သျှမ်းပြည်မြောက်ပိုင်း အခြေစိုက် မြန်မာအမျိုးသား ဒီမိုကရက်တစ် မဟာမိတ်တပ်မတော် (MNDAA) ကိုးကန့်တပ်ဖွဲ့ဝင် ၂၈ ဦး အလင်းဝင်ခြင်း နှင့် ပတ်သက်ပြီး သတင်းအမှန် မဟုတ်ကြောင်း MNDAA တုံ့ပြန် ပြောဆိုထားသည်။
ပြီးခဲ့သည့် စက်တင်ဘာလ ၂၉ ရက်တွင် MNDAA မှ တပ်ဖွဲ့ဝင် ၂၈ ဦးသည် အာဏာသိမ်း စစ်ကောင်စီ တပ်ဖွဲ့ထံသို့ လက်နက်ချ အလင်းဝင်လာသည့်အတွက် လောက်ကိုင်တိုင်းစစ်ဌာနချုပ်၌ ဆုပေးပွဲ အခမ်းအနား ကျင်းပခဲ့ကြောင်း စစ်ကောင်စီဝါဒဖြန့် ဆိုရှယ်မီဒီယာများက ထုတ်ပြန်ထား သည်။
ယင်းကဲ့သို့ စစ်ကောင်စီမှ သတင်းထုတ်ပြန်ခြင်း နှင့် ပတ်သက်ပြီး သတင်းအမှန်မဟုတ်သည့် အကြောင်းကို MNDAA ပြောရေးဆိုခွင့် Li Tianfu က တုံ့ပြန် ပြောကြားခဲ့သည်။
“ဒါဟာ အာဏာသိမ်းအဖွဲ့နဲ့ ကိုးကန့်အစိုးရ အတုအယောင်အဖွဲ့ရဲ့ ပူးပေါင်းပါဝင်မှုရှိတဲ့ နိုင်ငံရေးပြသမှု တစ်ခုပါပဲ။ ဒီလိုလွှဲမှားတဲ့ ရည်ရွယ်ချက်တွေဟာ အဓိက ကျွန်တော်တို့ တပ်ဖွဲ့ဝင်တွေရဲ့ တည်ငြိမ်မှုကို တုန်လှုပ်စေဖို့ ဖြစ်တယ်” ဟု Li Tianfu က တုံ့ပြန် ပြောဆိုခဲ့ကြောင်း The Kokang သတင်းဌာနက ထုတ်ပြန်ထားသည်။
စစ်ကောင်စီမှ ထုတ်ပြန်ထားသည့် အလင်းဝင်လာသည့် MNDAA တပ်ဖွဲ့ဝင်များသည် တပ်ဖွဲ့မှ ခွဲထွက်သူ နှင့် နေရပ်ပြန်ပြီး ပြန်မလာကြသည့် တပ်ဖွဲ့ဝင်များသာဖြစ်ကြောင်း သိရသည်။
ထို့အပြင် စစ်ကောင်စီ ထုတ်ပြန်လာသည့် လက်နက်ချသူများ ဝတ်ဆင်ထားသည့် ယူနီဖောင်းနှင့် ကိုင်ဆောင်သော လက်နက်များသည် (MNDAA) တပ်ဖွဲ့မှ မဟုတ်ကြောင်းလည်း Li Tainfu က ယခုလို ဆက်လက်ပြောဆိုထားသည်။
“MNDAA တပ်ဖွဲ့ဝင်မှ လက်နက်ချခြင်း ၊ သစ္စာဖောက်ခြင်း မဟုတ်ပါ။ စစ်ကောင်စီရဲ့ ရည်ရွယ်ချက်ရှိရှိ နဲ့ ရှိုးပြတဲ့ နိုင်ငံရေးပြပွဲ အကွက်အကွင်းများ ပြည့်နှက်နေတယ်” ဟု Li Tainfu က ဆိုသည်။
MNDAA သည် ပြီးခဲ့သည့် ၂၀၂၁ ခုနှစ် မတ်လ ၃၀ ရက်တွင် စစ်တပ်အနေဖြင့် စစ်အာဏာရှင်စနစ် ဆန့်ကျင်သူနေများ နှင့် ပြည်သူလူထုအပေါ် အကြမ်းဖက်နေခြင်းများအား ချက်ချင်းရပ်တန့်ရန် နှင့် နွေဦးတော်လှန်ရေးကို ဆင်နွှဲနေသည့် တိုင်းရင်းသားလူမျိုးပေါင်းစုံနှင့်အတူ ပူးပေါင်းဆောင်ရွက်မည်ဟု ထုတ်ပြန် ပြောဆိုထားသည်။
တစ်ဖက်တွင်လည်း MNDAA သည် စစ်ရေးအရ စုဖွဲ့ထားသည့် မြောက်ပိုင်းမဟာမိတ် ၄ ဖွဲ့ (MNDAA၊ AA၊ TNLA နှင့် KIA)၊ ညီနောင်မဟာမိတ် သုံးဖွဲ့ (MNDAA၊ AA နှင့် TNLA) တို့တွင်လည်း အဖွဲ့ဝင် ဖြစ်သည်။
