သျှမ်းပြည် ကျောက်မဲခရိုင်၊ သီပေါမြို့နယ်အတွင်း ကျောက်မီးသွေး တူးဖော်နေသည့် ငွေရည်ပုလဲ ကုမ္ပဏီကို ဒေသခံ လူငယ်များ ကန့်ကွက်ကြောင်း စုံစမ်းသိရသည်။
ပြီးခဲ့သည့် ၂၀၂၃ ခုနှစ် အောက်တိုဘာလ ၁ ရက်တွင် ကျောက်မဲခရိုင်အတွင်းမှ လူငယ်များ စုပေါင်းကာ သီပေါမြို့နယ်၊ နမ့်မကျေးရွာအုပ်စုအတွင်း ကျောက်မီးသွေး တူးနေသည့် ငွေရည်ပုလဲ ကုမ္ပဏီကို ကန့်ကွက်ခဲ့ကြကြောင်းပါဝင်သည့် လူငယ် တစ်ဉီးက သျှမ်းသံတော်ဆင့်ကို ပြောသည်။
“ရည်ရွယ်ချက်ကတော့ ငွေရည်ပုလဲကုမ္ပဏီကနေ ကျောက်မီးသွေး တူးဖော်မှုကို ရပ်စေချင်တယ်၊ နောက်တစ်ခုကတော့ ဒေသအာဏာပိုင်တွေကလည်း ကိုယ့်ရပ်ရွာ သယံဇာတတွေကို ကာကွယ်ထိန်းသိမ်းစေချင်တယ်၊ ကျနော်တို့ စိုက်ပျိုးရေးလုပ်ငန်းကို ကောင်းကောင်းမွန်လုပ်နိုင်ပါစေ ဆိုတဲ့ ရည်ရွယ်ချက်နဲ့ လုပ်တာ” ဟု ဆန္ဒပြမှုတွင် ပါဝင်သည့် လူငယ်တစ်ဉီးက သျှမ်းသံတော်ဆင့်ကို ပြောသည်။
အာဏာသိမ်းစစ်ကောင်စီတပ်ဖွဲ့သည် ငွေရည်ပုလဲ ကုမ္ပဏီထံမှ အခွန်အခကြေးငွေများစွာ လက်ခံရရှိထားပြီး လက်ရှိတွင် သျှမ်းမြောက်ဒေသမှ မြေဧကပေါင်း ၃၀၀၀ ကျော်ကို ကျောက်မီးသွေး တူးဖော်ခွင့် ပြုထားကြောင်းလည်း စုံစမ်းသိရသည်။
ယင်းကဲ့သို့ စစ်ကောင်စီအတွက် အခွန်များပေးဆောင်ပြီး ငွေရည်ပုလဲ ကုမ္ပဏီမှ ကျောက်မီးသွေး တူးဖော်နေခြင်း နှင့် ပတ်သက်ပြီး သျှမ်းပြည်သူများ တညီတညွှတ် ပူးပေါင်း ဆန့်ကျင် ဆန္ဒပြကြရန်လည်း သျှမ်းမြောက်မှ ဒေသခံ လူငယ်များက ပြောဆို တိုက်တွန်းထားသည်။
“ငွေရည်ပုလဲ ကုမ္ပဏီက စစ်ကောင်စီကို ငွေရှာပေးနေတဲ့ သဘောပဲ၊ ပြီးတော့ သူတို့ လုပ်ခွင့်က သက်တမ်းကုန်တာ ကြာပြီ၊ စစ်အာဏာသိမ်းပြီးနောက်မှ စစ်ကောင်စီ နဲ့ ပေါင်းပြီး ပြန်တူးနေကြတာ၊ အခုဆို လယ် ၊ယာ၊ ခြံ၊ ဒေသအတွင်းက သဘာဝ သယံဇာတသစ်တော သစ်ပင်တွေ တော်တော် ပျက်စီးနေပြီမို့ သျှမ်းပြည်တခုလုံး တညီတညွှတ်တည်း ပူးပေါင်းဆန့်ကျင်ကြဖို့ တောင်းဆိုချင်ပါတယ်” ဟု ဆန့်ကျင် ဆန္ဒပြ လှုပ်ရှားမှုတွင် ပါဝင်သူ တစ်ဉီးက သျှမ်းသံတော်ဆင့်ကို ပြောသည်။
ငွေရည်ပုလဲ ကုမ္ပဏီသည် သီပေါမြို့နယ်အတွင်း ကျောက်မီးသွေး တူးဖော်ခွင့်ရခဲ့သည်မှာ ၂၀၀၄ မှ စတင်ခဲ့ခြင်းဖြစ်ပြီး လက်ရှိတွင်လည်း သီပေါမြို့နယ်၊ နားကွန်ကျေးရွာ နှင့် ကုန်းပေါင်းကျေးရွာအနီးတို့တွင် ဆက်လက် တူးဖော်နေခြင်း ဖြစ်ကြောင်း သိရသည်။
ယင်းကဲ့သို့ ကျောက်မီးသွေး တူးဖော်မှုကြောင့် ဒေသခံ ၃၀၀၀ ကျော်၏ နေထိုင်စားသောက်ရေးများကို ထိခိုက်ကြောင်း ဆန့်ကျင်ရေး လှုပ်ရှားမှု ပါဝင်သည့် အိုက်တော (နာမည်လွှဲ) က သျှမ်းသံတော်ဆင့်ကို ပြောသည်။
“ပထမ ရေသောက်မြစ် ၊ ချောင်းတွေကို ထိတာပေါ့၊ အဲ့ကြောင့် စိုက်ပျိုးရေးအတွက် ရေမရနိုင်တော့ဘူး၊ စိုက်ပျိုးရေးချိန် ရေမလုံလောက်မှု ပြဿနာ ကြုံရတာ ၃ နှစ်ကျော်ပြီ၊ ဒီနားတစ်ဝိုက် စိုက်ပျိုးရေး အဓိက လုပ်ကိုင်စားသောက်တဲ့ ဒေသခံ ၃၀၀၀ ကျော်ရှိတယ်” ဟု အိုက်တော (နာမည်လွှဲ) က သျှမ်းသံတော်ဆင့် ကို ပြောသည်။
ပြီးခဲ့သည့် ၂၀၂၁ ခုနှစ် ဖေဖော်ဝါရီလ ၂၅ ရက်တွင် ငွေရည်ပုလဲကုမ္ပဏီမှ တာဝန်ရှိသူများသည် ဒေသအတွင်း ရွာလူကြီးများ နှင့် တွေ့ဆုံပြီး ကျောက်မီးသွေး ဆက်လက်တူးဖော်မည့်အကြောင်း၊ ဒေသခံများအနေဖြင့် ကန့်ကွက်ပြောဆိုရန် မလိုကြောင်းကိုလာရောက်ပြောဆိုခဲ့ကြောင်းလည်း ဒေသခံများ ပြောပြချက်အရ သိရသည်။
လက်ရှိတွင် သီပေါမြို့နယ်၊ နမ့်မကျေးရွာအုပ်စု မှ နားကုန်းကျေးရွာ၊ ကုန်းပေါင်းကျေးရွာတို့ဘက် အထိ ကျောက်မီးသွေး ချဲ့ထွင်တူးဖော်မှုကြောင့် မြေသားများ အက်ကွဲခြင်း၊ ချောင်းကမ်းပါး ပြိုခြင်းများ မကြာခဏ ကြုံတွေ့ရကြောင်းလည်း သိရသည်။
စစ်အာဏာသိမ်း လက်အောက်တွင် ငွေရည်ပုလဲကုမ္ပဏီမှ ကျောက်မီးသွေး တူးဖော်မှုကို ချဲ့ထွင် လုပ်ဆောင်နေခြင်း နှင့် ပတ်သက်ပြီး ဒေသခံများ၏ ကျန်းမာရေး၊ စီးပွားရေး နှင့် သဘာဝ သယံဇာတများ ထိခိုက်ပျက်စီးရကြောင်း သျှမ်းလူ့အခွင့်အရေးမဏ္ဍိုပ် (SHRF) မှလည်း ထုတ်ပြန် ကြေညာထားသည်။
Leave a Comments