သျှမ်းပြည် တောင်ပိုင်း တိုက်ပွဲ ၃လ အတွင်း စစ်ကောင်စီမှ လက်နက်ကြီး၊ လေကြောင်း ပစ်ခတ်တိုက်ခိုက်မှုကြောင့် ကလေးငယ် အပါအဝင် သေဆုံးမှု ၆၆ ဦးထိ ရှိနေပြီး၊ ထိခိုက် ဒဏ်ရာရရှိသူ ၇၉ ဦးထိ ရှိခဲ့ကြောင်း ပအိုဝ်းလူငယ်အစည်းအရုံး (PYO) မှ ထုတ်ပြန် ထားသည်။
ထိုသေဆုံးသွားသည့် သူများနှင့် ထိခိုက်ဒဏ်ရာရရှိသူများသည် သျှမ်းပြည် တောင်ပိုင်း ဆီဆိုင်၊ညောင်ရွှေ၊ဟိုပုံး နှင့် ပင်လောင်း မြို့မှ အရပ်သားများဖြစ်ကြောင်း သိရသည်။
သျှမ်းပြည် တောင်ပိုင်း ၃ လ အတွင်း တိုက်ပွဲဖြစ်ပွားချိန်မှစ၍ စစ်ကောင်စီမှ လက်နက်ကြီး ပစ်ခတ်မှု ၂၉၀၀ ကြိမ်နှင့် အထက် ပစ်ခတ်ခဲ့ပြီး လေကြောင်း မှ ဗုံးကြဲတိုက်ခိုက်မှု ၄၆၀ နှင့် အထက်ပစ်ခတ်တိုက်ခိုက်မှုကြောင့် ပြည်သူ များ ထိခိုက် သေဆုံးမှုများ နှင့် အဆောက်အအုံထိခိုက်ပျက်စီးမှု ၆၀၀ ကျော်ရှိခဲ့သည်။
ထို့အတူ တိုက်ပွဲများကြောင့် ဆီဆိုင်မြို့နယ်ရှိ ဒေသခံများ စစ်ဘေးရှောင်နေသူ ငါးသောင်းနှစ်ထောင်ကျော်၊ ပင်လောင်းမြို့နယ်တွင် တစ်သောင်းခွဲ ၊ ဟိုပုံးမြို့နယ်တွင် တစ်ထောင် နှင့် ညောင်ရွှေမြို့နယ်တွင် နှစ်ထောင်တစ်ရာကျော် စုစုပေါင်း ၇၁၁၅၀ ကျော်အထိရှိလာကြောင်း PYO ထုတ်ပြန်ချက်တွင်ရေးသားထားသည်။
“အဲ့ ၇သောင်းကျော်ထဲမှာတော့ ကရင်နီကဟာတွေကတော့ ၂သောင်းကျော်လောက်ပါတယ်။အကုန်လုံးကတော့ ကမ့်တွေနဲ့ နေတာမျိုးမဟုတ်ဘူး။ဘာသာရေးအဆောက်အဦးတွေ၊ဆွေမျိုးအိမ်တွေနဲ့ တောတွေထဲမှာပဲ နေကြတာတွေ များတာပေါ့။ ကျောက်ဆောင်တို့ ဂူတွေထဲမှာပဲသည်းထိုးပြီး နေနေရတာပေါ့။ အမိုးအကာတွေ လိုနေတဲ့ ဟာတွေတောင် အများကြီး ကျန်သေးတယ်။ ”ဟု ပအိုဝ်းလူငယ်အစည်းအရုံး တာဝန်ရှိသူတစ်ဦးက ပြောသည်။
ထိုစစ်ဘေးရှောင်များသည် ဟိုပုံးမြို့နယ်၊ တောင်ကြီးမြို့နယ်၊ ညောင်ရွှေမြို့နယ်နှင့် တောတောင်အတွင်း ထွက်ပြေး ခိုလှုံနေရပြီး တောထဲနှင့် ဂူများတွင်ထွက်ပြေးတိမ်းရှောင်နေကြရကာ အကူညီရရန်အတွက် အခက်အခဲများ ကြုံတွေ့ နေရကြောင်း သိရသည်။
“တောတောင်တွေထဲမှာရှိတဲ့ဟာတွေ ကျတော့ မပို့ပေးနိုင်တာတွေရှိတယ်။ တောင်ကြီးထိ တက်ယူလည်း စစ်ဆေးရေးဂိတ်တွေက အရမ်းတင်းကြပ်တော့ အဆင်မပြေတာတွေရှိတယ်။အခုတော့ သူတို့ပါလာတာလောက်နဲ့ ရှေ့ဆက်နေကြရတာပေါ့။လာမယ့် ရာသီတွေ အတွက်တော့ စားနပ်ရိက္ခာတွေက စိုးရိမ်နေရတာပေါ့။”ဟု ပအိုဝ်းလူငယ်အစည်းအရုံး တာဝန်ရှိသူတစ်ဦးက ပြောသည်။
အဆိုပါ စစ်ကောင်စီ၏ လက်နက်ကြီး၊ လေကြောင်းတိုက်ခိုက်မှုများကြောင့် ဒေသခံနေအိမ် ၅၆၂ လုံး ပျက်စီးသွားပြီး ဘာသာရေးအဆောက်အအုံ ၂၅ ဦး၊ စာသင်ကျောင်း ၁၂ လုံး၊လမ်းတံတား ၂ စင်း၊ဆေးရုံ/ဆေးခန်း ၄ လုံးနှင့် ဈေး ၁ ခု ပျက်စီးသွားခဲ့ပြီ စုစုပေါင်း ထိခိုက်ပျက်စီးမှု ၆၀၆ ထိရှိနေကြောင်း ထုတ်ပြန်ချက်၌ ရေးသားဖော်ပြထားသည်။
ဟိုပုံးမြို့နယ် စံဖူးကျေးရွာတွင် ဖြစ်ပွားခဲ့သည့် PNLA ၏ ယာဉ်တန်းကို စစ်ကောင်စီနှင့်လက်အောက်ခံ ပအိုဝ်းပြည်သူ့စစ် PNO အဖွဲ့တို့က ပစ်ဆို့ဟန်းတား စစ်ဆေးမှုကြောင့် (ဇန်နဝါရီလ ၂၁ ရက်)တွင် နှစ်ဖက်တပ်ဖွဲ့ကြား တိုက်ပွဲစတင် ဖြစ်ပွားခဲ့ခြင်းဖြစ်သည်။
