သျှမ်းပြည် မိုင်းဆတ်မြို့နယ်မှ ပြည်သူ့စစ်ခေါင်းဆောင်တစ်ဦးကို မူးယစ်ဆေးဝါး လက်ဝယ်တွေ့ရှိမှုဖြင့် တာချီလိတ်မြို့တွင် ဖမ်းဆီးခံလိုက်ရကြောင်း စုံစမ်းသိရသည်။
ဧပြီလ (၃၀) ရက်တွင် မိုင်းဆတ်မြို့နယ်၊ ဝိန်းကောင်းကျေးရွာ၌ စစ်ကောင်စီတပ်ဖွဲ့မှ ဖွဲ့စည်းပေးထားသည့် ပြည်သူ့စစ်အဖွဲ့ ခေါင်းဆောင်ဖြစ်သူ စိုင်းဝန်းခမ်းသည် တာချီလိတ်မြို့သို့ သွားရောက်စဉ် ၎င်း၏ကားကို မူးယစ်တပ်ဖွဲ့က ရပ်တန့်ခိုင်းပြီး စစ်ဆေးခဲ့ရာ မူးယစ်ဆေးဝါးများ တွေ့ရှိခဲ့ခြင်းကြောင့် ဖမ်းဆီးခံလိုက်ရကြောင်း မိုင်းဆတ်ဒေသခံများက ပြောသည်။
“အခုမှ အသစ်ဖွဲ့တဲ့ ပြည်သူ့စစ်မှာ ခေါင်းဆောင်တက်လုပ်တာ ၁ လ ကျော်ပဲရှိသေးတယ်။ အဖွဲ့ကတော့ အရင်ကတည်းက ရှိတယ်၊ အခုက လူသစ် လေးငါးယောက်နဲ့ ထပ်ဖွဲ့တာပေါ့။ တချို့ကလည်း တာချီလိတ်က အပြန်မှာ မိတာလို့ပြောတယ်၊ သူ့ပစ္စည်းတွေက လာအိုဘက်က လာတဲ့ ဘိန်းနဲ့ Happy Water လို့လည်း ပြောလို့ရတယ်”ဟု မိုင်းဆတ်မြို့နယ်မှ ဖြစ်စဉ်သိရှိသူ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
တာချီလိတ်မြို့တွင် ဖမ်းဆီးခံလိုက်ရသည့် ပြည်သူ့စစ်ခေါင်းဆောင်ဖြစ်သူ အသက် (၃၇) နှစ် အရွယ်ရှိ စိုင်းဝမ်းခမ်းကို သတင်းအရ မူးယစ်တပ်ဖွဲ့မှ သက်သေများနှင့်အတူ တာချီလိတ်မြို့၊ ဆန်ဆိုင်း(က)ရပ်ကွက်၊ ပုံလို့လမ်းတွင် စောင့်ဖမ်းခဲ့ကြောင်း စစ်ကောင်စီလက်အောက်ခံ မူးယစ်တပ်ဖွဲ့မှ ယနေ့ (မေလ ၂ ရက်)တွင် ထုတ်ပြန်သည်။
စိုင်းဝန်းခမ်း မောင်းနှင်လာသည့် ကားကို ရပ်တန့်စစ်ဆေးပြီး ရှာဖွေခဲ့ရာ ၎င်းကားပေါ်မှ စိတ်ပြောင်းဆေးဝါး အက်တက်စီဆေးပြား ၂၀၀၀၀ ပြား (ဒေသပေါက်ဈေး တန်ဖိုးကျပ်ငွေ သိန်း ၅၀၀၀) ကို သိမ်းဆည်းရမိပြီး တာချီလိတ် မြို့မရဲစခန်းတွင် အမှုဖွင့်အရေးယူထားကြောင်း သိရသည်။
“၃၀ ရက်နေ့က ဖမ်းမိတာ၊ ဒီနေ့ကျတော့ သတင်းထွက်လာတာ။ တာချီလိတ်မှာပဲ ချုပ်ထားတာ၊ နောက်လကျမှ အမှုစွဲချက် တင်မယ်ပြောတယ်။ သူသာ ပြည်သူ့စစ်ဝတ်စုံနဲ့ ဂိတ်တွေကို ဖြတ်မယ်ဆိုရင် ပြည်သူ့စစ်ကဒ်ကို ပြနိုင်ရင် သူ့ကို မစစ်တာလည်း ဖြစ်နိုင်တယ်။ အခုက အရပ်သားလိုပဲ ဝတ်ထားပြီးတော့ ဖမ်းမိမှ ပြည်သူ့စစ်လို့ ပြောတာနေမှာ”ဟု မိုင်းဆတ်မြို့နယ်မှ ၎င်းဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။
လက်ရှိတွင် မိုင်းဆတ်မြို့နယ်အတွင်း စစ်ကောင်စီတပ်မှ ဦးဆောင်၍ ကျေးရွာများတွင် လူဦးရေ (၁၀) ဦးခန့်ဖြင့် ပြည်သူ့စစ်အဖွဲ့များ ဖွဲ့စည်းပေးထားပြီး ဟိုနား၊ ဝိန်းနေ၊ ဝိန်းကောင်း၊ မယ့်ဆတ်၊ မယ့်နိမ်၊ ဝမ်ကန်၊ ဆိုင်းခေါင် စသည့် ကျေးရွာတိုင်းတွင် ဖွဲ့စည်းပေးထားကြောင်း သိရသည်။
ထို့အပြင် မိုင်းဆတ်အခြေစိုက် စစ်ကောင်စီတပ် ခလရ-၄၉ မှ မြို့နယ်အတွင်းရှိ ကျေးရွာများတွင် သျှမ်း၊ လားဟူနှင့် အာခါ လူမျိုးစုအလိုက် ပြည်သူ့စစ်အဖွဲ့များ ဖွဲ့စည်းပေးထားကြောင်း မိုင်းဆတ်ဒေသခံများက ပြောသည်။
ပြီးခဲ့သည့် ဧပြီလ ၁၁ ရက်ကလည်း မိုင်းဆတ်မြို့ ဝိန်းနေရပ်ကွက်တွင် အစည်းအဝေးလုပ်ရန် လူမစုပေးသည့် ရာအိမ်မှူးတစ်ဦးကို စစ်ကောင်စီလက်အောက်ခံ ရဲနှင့် အုပ်ချုပ်ရေးမှူးတို့က ဖမ်းဆီးခေါ်ဆောင်သွားခဲ့ကြောင်း ဒေသခံများထံမှ သိရသည်။
Leave a Comments