သျှမ်းပြည် တောင်ပိုင်း တောင်ကြီးမြို့ ၊ညောင်ဖြူစခန်းရပ်ကွက်မှ လူငယ်၇ဦးသည် အင်းလေး ၊စံကား သွားလည်စဉ် အပြန်ချိန် ညောင်ရွှေဂိတ်တွင် ဖမ်းဆီးခံရပြီး ယခုအချိန်ထိ မိသားစုဝင်များနှင့် တွေ့ခွင့်မရသေးကြောင်း စုံစမ်းသိရသည်။
ဧပြီလ ၂၃ရက် တွင် အဆိုပါ လူငယ် ၇ဦးသည် ဖမ်းဆီးခံရပြီးနောက် တောင်ကြီးမြို့ စူဠာမုနိ ဘုရားအောင်ဖက် စစ်ဖက်ရေးရာ လုံခြုံရေးတပ်ဖွဲ့ (စရဖ)ရုံးတွင် ထိန်းသိမ်း စစ်ဆေးမှုပြုလုပ်ခဲ့ကြောင်း သိရသည်။
“အဖမ်းခံရပြီဆိုပြီး မိသားစုဝင်တွေကို သူတို့က ဖုန်းဆက် အကြောင်းကြားလာတယ်။ မိသားစုတွေ သွားတွေ့တော့ ရဲတွေ စစ်သားတွေက ပေးမတွေ့ဘူး။ခုထိအမှုမစွဲသေးဘူး”ဟု နီးစပ်သူ တစ်ဦးက သျှမ်းသံတော်ဆင့်ကိုပြောသည်။ ။
ဖမ်းခံရသူများသည် အမျိုးသား၆ဦး အမျိုးသမီး ၁ဦး စုစုပေါင်း၇ဦးဖြစ်ပြီး ပါလာသော ဆိုင်ကယ်၊ဖုန်း ၊ပိုက်ဆံများကိုလည်း စစ်တပ်နှင့်ရဲများက ယူသွားခဲ့ကြောင်းသိရသည်။
“သူတို့လူငယ်တွေ ဖြစ်တယ်။နှိပ်စက်ခံရမှာ စိုးရိမ်ရတယ်။ မိန်းခလေး ငယ်လေး တစ်ယောက်လည်း ပါတော့ ပိုစိတ်ပူရတယ်”ဟု ၎င်းကဆက်ပြောသည်။
ပြီးခဲ့သည့် ဖေဖော်ဝါရီလ၂ရက်တွင်လည်း ရွာငံမြို့နယ်ရှိ ရေပြာအိုင်သို့ အလည်သွားသည့် တောင်ကြီးမြို့ ခံ လူငယ် ၁၁ဦးသည်လည်း ပြန်လာချိန် ပင်းတယမြို့ကျုံးဂိတ်တွင် စစ်ကောင်စီဖမ်းဆီးခြင်းခံခဲ့ရပြီး ယင်းလူငယ်များလည်း ယနေ့ထိ ပြန်လည်လွှတ်မြှောက်ခြင်းမရှိသေးကြောင်း သိရသည်။
