သျှမ်းပြည်မြောက်ပိုင်း သီပေါမြို့နယ်အတွင်းရှိ စစ်ဘေးရှောင်လူထု ၂၀၀ ကျော်မှာ ယနေ့မနက်ပိုင်း နေရပ်သို့ ပြန်သွားကြပြီဖြစ်ကြောင်းသိရသည်။

ဒီဇင်ဘာလ ၁၉ ရက်နေ့မနက်ပိုင်း စစ်ရေးတင်းမာနေမှုများ လျော့သွားပြီဖြစ်သည့်အပြင် လယ်ယာသီးနှံများမဆွတ်ရသေးသဖြင့် နမ့်ယန်းအုပ်စု နောင်ကော့ ဘုန်းကြီးကျောင်းသို့ရောက်ရှိနေသည့် ဒေသခံများ နေရပ်သို့ပြန်ကုန်ဖြစ်ကြောင်း ခိုင်းဟျိုးရွာ စစ်ဘေးရှောင်ဒေသခံတဦးကပြောသည်။

အခြေအနေကတော့ စိတ်အေးရပြီလားဆိုရင်တော့ မအေးရသေးပါဘူး ။ စစ်ရေးတင်းမာနေတာတော့ လျော့တော့လျော့သွားတယ်။ RCSS/SSA ကလည်း နမ္မတူမြစ်အနောက်ဘက်ခြမ်းကို ဆုတ်ခွါတိမ်းရှောင်သွားပြီလို့ကြားရတယ်။ ကျန်တဖွဲ့ကလည်း ဆုတ်သွားပြီလို့ကြားတယ်။ သူတို့ဆုတ်တဲ့အချိန်မှာဆို သီးနှံတွေအမြန်ပြန်ဆွတ်ရမယ်လေ- ဟု စစ်ဘေးရှောင်ရာမှ နေရပ်ပြန်ရန်စီစဉ်နေတဲ့ ခိုင်းဟျိုးရွာသားတဦးက သျှမ်းသံတော်ဆင့်အားပြောသည်။

ဒီဇင်ဘာလ ၁၇ ရက်ညပိုင်းက လက်နက်ကိုင်တပ်ဖွဲ့  ၂ ဖွဲ့ကြား စစ်ရေးတင်းမာမှုများကြောင့် သီပေါမြို့နယ် ကွန်းဆော့အုပ်စုဝင် ခိုင်းဟျိုးရွာနှင့် ပန်ဟိုက်ရွာသား ၅၀၀ ကျော်မှာ နောင်ကော့ရွာဘုန်းကြီးကျောင်းသို့လည်းကောင်း ဆွေမျိုးများနေအိမ်သို့လည်းကောင်းညတွင်းချင်း ထွက်ပြေးခိုလှုံခဲ့ကြရသည်။

ဒီဇင်ဘာလ ၁၈ ရက်က အမျိုးသားများမှာ ရွာပြန်လယ်ယာလုပ်ငန်းခွင်ဝင်ခဲ့ပြီး ကျန်ရှိ အမျိုးသမီးနှင့် ကလေးများ သက်ကြီးရွယ်အိုများ စစ်ဘေးရှောင် ၂၀၀ ကျော်မှာမူ ဒီဇင်ဘာလ ၁၉ ရက်မနက်ပိုင်းတွင် နေရပ်သို့ပြန်ကုန်ကြပြီဖြစ်ကြောင်း သိရပါသည်။