သျှမ်းပြည်နယ် တောင်ပိုင်း၊ ညောင်ရွှေမြို့ အခြေစိုက် ခလရ (၉၄) တပ်ရင်းမှူး ဒုဗိုလ်မှူးကြီး-ဗိုလ်မှူးသန့်ဇော်ဝင်း ဒေါနတောင် တိုက်ပွဲ၌ သေဆုံးသွားကြောင်း စစ်ရေးသတင်းရင်းမြစ်က ယနေ့ (မေလ ၅ ရက်) တွင် အတည်ပြု ပြောသည်။

ကရင်ပြည်နယ်၊ မြ၀တီမြို့သို့ ဦးတည်နေသည့် စစ်ကောင်စီ စစ်ကြောင်းကို KNLA တပ်ပေါင်းစုက ဒေါနတောင်ပေါ်တွင် ဆက်တိုက် တိုက်ခိုက်နေရာ ခလရ (၉၄) မှ ယာယီတပ်ရင်းမှူး ဗိုလ်မှူးသန့်ဇော်ဝင်း ဒဏ်ရာရရှိခဲ့ပြီးနောက် ပြီးခဲ့သည့် မေလ ၂ ရက်နေ့က သေဆုံးခဲ့ခြင်းဖြစ်ကြောင်း ၎င်းကဆိုသည်။

“သူက ယာယီ တပ်ရင်းမှူး ဆိုပေမယ့် နည်းဗျူဟာမှူး အနေနဲ့ တွဲကိုင်ထားပါတယ်။ ခလရ (၉၄) က ကလော အခြေစိုက် တပ်မ (၅၅) လက်အောက်ခံတပ်ပါ။ တပ်မ (၅၅) နဲ့ လက်အောက်ခံတပ်တွေ ကရင်နီနဲ့ ရခိုင်မှာ အကျများထားပါတယ်” ဟု စစ်ရေးသတင်းရင်းမြစ်က ရှင်းပြသည်။

ခလရ (၉၄) တပ်ရင်းမှူး ဗိုလ်မှူးသန့်ဇော်ဝင်း သည် စစ်တက္ကသိုလ် (DSA) အပတ်စဉ် (၄၆) ကျောင်းဆင်းဖြစ်ပြီး ဒေါနတောင်ပေါ် ချီတက်စဉ် သေဆုံးခဲ့ကြောင်း၊ မော်လမြိုင်မြို့ အခြေစိုက် အရှေ့တောင်တိုင်း စစ်ဌာနချုပ်တွင် သင်္ဂြိုဟ်မည် ဖြစ်ကြောင်း ဦးဇော်ဝင်း ဆိုသူက ၎င်း၏ လူမှုကွန်ရက်တွင် ရေးသားဖော်ပြထားသည်။

ဦးဇော်ဝင်း ဆိုသူသည် ယခင် သမ္မတဦးသိန်းစိန်နှင့် သမ္မတဦးထင်ကျော် လက်ထက်မှသည် ယနေ့တိုင် မြန်မာနိုင်ငံသား ဦးရန်နိုင်ထွန်း ဆိုသူ အဂ်လန်နိုင်ငံ အခြေစိုက် ဘာကလေဘဏ်တွင် အပ်နှံထားသည့် ဒေါ်လာ ၄၅ ဘီလီယံနှင့် မြန်မာအစိုးရက ဆွစ်စလန်ဘဏ်တွင် အပ်နှံထားသည့် ရွှေတန်ချိန် ၈၀၀ ပြန်လည် ထုတ်ယူနိုင်ရေး အစိုးရ အကြီးအကဲများကို စာပို့တောင်းဆိုလေ့ရှိကြောင်း ၎င်းနှင့် တွေ့ဆုံဖူးသူ တစ်ဦးက ဆိုသည်။

“NLD လက်ထက်က နေပြည်တော်မှာ တွေ့ဖူးတယ်။ ဒေါ်လာ ၄၅ ဘီလီယံနဲ့ ရွှေတန်ချိန် ၈၀၀ ထုတ်ပြီးရင် နိုင်ငံတော်ကို လှူမယ်ပေါ့ဗျာ။ နိုင်ငံတော်က ကူညီပေးပါပေါ့။ အဲကိစ္စ မှန်တာမှားတာကတော့ ဒီအချိန်မှာ မပြောချင်ဘူး။ သူ့မှာ သားသမီးရှိမရှိဆိုတာ သေချာမသိဘူး။ တခါပဲ ဆုံဖူးတာပါ” ဟု ၎င်းကရှင်းပြသည်။

ယင်းကိစ္စများအား ဦးဇော်ဝင်း ၏ လူမှုကွန်ရက်၌ ယနေ့တိုင် ပြန်လည် ဖော်ပြနေသည်ကို တွေ့ရသည်။

သျှမ်းတောင်၊ ကလောမြို့ အခြေစိုက် တိုက်ခိုက်ရေး တပ်မ (၅၅) နှင့် လက်အောက်ခံ တပ်ရင်းများ ကရင်နီပြည်နှင့် ရခိုင် စစ်မျက်နှာများတွင် အင်အားရာနှင့်ချီ သေဆုံးထားကာ အင်အား လျှော့နည်းနေပြီး ယခု အောင်ဇေယျ စစ်ဆင်ရေးဟု ဆိုကာ မြဝတီမြို့သို့ ဦးတည် ချီတက်စဥ် ထပ်မံ၍ အကျအဆုံးများနှင့် ကြုံတွေ့နေရခြင်း ဖြစ်သည်။