သျှမ်း-ကရင်နီတကြော သျှမ်းပြည်သို့ အရေးပေါ် စစ်ဘေးရှောင်လာသောသူများသည် စားဝတ်နေရေး ခက်ခဲနေကြသဖြင့် ကြုံရာကျပန်းလုပ်ကိုင်ပြီး ဝမ်းရေးအတွက် ရှာဖွေနေကြရကြောင်း စုံစမ်းသိရသည်။
သျှမ်း-ကရင်နီနယ်စပ် နှင့် ကရင်နီပြည် အတွင်း “၁၁.၁၁ စစ်ဆင်ရေး”ကြောင့် နိုဝင်ဘာလ ၁၅ ရက်မှစပြီး သျှမ်းပြည် တောင်ပိုင်း ပင်လောင်း၊ ညောင်ရွှေ၊ အင်းလေး နှင့် ဆီဆိုင် ဒေသများသို့ ထွက်ပြေးလာသည့် ပြည်သူများသည်စားဝတ်နေရေး အတွက် ခက်ခဲနေပြီး ဝမ်ရေးအတွက် ကြုံရာကျပန်းလုပ်ကိုင် ဖြေရှင်း နေကြရကြောင်း စစ်ရှောင်ကူညီနေသူများက သျှမ်းသံတော်ဆင့်ကို ပြောသည်။
“လက်တလောအခြေအနေဆိုရင် စစ်ရှောင်တွေက ပူးပေါင်းပြီး ညောင်ရွှေမှာဆို အကြော်ရောင်းတဲ့သူနဲ့ ပင်လောင်း တွေမှာ ဆိုရင်လည်း ခေါက်ဆွဲကြော်ရောင်းကြတယ်။ စစ်ဘေးရှောင်တွေစုပြီး ကိုယ့်အားကိုယ် ကိုးပြီး ပိုက်ဆံရှာရတာ တွေရှိတယ်။ ထမင်း၊ဟင်းတွေရောင်းတဲ့သူတွေလည်း ရှိတာပေါ့။”ဟု အင်းလေးဒေသ စစ်ရှောင်များကိုကူညီနေသည့် အမျိုးသားတစ်ဦးက ပြောသည်။
ထို့အပြင် အချို့သောစစ်ဘေးရှောင်များလည်း မိမိနေအိမ်မှ သယ်လာသောပစ္စည်းများကို နမ့်ပန်တွင် ထက်ဝက်ဈေးဖြင့် ပြန်ရောင်းကာ စားဝတ်နေရေးအတွက် ပိုက်ဆံရှာနေရသကဲ့သို့ အချို့သော စစ်ရှောင်များသည် နေ့စားလိုက်နေတဲ့သူ များလည်း ရှိကြောင်း ဒေသခံများက သျှမ်းသံတော်ဆင့်ကို ပြောသည်။
“သူတို့တချိူ့တွေဆိုရင် ဟိုကနေပါလာတဲ့ ရေခဲသတ္တာတို့ဆိုရင် နမ့်ပန်ဖက်မှာ ရောင်းနေတာ တချို့ဆိုရင် ၃သိန်း ၄ သိန်းတန်ကို ၁သိန်း လောက်နဲ့ ပြန်ရောင်းနေကြတာ။သူတို့တွေက ပိုက်ဆံလိုလို့ လေ” ဟုဒေသခံ အမျိူးသားတစ်ဦးက ပြောသည်။
သျှမ်း-ကရင်နီတကြော မှထွက်ပြေးလာသည့် စစ်ဘေးရှောင်များ လက်ရှိ သျှမ်းပြည် တောင်ပိုင်း အင်းလေး ဒေသတွင် စုစုပေါင်း လူဦးရေ ၁ သောင်းထက်မနည်းရှိနေပြီး၊အောင်ပန်းတွင်လည်း စုစုပေါင်းလူဦးရေ ၁၅၀၀ ဝန်ကျင်ရှိနေကြောင်း စစ်ဘေးရှောင်ကူညီသူများက သျှမ်းသံတောင်ဆင့်ကို ပြောသည်။
ကရင်နီ(ကယား)ပြည် မှ သျှမ်းပြည်သို့ လာရောက် ခိုလှုံ စစ်ဘေးရှောင်နေသူများသည် အများစုတွင် ဘုန်းကြီးကျောင်းများ၊ဆွေမျိုးအိမ်များ၊အိမ်ငှားနေသူများရှိပြီး ဆောင်ရာသီ အတွက် အသုံးအဆောင် ပစ္စည်းများဖြစ်သည့် စောင်၊အနွေးထည်များနှင့် စားနပ်ရိက္ခာများ လိုအပ်နေပြီး အလှူရှင်များလည်း ယခင်ထက်နည်းပါးနေကြောင်းသိရသည်။
