စစ်ကောင်စီ၏ ထုတ်ကုန်ပစ္စည်းဖြစ်သည့် မြန်မာဘီယာများကို သောက်သုံးခဲ့သည့် တအာင်း (ပလောင်) အမျိုးသားလွတ်မြောက်ရေး တပ်မတော် TNLA မှတပ်သားများကို ကြိမ်ဒဏ် ၁၀ ချက်နှင့် အခြား ပြစ်ဒဏ်ချမှတ်လိုက်ကြောင်း TNLA က ယနေ့ (မေလ ၂) ရက်တွင် ထုတ်ပြန်ထားသည်။

သျှမ်းပြည်မြောက်ပိုင်း “၁၀၂၇ စစ်ဆင်ရေး” တွင် ညီနောင်မဟာမိတ်များနှင့်အတူ ပူးပေါင်းပြီး စစ်ကောင်စီတပ်စခန်းများကို သိမ်းယူခဲ့သည့် TNLA တပ်ဖွဲ့က ယခုရက်ပိုင်းအတွင်း လှုမှုကွန်ရက် စာမျက်နှာပေါ်၌ စစ်ကောင်စီထုတ် မြန်မာဘီယာကို သောက်သုံးနေသည့် TNLA တပ်သားများနှင့်အရာရှိ၏ ဓာတ်ပုံများကြောင့် ဝေဖန်မှုမြင့်တက်ခဲ့သည်။

TNLA မှ တားမြစ်ကန့်သတ်ထားသည့် မြန်မာဘီယာကို သောက်သုံးခဲ့သောကြောင့် တပ်သားများကို ကြိမ်ဒဏ် (၁၀) ချက်၊ အလုပ်ကြမ်း (၁) လနှင့် လူမှုရေးပြစ်ဒဏ်အဖြစ် အများပိုင်ဆေးရုံ၊ ဘုန်းကြီးကျောင်း သန့်ရှင်းရေး လုပ်အားပေးစေခဲ့သည်ဟု ထုတ်ပြန်ချက်၌ ရေးသားဖော်ပြထားသည်။

သို့သော် ပြစ်ဒဏ်ပေးခံရသည့် TNLA တပ်သား မည်မျှရှိကြောင်း အသေးစိတ်ကို ထုတ်ပြန်ရေးသား ဖော်ပြထားခြင်း မရှိပေ။

စစ်တပ်အာဏာသိမ်းပြီးနောက်ပိုင်း စစ်ကောင်စီ အမြစ်ပြတ်ကျဆုံးရန်ဟုဆိုကာ စစ်ကောင်စီ၏ အရေးပါသော စီးပွားရေးမဏ္ဍိုင်ပြိုလဲရန်နှင့် စစ်ကောင်စီဝင်ငွေလမ်းကြောင်း ပိတ်ပင်ရန် ရည်ရွယ်ပြီး TNLA ဘက်မှ စစ်ကောင်စီထုတ်ကုန်များအား ပိတ်ပင်တားမြစ်ခဲ့ဖူးသည်။

ပြီးခဲ့သည့် ဧပြီလ ၁ ရက်တွင်လည်း ကွတ်ခိုင်မြို့နယ် နမ့်ဖတ်ကာကျေးရွာတွင် TNLA တပ်ဖွဲ့မှ လက်နက်အပြည့်အစုံကိုင်ဆောင်ပြီး ကျေးရွာအတွင်းရှိ ဈေးဆိုင်ခန်းများအား တစ်ဆိုင်ဝင် တစ်ဆိုင်ထွက်ကာ လိုက်လံမွှေနှောက်ရှာဖွေ ဖမ်းဆီးစစ်ဆေးမှုများပြုလုပ်ခဲ့သည်။

။