီးက ဝင်လာတာ၊ ကျနော်တို့လည်း ပြည်သူကို ထိခိုက်မှာစိုးလို့ နောက်ဆုတ်ပေးခဲ့ရတာ စစ်သားတွေ လွတ်သွားတယ်။ ပြည်သူတွေက အခြေအနေ ကြည့်တတ်ဖို့လည်း လိုတယ်၊ တိုက်ပွဲက ကြိုတင်စီစဉ်ပြီး အစီအစဉ်တကျ သွားရတော့ ဒီလို ပြည်သူ့ကား၊ ဆိုင်ကယ်တွေ ဝင်လာရင် စစ်ရေးရည်မှန်းချက် ပြည့်အောင် မလုပ်ဆောင်နိုင်ဘူး”ဟု ၁၀၀၃ တပ်ရင်းမှ တာဝန်ရှိသူ တစ်ဦးက သျှမ်းသံတော်ဆင့်ကို ပြောသည်။

ထို့ကြောင့် ပြည်သူများအနေဖြင့် တိုက်ပွဲဖြစ်ပေါ်နေသည့် အခြေအနေ၊ တိုက်ပွဲဇုံများတွင် သတိဝီရိယဖြင့် သွားလာပြီး ဘေးလွတ်ရာသို့ ရှောင်တိမ်းခြင်း၊ စစ်ကော်မရှင်တပ်နှင့် ၎င်းလက်အောက်ခံ ပျူစောထီးအဖွဲ့များနှင့်လည်း ဝေးဝေးနေပေးကြရန် အသိပေးထားသည်။

ထို့အပြင် ဖေဖော်ဝါရီလ (၁၈)ရက်တွင်လည်း ရွာငံမြို့နယ် ကျောက်ငှက်-အုတ်တွင်းကျေးရွာ လမ်းပိုင်းတွင် ကင်းလှည့်နေသော စစ်ကော်မရှင်တပ် စစ်ကြောင်းကို ကြားဖြတ် တိုက်ခိုက်ခဲ့ပြီး စစ်ကော်မရှင်တပ်မှ ဗိုလ်(၁)ဦးအပါဝင် (၁၀)ဦးခန့် သေဆုံးပြီး ထိခိုက်ဒဏ်ရာရရှိသူများလည်း ရှိကြောင်း အဆိုပါ ထုတ်ပြန်ချက်တွင် ထည့်သွင်းထားသည်။

အဆိုပါ တိုက်ပွဲအတွင်း စစ်ကော်မရှင်တပ်ထံမှ လက်နက် (၅)လက်၊ ကျည် (၆၀၀) ၊ အီနာဂါ(၁)လုံးနှင့် ဆက်သွယ်ရေးစက်ကြီး (၁)လုံး ၊ ကျည်ဘောက်(၁၁)ဘောက် သိမ်းဆည်း ရရှိခဲ့သည်ဟု သိရသည်။

“ကျနော်တို့က တိုက်ပွဲကို ခြေသံလုံလုံနဲ့ ဖော်ဆောင်နေတယ် ဆိုတာကိုလည်း သိထားစေချင်တယ်။ ဖော်ဆောင်ခဲ့တဲ့ တိုက်ပွဲတိုင်းမှာ‌တော့ ကျနော်တို့ဘက်က ထိခိုက်သူ အနည်းငယ်ပဲ ရှိခဲ့ပါတယ်”ဟု ၁၀၀၃ တပ်ရင်းမှ တာဝန်ရှိသူ တစ်ဦးက ထပ်လောင်းပြောသည်။

ပြီးခဲ့သည့် ဖေဖော်ဝါရီလ (၈)ရက်နေ့တွင် ရွာငံမြို့နယ် မျှားကလေးကျေးရွာဘက်သို့ စစ်ကြောင်းထိုးလာသော ရန်သူ့စစ်ကြောင်းအား ကြားဖြတ်မိုင်းဆွဲ တိုက်ခိုက်ခဲ့ပြီး ထိုတိုက်ခိုက်မှုအတွင်း လက်နက် (၂)လက် သိမ်းဆည်းရမိခဲ့ကြောင်း (၁၀၀၃) တပ်ရင်း ထုတ်ပြန်ချက်အရ သိရသည်