မြန်မာနိုင်ငံအတွင်း အွန်လိုင်းဈေးရောင်းသူများသည် ယနေ့မှစ၍ မှတ်ပုံတင်လျှောက်ထားနိုင်ပြီ ဖြစ်ပြီး ဈေးဝယ်သူက ဈေးနှုန်းမေးလာသည့်အခါ CB (chat box) လာလို့ ပြောဆိုပါက အရေးယူခံရမည်ဟု စစ်ကောင်စီက ခြိမ်းခြောက်ပြောဆိုလိုက်သည်။

ပြီးခဲ့သည့် ဇူလိုင် ၂၁ ရက်က ထုတ်ပြန်ကြေညာထားသည့် အွန်လိုင်းစနစ်ဖြင့် ရောင်းချခြင်းလုပ်ငန်းများ၊ မှတ်ပုံတင် လက်မှတ်လျှောက်ထားနိုင်ရေးအတွက် လျှောက်ထားလိုသူများကို ယနေ့မှစ၍ အွန်လိုင်းစနစ်ဖြင့် လျှောက်ထားနိုင်မည်ဖြစ်ကြောင်း စစ်ကောင်စီက ယနေ့ အောက်တိုဘာ ၃ ရက်၌ ထုတ်ပြန်ထားသည်။

မှတ်ပုံတင်လျှောက်ထားလိုသူများသည် ရုံးဌာနများသို့ လူကိုယ်တိုင် သွားရောက်ဆောင်ရွက်ရန် မလိုအပ်ဘဲ www.ecomreg.gov.mm မှတစ်ဆင့် အွန်လိုင်းစနစ်ဖြင့် လျှောက်ထားနိုင်မည်ဖြစ်ကြောင်း ရေးသားဖော်ပြထားသည်။

အဆိုပါ အွန်လိုင်းမှတ်ပုံတင် လျှောက်ထားခြင်း နှင့် ပတ်သက်ပြီး သျှမ်းပြည် မူဆယ်မြို့ အွန်လိုင်းဈေးရောင်းသူ အမျိုးသမီးတစ်ဦးက “ တကယ်လို့ မှတ်ပုံတင်ရမယ်ဆိုရင်လည်း မတတ်နိုင်ဘူး လုပ်မှာပဲလေ။ တပိုင်တနိုင် နဲ့ အမြတ်များများ ငွေပိုရှာနိုင်တဲ့ သူတွေဆို သူတို့လုပ်မှာပဲ။ တချို့ဆိုင်သေးသေးလေးတွေ အတွက်တော့ အခက်အခဲအများကြီး ရှိမှာပေါ့။ အမြတ်သိပ်မရှိဘူး။ ပြီးတော့ တချို့ အွန်လိုင်းစနစ်ဆိုတော့ နည်းပညာ မကျွမ်းကျင်ဘူး“ ဟု ပြောသည်။

ယင်းကဲ့သို့ အွန်လိုင်း မှတ်ပုံတင်လျှောက်ထားခြင်းကြောင့် ကုန်ကျစရိတ် နှင့် အွန်လိုင်းစနစ် အသုံးပြုနည်း အခက်ခဲရှိနိုင်ကြောင်း ၎င်းက ဆိုသည်။

အလားတူ အွန်လိုင်းဈေးရောင်းသူများအနေဖြင့် ဝယ်သူများက ဈေးနှုန်းမေးလာတဲ့အခါ CB (chat box) လာလို့ ပြောဆိုပါက အရေးကြီး ကုန်စည် နှင့် ဝန်ဆောင်မှု ဉပဒေအရ အရေးယူခံရမည်ဟု စီးပွားရေး နှင့် ကူးသန်းရောင်းဝယ်ရေး ဝန်ကြီးဌာန၊ စားသုံးသူရေးရာ ဦးစီးဌာနက လက်ထောက်ညွှန်ကြားရေးမှူး ဦးထက်ဝင်းအောင်က ပြောသည်။

မြန်မာနိုင်ငံ ကုန်သည်များ နှင့် စက်မှုလက်မှုလုပ်ငန်းရှင်များ အသင်း (UMFCCI) မှ ယမန်နေ့ စက်တင်ဘာလ ၂ ရက် ပြုလုပ်ခဲ့သည့် အွန်လိုင်းစနစ်နှင့် ရောင်းချသူများ မှတ်ပုံတင်နိုင်ရေး အသိပညာပေးခြင်းနှင့် eComReg System စနစ် ဖွင့်လှစ်ခြင်း အခမ်းအနား၌ ပြောကြားခဲ့သည်။

“ CB လာ ဆိုရင်တော့ မှတ်ပုံတင် လက်မှတ်ပါ တာဝန်ရှိမှု တားမြစ်ချက်နဲ့ အကျုံးဝင် သွားမှာဖြစ်ပါတယ်။ ဒါ့ကြောင့် market နဲ့ ပတ်သက်ပြီးတော့ ဈေးနှုန်းကိုလည်း ပွင့်ပွင့်လင်းလင်းနဲ့ ဖော်ပြပြီး ရောင်းပေးကြဖို့ ပြောချင်ပါတယ်။ မှတ်ပုံတင်ထားပြီးမှ CB လာ ဆိုရင် စားသုံးသူ ကာကွယ်ရေး ဥပဒေအရရော၊ တားမြစ်ချက်အရရော အကျုံးဝင်ပြီးတော့ မလိုလားအပ်တဲ့ ပြဿနာတွေ ဖြစ်လာနိုင်ပါတယ်။ နောက်ဆို CB လာ လို့တော့ မရတော့ပါဘူး “ ဟု ဦးထက်ဝင်းအောင်က ပြောသည်။

ထို့အပြင် အွန်လိုင်းစနစ်ဖြင့် ဈေးရောင်းချသူများသည် နိုင်ငံရေး၊ လှုံ့ဆော်မှု၊ ဟောပြောမှု၊ စည်းရုံးမှု၊ အားပေးမှု နှင့် ဆန္ဒဖော်ထုတ်မှု ပြုလုပ်ခြင်းကို ရှောင်ကျဉ်ရမည်ဖြစ်ကြောင်း သိရသည်။

မြန်မာနိုင်ငံတွင် ကိုဗစ် – ၁၉ ကူးစက်မှုဖြစ်ပြီးနောက် နှင့် စစ်အာဏာသိမ်းပြီးနောက်ပိုင်းမှာ ပြည်သူများသည် အွန်လိုင်းပေါ်မှ တပိုင်တနိုင် စျေးရောင်းစားရာမှ လက်ရှိမှာ စစ်ကောင်စီမှ ဝင်ငွေရယူလိုသည့်အတွက် နည်းမျိုးစုံသုံး အခွန်အတင်းအဓမ္မ ကောက်ယူနေကြောင်း အွန်လိုင်းစျေးသည်များက ပြောဆိုလိုက်သည်။