သျှမ်းပြည် သိန္နီမြို့တွင် စစ်ကောင်စီတပ်မှ ရမ်းသမ်းပစ်ခတ်သော လက်နက်ကြီးကြောင့် ပြည်သူနေအိမ် ၁၂ လုံး မီးလောင်ပျက်စီးခဲ့ကြောင်း စုံစမ်းသိရသည်။
ယမန်နေ့ (ဒီဇင်ဘာလ ၁၀ ရက်) ည ၁၀ နာရီကျော် အချိန်ခန့်မှစ၍ သိန္နီမြို့တွင်းသို့ စစ်ကောင်စီတပ်မှ လက်နက်ကြီးဖြင့် ရမ်းသမ်းပစ်ခတ်ခဲ့ပြီး သိန္နီမြို့ ရပ်ကွက်(၁) ဈေးတန်းရပ်အတွင်းသို့ ကျရောက်ပေါက်ကွဲခဲ့ခြင်းကြောင့် ပြည်သူနေအိမ် ၁၂ လုံး မီးလောင်ပျက်စီးခဲ့ကြောင်း သိန္နီမြို့ဒေသခံများက ပြောသည်။
“ည ၁၀ နာရီခွဲလောက်ကတည်းက ဗုံးတွေကျတာ၊ ကျတော်တို့ အိမ်နောက်ဘက်တစ်လမ်းကို အရင်ကျတာ။ အဲ့မှာမီးလောင်သေးတယ်၊ ဝိုင်းပြီး မီးငြိမ်းကြတော့ ငြိမ်းသွားတယ်။ နောက်ပြီး ကျတော်တို့အိမ်တန်းဘက် ထပ်ကျတော့ အိမ်ရှင်က မီးငြိမ်းပြီး ဗုံးထိမှာကြောက်လို့ အိမ်ပြောင်းအိပ်တာ။ ဘယ်လိုဖြစ်လဲတော့ မသိဘူး၊ ၁၂ လုံးကျော်တော့ အကုန်မီးကူးပြီး လောင်ကုန်ပြီ”ဟု သိန္နီမြို့မှ နေအိမ်မီးလောင်သွားသည့် အမျိုးသားတစ်ဦးက သျှမ်းသံတော်ဆင့်ကို ပြောသည်။
ယမန်နေ့ (ဒီဇင်ဘာလ ၁၀ ရက်) ညအချိန်တွင် စစ်ကောင်စီတပ်မှ လက်နက်ကြီး ၆ လုံးထက်မနည်း ရမ်းသမ်းပစ်ခတ်ခဲ့ခြင်းကြောင့် သိန္နီမြို့တွင်း ရပ်ကွက်(၁) ဈေးတန်းရပ်ရှိ သိန္နီစာတိုက်၊ လက်ဖက်ရည်ဆိုင်၊ ကုန်စုံဆိုင် ၂ ဆိုင်၊ ဖုန်းဆိုင်နှင့် ခေါက်ဆွဲဆိုင်တို့ မီးလောင်ကျွမ်းခဲ့ပြီး လူထိခိုက်ဒဏ်ရာရရှိမှု မရှိဘဲ ယနေ့ (ဒီဇင်ဘာ ၁၁ ရက်) နံနက် ၆ နာရီကျော်တွင် မီးငြိမ်းသတ်နိုင်ခဲ့ကြောင်း သိန္နီမြို့မှ ၎င်းအမျိုးသားက ဆက်ပြောသည်။
ပြီးခဲ့သည့် နိုဝင်ဘာလ ၁၂ ရက်နေ့တွင်လည်း နမ့်ခမ်းမြို့ရှိ စစ်ကောင်စီတပ် စခန်းသစ်ကုန်းမှနေ၍ နမ့်ခမ်းမြို့တွင်းသို့ လက်နက်ကြီးများဖြင့် ရမ်းသမ်းပစ်ခတ်ခဲ့ရာ နမ့်ခမ်းမြို့မ ရဲစခန်းအနောက်ဘက်ရှိ ပတ္တမြားခန်းမနှင့် နေအိမ် ၅ လုံးထက်မနည်း မီးလောင်ပျက်စီးခဲ့ကြောင်း နမ့်ခမ်းဒေသခံများထံမှ သိရသည်။
အလားတူ နိုဝင်ဘာလ ၂၇ ရက်နေ့က စစ်ကောင်စီတပ်မှ လေကြောင်းဖြင့် ကျောက်မဲမြို့ အေးရှားဝေါလ် တိုးဂိတ်အနီး ဗုံးကြဲတိုက်ခိုက်ခဲ့ရာ ဓာတ်ဆီဆိုင်နှင့် အနီးရှိနေအိမ်များ မီးလောင်ပျက်စီးခဲ့ပြီး ၎င်းပျက်စီးမှုများကြားတွင် ကျား/မ ခွဲခြားမရနိုင်ဘဲ မီးလောင်သေဆုံးနေသော အလောင်း ၄ လောင်းကိုလည်း တွေ့ရှိခဲ့ရသည်ဟု ကျောက်မဲဒေသခံများက ပြောသည်။
“၁၀၂၇ စစ်ဆင်ရေး” တစ်လကျော်ကာလအတွင်း သိန္နီမြို့နယ်တွင် စစ်ကောင်စီ၏ လက်နက်ကြီး ထိမှန်မှုကြောင့် အမျိုးသမီး ၅ ဦး အပါအဝင် စုစုပေါင်း ၁၄ ဦး သေဆုံးပြီး ၁၅ ဦးထက်မနည်း ထိခိုက်ဒဏ်ရာရရှိကာ ပြည်သူနေအိမ် ၂၀၀ ထက်မနည်း ထိခိုက်ပျက်စီးခဲ့ရပြီး စစ်ဘေးရှောင်ဦးရေ ၆၀၀၀ ကျော်အတွက် စားနပ်ရိက္ခာနှင့် ဆေးဝါးများ အရေးပေါ် လိုအပ်နေကြောင်း သိန္နီမြို့စစ်ဘေးရှောင် ကူညီသူများထံမှ သိရသည်။
