Monday, July 22, 2024

ဆီဆိုင်မြို့နယ် ပညာရေးဝန်ထမ်းရှားပါးလာမှုကြောင့် (၁၀) တန်းအောင်သူများ ဆရာအဖြစ်ခန့်အပ်မည်

Must read

သျှမ်းပြည် ဆီဆိုင်မြို့နယ်အတွင်း ပညာရေးဝန်ထမ်းများ ရှားပါးလာမှုကြောင့် (၁၀) တန်းအောင်မြင်ပြီးသွားသည့် သူများကို တလလျှင် ကျပ်ငွေ တစ်သိန်းခွဲဖြင့် ပြည်သူလူထုမှ ခန့်အပ်မည်ဟု စုံစမ်းသိရသည်။

.

စစ်တပ်အာဏာသိမ်းပြီးနောက် မြန်မာတဝှမ်းလုံးမှ ပညာရေးဝန်ထမ်းများသည် အာဏာဖီဆန်ရေးလှုပ်ရှားမှု CDM ပြုလုပ်လာကြပြီး၊ တဖက်မှာလည်း နိုင်ငံရေး အခြေအနေကြောင့် လစာ အခက်အခဲ ဖြစ်လာပြီး စစ်ကောင်စီပေးအပ်သည့် လစာမှာ မမှန်ကန်မှုကြောင့် ဝန်ထမ်းဘဝမှ ရပ်ဆိုင်းခဲ့သည်။

ထိုအလုပ်ရပ်နားလိုက်သည့် ဝန်ထမ်းများထဲတွင် ဆီဆိုင်မြို့နယ် ပညာရေးဝန်ထမ်း အများအပြားပါဝင်သဖြင့် လက်ရှိမှာ ပညာရေး ဝန်ထမ်းရှားပါးလာမှုကြောင့် ၁၀ တန်းအောင် သူများကိုပါ ဆရာအဖြစ် ခန့်အပ်လာသည့်အဆင့်ဖြစ်လာသည်။

ယခု ဆီဆိုင်မြို့နယ် ဆိုက်ခေါင်စံပြကျေးရွာရှိ အထက်တန်းကျောင်း (အ.ထ.က) တွင် ပညာရေးဝန်ထမ်းများ မလုံလောက်သည့် ပြဿနာနှင့် ကြုံတွေ့နေရသောကြောင့် စစ်ကောင်စီ လက်အောက်ခံ အစိုးရခန့် မဟုတ်ဘဲ ပြည်သူလူထုမှ ခန့်ထားသည့် ပညာရေးဝန်ထမ်းများ ခေါ်ယူနေရကြောင်း ဆိုက်ခေါင်မြို့ဒေသခံ အမျိုးသမီးတဦး က သျှမ်းသံတော်ဆင့်ကို ပြောသည်။

“ ဆရာ၊ ဆရာမတွေ မလောက်လို့ လူထုကနေ ခန့်ထားတာ ဆရာမ ၄ ယောက်လောက်ရှိတယ်။ ပညာအရည် အချင်းတော့ ၁၀ တန်းအောင်ရတယ်။ ၁၀ တန်းအောင်ပြီး တက္ကသိုလ်တက် ဘွဲ့မရသေးရင်တော့ အလယ်တန်းနဲ့ မူလတန်းအဆင့် သင်ရတယ်။ တချို့ ဘွဲ့ရပြီး ကိုယ့်မေဂျာကိုကျွမ်းရင်တော့ အထက်တန်းမှာ သင်တာလည်း ရှိတယ် “ ဟု ၎င်းအမျိုးသမီးတစ်ဦးက ပြောသည်။

အဆိုပါ ပြည်သူလူထုမှ ခန့်ထားသည့် ဆရာ၊ ဆရာမသည် တစ်လကို လစာကျပ်ငွေ ၁ သိန်းခွဲသာ ရရှိသည်။

ထို ပညာရေးဝန်ထမ်းများသည် ပြည်သူလူထုမှ ခန့်ထားသောကြောင့် စာသင်ကြားနည်းသင်တန်း မတက်ခဲ့ရသလို ကျောင်းသား၊ သူများကို သင်ကြားပေးပါက မထိရောက်မည်ကို စိုးရိမ်နေကြောင်း ကျောင်းသားမိဘ တဦးက သျှမ်းသံတော်ဆင့် ကို ပြောသည်။

“ တကယ့် ဆရာ၊ ဆရာမတွေလောက်တော့ မမှီဘူးပေါ့။ သင်တန်းတွေလည်း မတက်ရဘူး။ သူတို့ တက်သလိုသာ သင်နေရတာ။ ကိုယ့်ကလေးအတွက်တော့ စာသင်တဲ့အခါမှာ ကောင်းကောင်းနားမလည် နိုင်မှာကိုဘဲ စိုးရိမ်တယ် “ ဟု ၎င်းကျောင်းသားမိဘတဦးက ပြောသည်။

လက်ရှိ စစ်ကောင်စီလက်အောက်ခံ အစိုးရဝန်ထမ်း ကျောင်းဆရာ၊ ဆရာမများသည် အလယ်အဆင့် သင်ကြားပါက တစ်လကို ကျပ်ငွေ ၂ သိန်းသာ ရရှိပြီး ယခုလို ကုန်ဈေးနှုန်းအဆမတန် မြင့်တက်လာသည့် ကာလတွင် လစာနှုန်း မြင့်တက်ပေးစေလိုကြောင်းလည်း ပညာရေးဝန်ထမ်းများက ပြောဆိုနေသည်။

Leave a Comments

- Advertisement -spot_img

Latest article