မြန်မာ – တရုတ်နယ်စပ်ဒေသ မူဆယ်မြို့ရှိ နန်းတော်ဂိတ်တွင် တရားဝင်ဗီဇာ (Business Visa) ဖြင့် နိုင်ငံကူးလက်မှတ်ကိုင်ဆောင်၍ ဖြတ်သန်းသွားလာခွင့်ပြုလိုက်ပြီဖြစ်ကြောင်း စုံစမ်းသိရသည်။
အောက်တိုဘာလ ၁ ရက်မှစပြီး မြန်မာ – တရုတ်နယ်စပ်ဒေသ မူဆယ်မြို့ရှိ နန်းတော်ဂိတ်တွင် တရားဝင်ဗီဇာ (Business Visa)ဖြင့် နိုင်ငံကူးလက်မှတ် (passport) ကိုကိုင်ဆောင်၍ ဖြတ်သန်းသွားလာခွင့်ပြုပြီ ဖြစ်ကြောင်း စစ်ကောင်စီ၏ လက်အောက်ခံ ပြန်ကြားရေးဝန်ကြီးဌာနမှ ယမန်နေ့ အောက်တိုဘာလ ၂ ရက်တွင် ထုတ်ပြန်ထားသည်။
အဆိုပါ ဖြတ်သန်းသွားလာနိုင်ခွင့်ပြုဖို့အတွက် ရန်ကုန်မြို့ရှိ တရုတ်ပြည်သူ့သမ္မတနိုင်ငံ သံရုံးနှင့် မန္တလေးမြို့ရှိ တရုတ်ပြည်သူ့သမ္မတနိုင်ငံ ကောင်စစ်ဝင်ရုံးတွင် စီးပွားရေးမြန်မာနိုင်ငံကူးလက်မှတ် (BB) နှင့် တရားဝင်ဗီဇာ (Business Visa) လျှောက်ထားရမည် ဖြစ်ကြောင်း သိရသည်။
ထို့အပြင် နယ်စပ်ဒေသဂိတ်များတွင် နှစ်နိုင်ငံဝင်ထွက်ခွင့် တစ်ခါသုံးကတ် (TBP) ကို ပြုလုပ် ပေးနေလျက်ရှိပြီး လဝကမှ ဦးဆောင်ပြုလုပ်ပေးကာ တစ်ဦးကို ကျပ်ငွေ ၁ သိန်းကျော်မှ ၂ သိန်းကျော်အထိ ပိုက်ဆံ တောင်းခံနေသည်။
စစ်တပ်က အာဏာသိမ်းပြီးနောက်ပိုင်း မြန်မာနိုင်ငံတွင် နိုင်ငံရေး၊ စီးပွားရေး မတည်ငြိမ်မှုနှင့် စစ်ရေး ပဋိပက္ခ ဖြစ်ပွားရာ အလုပ်အကိုင်အခွင့်အလမ်း ရှားပါးလာပြီး ပြည်သူများသည် ရေကြည်ရာမြက်နုရာ ထွက်ခွာပြီး အလုပ်ရှာဖွေသွားကြသည်။
