သျှမ်းပြည် လားရှိုးမြို့ရှိ လေယာဉ်ကွင်းကို အဆင့်မြှင့်တင်ပြီးပါက ဂျက်လေယာဉ်များ ဆင်းသက်နိုင်သည်အထိ ပြေးလမ်းရှိမည်ဖြစ်ကြောင်း စုံစမ်းသိရသည်။
ပြီးခဲ့သည့် ၂၀၂၃ ခုနှစ် ဧပြီလမှ စတင်၍ စစ်ခေါင်းဆောင် မင်းအောင်လှိုင် အမိန့်ဖြင့် လားရှိုးလေဆိပ်ရှိ လေယာဉ်ပြေးလမ်း အကျယ်ကို ၁၀၀ ပေ မှ ၁၅၀ ပေ အထိ တိုးချဲ့သည်။
ထို့နောက် တိုက်ခိုက်ရေး ဂျက်လေယာဉ်များ ဆင်းသက်နိုင်ရန် အဆင့်မြှင့်တင်ရေး လုပ်ငန်းများကို စစ်အင်ဂျင်နီယာတပ်မှ အရှိန်တင် လုပ်ဆောင်လျက်ရှိရာ မကြာခင် ပြီးစီးတော့မည်ကြောင်း လားရှိုးဒေသခံများက ပြောသည်။
“လားရှိုးလေဆိပ်ကို ဂျက်ဖိုက်တာတွေ ဆင်းနိုင်ဖို့ စစ်ခေါင်းဆောင်အမိန့်နဲ့ အဆင့်မြှင့်လာတာ။ အခု လေယာဉ်ကွင်းကို အမြန် အပြီးသတ်ပြီး စစ်ရေး ပြန်စတော့မယ် ပြောတယ်။ တောင်ကြောတွေမှာ မဟာမိတ်တွေလည်း နေရာယူထားတော့ လေယာဉ် အတက်အဆင်းလုပ်ဖို့ ခက်ဦးမယ်။ စစ်ရဟတ်ယာဉ်နဲ့ လားရှိုးကို အင်အားဖြည့်နေတာတော့ ရှိတယ်”ဟု လားရှိုးမြို့မှ စစ်ရေးသတင်းရင်းမြစ်တစ်ဦးက သျှမ်းသံတော်ဆင့်ကို ပြောသည်။
လားရှိုးလေဆိပ်အနီးတွင် စစ်ကောင်စီတပ် ခလရ-၆၈ နှင့် အရှေ့မြောက်တိုင်း စစ်ဌာနချုပ် ရမခ တို့ ဝိုင်းရံတည်ရှိပြီး “၁၀၂၇ စစ်ဆင်ရေး”အတွင်းက ညီနောင်မဟာမိတ်တပ်များ၏ ဒရုန်းဖြင့် အနီးကပ် ထောက်လှမ်း၍ ဗုံးကြဲခြိမ်းခြောက်မှုများအထိ ခံခဲ့ရကြောင်း စစ်ရေးသတင်းရင်းမြစ်ထံမှ သိရသည်။
“အခုက လောက်ကိုင်ကို လက်လွတ်ပြီး ကိုးကန့်ဒေသပဲ အလွတ်ထားမှာ။ သိန္နီ၊ ကွမ်းလုံ ဒီဟာတွေကို ပြန်ပြီး အထိုင်ချဖို့ လေကြောင်းအားကိုးနဲ့ ပြန်ဖောက်တာမျိုး ဖြစ်နိုင်တယ်။ ဒါကြောင့် လေယာဉ်ကွင်းကို အမြန် အပြီးသတ်ဖို့ လုပ်နေတာ။ ခရီးသွား လေကြောင်းလိုင်းတွေ ပေးဆင်းမလား မသေချာသေးဘူး”ဟု လားရှိုးမြို့မှ ၎င်းစစ်ရေးသတင်းရင်းမြစ်က သျှမ်းသံတော်ဆင့်ကို ဆက်ပြောသည်။
လားရှိုးလေဆိပ်မှ လေယာဉ်ခရီးစဉ်များ ပျံသန်းပြေးဆွဲခြင်းကို “၁၀၂၇ စစ်ဆင်ရေး”စတင်သည့် ၂၀၂၃ အောက်တိုဘာလ နောက်ဆုံးပတ်မှ ပိတ်ထားခဲ့ပြီး လက်ရှိအချိန်ထိ လေယာဉ်ခရီးစဉ်များ မစတင်နိုင်သေးဘဲ မန္တလေး-လားရှိုး လမ်းမကြီးပေါ်ရှိ တံတားများလည်း ဖျက်ဆီးခံထားရခြင်းကြောင့် လမ်းပန်းဆက်သွယ်ရေး အခက်အခဲ ကြုံတွေ့နေရကြောင်း ဒေသခံများထံမှ သိရသည်။
လားရှိုးလေဆိပ်သည် သျှမ်းပြည်မြောက်ပိုင်းရှိ တစ်ခုတည်းသော လေဆိပ်ဖြစ်ပြီး တိုက်ခိုက်ရေး ဂျက်လေယာဉ်များ ဆင်းသက်နိုင်ပါက လေကြောင်းတိုက်ခိုက်မှု အန္တရာယ် စိုးရိမ်ရကြောင်း လားရှိုးဒေသခံများက ပြောသည်။
စစ်ကောင်စီနှင့် ညီနောင်မဟာမိတ် ၃ ဖွဲ့တို့သည့် တရုတ်နိုင်ငံ၏ စီစဉ်ပေးမှုဖြင့် ဖေဖော်ဝါရီလ ၂၉ ရက်မှ မတ်လ ၁ ရက်အထိ ကူမင်းမြို့၌ စတုတ္ထအကြိမ် တွေ့ဆုံဆွေးနွေးခဲ့ပြီး တရုတ်-မြန်မာ ကုန်သွယ်ရေးလမ်းကြောင်းများ ပြန်လည်ဖွင့်လှစ်နိုင်ရေး၊ နယ်စပ်တည်ငြိမ်ရေးနှင့် သျှမ်းမြောက်ဒေသ စစ်ဘေးဒဏ်မှ ပြန်လည်ထူထောင်နိုင်ရေးတို့ကို ကတိပြုခဲ့ကြသည်ဟု ဆိုသည်။
“ဟိုင်ဂင် သဘောတူညီချက်”အရ သျှမ်းမြောက်တွင် ပစ်ခတ်တိုက်ခတ်မှုများ ရပ်စဲသွားရမည် ဖြစ်သော်လည်း စတုတ္ထအကြိမ် တွေ့ဆုံဆွေးနွေးပွဲပြီးနောက် စစ်ကောင်စီက TNLA တပ်ဖွဲ့ ထိန်းချုပ်ထားနိုင်သည့် မြို့များထဲမှ နမ္မတူ၊ နမ့်ဆန်နှင့် မန်တုံမြို့နယ်တို့ကို မတ်လ ၄ ရက်တွင် မာရှယ်လော ကြေညာခဲ့သည်။
TNLA တပ်ဖွဲ့က ထိန်းချုပ်ထားပြီး အုပ်ချုပ်ရေးလုပ်ငန်း အကောင်အထည် ဖော်နေသည့် ၎င်းမြို့များကို စစ်ကောင်စီက မာရှယ်လော ကြေညာလိုက်ခြင်းကြောင့် “ဟိုင်ဂင် အပစ်အခတ် ရပ်စဲရေး သဘောတူညီချက်”အား လက်တွေ့အကောင်အထည် ဖော်ဆောင်ရာတွင် အခက်အခဲ ဖြစ်စေနိုင်ကြောင်း ညီနောင်မဟာမိတ် ၃ ဖွဲ့က မတ်လ ၆ ရက်တွင် တုံ့ပြန်ထားသည်။
