သျှမ်းပြည်နယ် တောင်ပိုင်း၊ ကလောမြို့ မီးရထားလမ်းဘေး ကျူးကျော်များနှင့် ကလောချောင်း ဧရိယာ ကျူးကျော်များ ဖျက်သိမ်းရန် စာရင်းကောက်ယူနေပြီဟု မြို့မိမြို့ဖ တစ်ဦးက ယနေ့ (မတ်လ ၄ ရက်) တွင် ပြောသည်။
ကလောမြို့ကို ဖြတ်သန်းသည့် မီးရထားလမ်း ဧရိယာ အတွင်း ကျူးကျော်မှု အများအပြား ရှိနေသလို မြို့တွင်း ဖြတ်သန်း စီးဆင်းသည့် ကလောချောင်း ဧရိယာကို ကျူးကျော်သည်သာမက ချောင်းကို မြေဖို့ ကျူးကျော်မှုများ ရှိနေသဖြင့် ဖျက်သိမ်းရန် စာရင်းကောက်ယူနေဖြင်း ဖြစ်သည်ဟု ဆိုသည်။
“ကလောမှာက ကျူးကျော်တွေ ပိုများလာတယ်။ အခုက ရထားလမ်းဘေးကျူးနဲ့ ချောင်းဧရိယာ ကျူးတွေကို အရင်ရှင်းမယ်။ ချောင်းချဲ့မယ် ပြောတယ်။ အဲဒါပြီးရင် သစ်တောကျူးတွေ ရှင်းမယ်။ အစုအဖွဲ့ပိုင် သစ်တောတွေကို ခြံစိုက်လို့ရတယ် ဆိုပြီး ရောင်းစားထားတာတွေလည်း အများကြီးပါ” ဟု ကလောမြို့ခံ မြို့မိမြို့ဖ တစ်ဦးက ရှင်းပြသည်။
လက်ရှိ မီးရထားလမ်းဘေး တစ်ဖက်တချက် ပေ ၅၀ အတွင်းရှိ ကျူးကျော်များနှင့် ကလောချောင်းဘေး တစ်ဖက်တချက် ပေ ၂၀ အတွင်းရှိ ကျူးကျော်များကို မူလ မြေပုံဖြင့် တိုင်းတာ သတ်မှတ် ရှင်းလင်းမည်ဟု သိရသည်။
“ရထားလမ်းဘေးနဲ့ ချောင်းဘေးမှာ ကျူးကျော်တွေ အများကြီး။ တချို့ ဟိုတယ်တွေတောင် ရထားလမ်းနဲ့ ချောင်းမြေကို အုတ်တံတိုင်းခတ်ပြီး ကျူးထားကြတာ” ဟု ကလောမြို့ခံ တစ်ဦးက ဆိုသည်။
နွေရာသီ အပန်းဖြေမြို့ အဖြစ် ခရီးသွား ဧည့်သည် အများအပြား လာရောက်သည့် ကလောမြို့တွင် ခေတ်အဆက်ဆက် ကျူးကျော်မှုများစွာ ရှိခဲ့ရာ သစ်တောမြေကို ဌာနဆိုင်ရာမျာနှင့် ပူးပေါင်း၍ စာရွက်စာတမ်း ထုတ်ယူ ရောင်းချမှုများ၊ လွှဲပြောင်း ရောင်းချခွင့်နှင့် အဆောက်အအုံ တည်ဆောက်ပိုင်ခွင့် မရှိသည့် အစုအဖွဲ့ပိုင် သစ်တောမြေ လိမ်လည် ရောင်းချမှုများ ယနေ့တိုင် တွင်ကျယ်နေသည်ဟု မြို့ခံ အိမ်ခြံမြေ အကျိုးဆောင် တစ်ဦးက ပြောသည်။
“ဥပမာ ဦးသိန်းစိန် ခေတ်က ‘သတ’ ဆိုတာ သစ်တောဌာနက ကျူးကျော်ဆိုပြီး နံပါတ်နဲ့ ဆိုင်းဘုတ် ထုတ်ပေးတာ။ အဲဒါကို ရပ်ကွက်လူကြီးက သစ်တော ကင်းလွတ် ဆိုင်းဘုတ်ဆိုပြီး ရောင်းစားတယ်။ နောက်လူတွေက ‘သတ’ ဆိုတာ သစ်တောကင်းလွတ် ဆိုပြီး ဝယ်ကြရောင်းကြတယ်။ အဲလိုတွေ အများကြီး” ဟု ၄င်းကရှင်းပြသည်။
လက်ရှိ လွှဲပြောင်း ရောင်းချခွင့်နှင့် အဆောက်အအုံ ဆောက်လုပ်ခွင့် မရှိသည့် အစုအဖွဲ့ပိုင် သစ်တောမြေများကို သစ်တော ကင်းလွတ်ဟု ဆိုကာ စေ◌ျးသက်သာစွာ ရောင်းချမှုများစွာ ရှိနေပြီး ရပ်ဝေးမှ လာရောက်ဝယ်ယူသူများ အနေဖြင့် ရေရှည်တွင် နစ်နာမှုများစွာ ရှိမည်ဟု ၄င်းကသုံးသပ်သည်။
ထို့အပြင် ခေတ်အဆက်ဆက် ကလောမြို့ရှိ မြေလွတ်၊ မြေလပ်၊ ခြံမြေ၊ သစ်တောမြေ စသည်တို့ကို စစ်ဗိုလ်ချုပ်များနှင့် အပေါင်းအပါများက မတရားသိမ်းယူမှုများရှိခဲ့ပြီး လက်ရှိလည်း သိမ်းယူမှုများ ရှိနေဆဲ ဖြစ်သည်ဟု မြို့ခံများက ပြောသည်။
