သျှမ်းပြည် ကွတ်ခိုင်မြို့နယ်တွင် လက်နက်ကြီးနှင့် မြေမြုပ်မိုင်းကြောင့် ကလေးငယ် ၁ ဦးသေဆုံးပြီး ၈ ဦး ပြင်းထန်စွာ ထိခိုက်ဒဏ်ရာရရှိခဲ့ကြောင်း လူမှုကူညီရေးအသင်းထံမှ သိရသည်။

ပြီးခဲ့သည့် ဒီဇင်ဘာလ ၉ ရက်နှင့် ဒီဇင်ဘာလ ၁၀ ရက် နှစ်ရက်အတွင်း ကွတ်ခိုင်မြို့နယ် မြို့နှင့် လွယ်ဆိုင်ကျေးရွာအတွင်း လက်နက်ကြီးကျရောက်ပေါက်ကွဲမှုကြောင့် ၉ နှစ်အရွယ် ကလေးငယ်တစ်ဦး သေဆုံးပြီး ကလေးအပါအဝင် အရပ်သား ၇ ဦး ပြင်းထန်စွာ ထိခိုက်ဒဏ်ရာရရှိခဲ့ကြောင်း ကွတ်ခိုင်မြို့နယ် လူမှုကူညီရေးအသင်းထံမှ သိရသည်။

“ ပြီးခဲ့တဲ့ ၉ရက်နေ့ကတော့ ဒဏ်ရာရသူ ၅ ယောက် လောက်ရှိတယ်။ သေဆုံးသူ ၉ နှစ်အရွယ် ကလေး ၁ ဦးရှိတယ်။ မနေ့ ကကျတော့ ကလေး ၁ ယောက် ပေါင်မှန်သွားတယ်။ ဒီနေ့လားရှိုးပို့ထားတယ်၊ ဘယ်လိုလုပ်မယ်တော့ မသိဘူး။ နောက်အမျိုးသမီးတစ် ယောက် ဒဏ်ရာရတယ်” ဟု ၎င်းလူမှုကူညီရေးအသင်းမှ တာဝန်ခံတစ်ဦးက ပြောသည်။

အလားတူ ယမန်နေ့ (ဒီဇင်ဘာလ ၁၀ ရက်) တွင် ကွတ်ခိုင်မြို့နယ် နမ့်ဖတ်ကာ ရပ်ကွက် ၂ ရှိ စစ်တပ်စခန်းအနီး အမျိုးသားတစ်ဦး မိုင်းနင်းမိ၍ ညာခြေထောက်ပြတ် ဒဏ်ရာရရှိခဲ့သည်။

လက်ရှိ ကွတ်ခိုင်မြို့နယ်တွင် “ ၁၀၂၇ စစ်ဆင်ရေး” စတင်လာပြီးနောက်ပိုင်း မည်သည့် အဖွဲ့အစည်းမှ မသိရှိဘဲ လက်နက်ကြီးများဖြင့် ရမ်းသမ်းပစ်ခတ်မှုများကြောင့် မကြာခဏ ကျည်စထိမှန်ပြီး ထိခိုက်ဒဏ်ရာ ရသူရှိသလို သေဆုံးမှုများလည်း ရှိနေကြောင်း ကွတ်ခိုင်မြို့ဒေသခံအမျိုးသားတစ်ဦးက ပြောသည်။

“ အခုဟာက တစ်ဦးတစ်ယောက်ကြောင့်၊ တစ်ဖွဲ့ကြောင့် ဖြစ်တာမဟုတ်ဘူး။ အဖွဲ့စုံလောက်က ဖြစ်နေတာ။ ဘယ်ကမှန်း မသိတဲ့ လက်နက်တွေ နေ့တိုင်းလိုလို ကျနေတာပဲ။ ပစ်နေကြတာပဲ။ အခုက ကွတ်ခိုင်မြို့အကုန်လုံးက ဖြတ်ကြီးဆယ်ဖြတ်နဲ့ အဖြတ်ခံထားရသလို ဖြစ်နေတယ်” ဟု ၎င်းက အမျိုးသားတစ်ဦးက ပြောသည်။

ထို့အပြင် ကွတ်ခိုင်မြို့နယ်တွင် “၁၀၂၇ စစ်ဆင်ရေး” စတင်လာချိန်မှစ၍ ယနေ့အချိန်ထိ လက်နက်ကြီးကြောင့် ကလေးအပါအဝင် အရပ်သား ၁၃ ဦးသေဆုံးပြီး ကလေးငယ်အပါအဝင် ၂၃ ဦး ထိခိုက်ဒဏ်ရာရရှိခဲ့ပြီဖြစ်ကြောင်း သျှမ်းသံတော်ဆင့်မှ သီခြားကောက်ယူထားသည့် စာရင်းအရ သိရသည်။