အပစ်အခတ် ရပ်စဲထားသည့် သျှမ်းပြည်နယ် မြောက်ပိုင်း၌ စစ်ကောင်စီတပ်က ထိုးစစ်ဆင်ရန် ပြင်ဆင်နေသကဲ့သို့ မြောက်ပိုင်းညီနောင် မဟာမိတ်တပ်များ အပါအဝင် ဒေသတွင်း လှုပ်ရှားနေသည့် တိုင်းရင်းသား တော်လှန်ရေးတပ်များ အပြိုင်အဆိုင် စစ်ပြင်ဆင်နေကြသည်ဟု စစ်ရေးသတင်းရင်းမြစ်က ယနေ့ (မတ်လ ၇ ရက်နေ့) တွင် ပြောသည်။
ပြီးခဲ့သည့် ဇန်နဝါရီလ ၁၂ ရက်နေ့က တရုတ်နိုင်ငံ၊ ကူမင်းမြို့၌ ပြုလုပ်ခဲ့သည့် စစ်ကောင်စီနှင့် ညီနောင်မဟာမိတ် တို့၏ ဟိုင်ဂန် သဘောတူညီချက်အရ ညီနောင်တပ်များ ထိုးစစ်မပြုလုပ်ရန်၊ စစ်ကောင်စီတပ်က လေကြောင်း တိုက်ခိုက်မှုနှင့် လက်နက်ကြီး ပစ်ခတ်မှု မပြုရန် သဘောတူပြီး အပစ်အခတ် ရပ်စဲကြောင်း ထုတ်ပြန်ခဲ့သည်။
“အပစ်ရပ်ပြီးတာနဲ့ စစ်ကာင်စီက လားရှိုးကို လေကြောင်းကနေ တောက်လျှောက် အင်အားဖြည့်နေတာ အခုအထိပဲ။ လားရှိုးကို အခြေခံပြီး ခံစစ်ပြင်နေတာ။ အခုမတ်လ ပထမအပတ်ကစပြီး တပ်တွေ စဖြန့်နေပြီ။ သေချာတာကတော့ စစ်ကောင်စီတပ်က အင်အားထောင်ချီ တပ်ဖြန့်နိုင်တဲ့ အနေအထားတော့ ရှိနေပြီ” စစ်ရေးသတင်းရင်းမြစ်က ရှင်းပြသည်။
ဖေဖော်ဝါရီ ၂၉ မှ မတ်လ ၁ ရက်နေ့ အထိ ကူမင်းမြို့၌ ပြုလုပ်သည့် ၂ ရက်ကြာ ဟိုင်ဂန် နောက်ဆက်တွဲ ဆွေးနွေးပွဲတွင် တရုတ် ကိုယ်စားလှယ်အဖွဲ့က နယ်စပ်ကုန်သွယ်ရး အမြန်ပြန်ဖွင့်ရန် ဖိအားပေးခဲ့ရာ စစ်ကောင်စီ အနေဖြင့် စစ်ရေးနှင့် ကုန်သွယ်ရေးအရ အရေးပါသည့် သိန္နီဒေသ ပြန်လည်ရရှိရေး စစ်ရေး လှုပ်ရှားမှုများ ပြုလုပ်လာခြင်း ဖြစ်သည်ဟု ၄င်းကသုံးသပ်သည်။
“အခုရက်ပိုင်း စစ်ကောင်စီက ကျောက်မဲကနေ တောက်လျှောက် တပ်ဖြန့်နေတယ်လို့ သတင်းရပါတယ်။ ရနိုင်သမျှ ဆွဲထုတ်ထားတဲ့တပ်တွေနဲ့ စစ်မှုထမ်းဟောင်းတပ်တွေ ပါမယ်။ သိန္နီဘက်ကို တည်မယ်လို့ သိရတယ်။ ဒီတခါ ထပ်ဖြစ်ရင်တော့ သျှမ်းမြောက် တစ်ခုလုံး ကျသွားမှ ရပ်မယ့် သဘောရှိတယ်” ဟု၄င်းကရှင်းပြသည်။
ယင်းသို့ စစ်ကောင်စီတပ် ပြင်ဆင်နေစဥ် စစ်ဌာနချုပ် အခြေစိုက်ရာ လားရှိုးမြို့တွင် မာရှယ်လော (ခေါ်) စစ်အုပ်ချုပ်ရေး သက်တန်း ထပ်မံတိုးမြှင့်သည့်ဟု ယနေ့ ညနေပိုင်းက လောစပီကာနှင့် လိုက်လံ အော်ဟစ်နေကြောင်း လားရှိုးမြို့ခံ တစ်ဦးက ပြောသည်။
ထို့အတူ ညီနောင်မဟာမိတ်တပ်များနှင့် တိုင်းရင်းသား လက်နက်ကိုင်းများလည်း စစ်ရေးပြင်ဆင်မှုများ ရှိနေပြီး အထူးသဖြင့် စစ်ကောင်စီတပ် စစ်ရေးလှုပ်ရှားနေသည့် ကျောက်မဲဒေသတွင် ပြင်ဆင်မှုများ ပြုလုပ်နေသည်ဟု ဒေသတွင်း စစ်ရေးသတင်းရင်းမြစ်က ဆိုသည်။
“ကျောက်မဲဘက်မှာ TNLA နဲ့ SSPP က စစ်ပြင်တဲ့သဘော တွေ့ရတယ်။ သူတို့ သီးခြားစီပါ။ တပ်ချင်း ပူးပေါင်းတာမျိုးတော့ မကြားသေးဘူး။ SSPP စခန်းတွေက နဂိုကတည်းက သျှမ်းမြောက်မှာ ရှိနေတာပါ” ဟု ၄င်းကဆက်ပြောသည်။
ပြီးခဲ့သည့် မတ်လ ၄ ရက်နေ့တွင် စစ်ကောင်စီကTNLA သိမ်းပိုက်ထားသည့် မန်တုံ၊ နမ့်ဆန်နှင့် နမ္မတူမြို့နယ်တို့ကို စစ်အုပ်ချုပ်ရေး (မာရှယ်လော) ထုတ်ပြန်ခဲ့ပြီးနောက် TNLA ကလည်း ၎င်းတို့ ထိန်းချုပ်ထားသည့် မြို့ ၇ မြို့၌ ညမထွက်ရ အမိန့် ရုတ်သိမ်းကြောင်း မတ်လ ၆ ရက်တွင် တုံ့ပြန် ကြေညာထားသည်။
