သျှမ်းပြည်နယ်တောင်ပိုင်း၊ပင်းတယမြို့နယ်၊ပွေးလှမြို့၊ပွင့်လန်းရွာတွင် မိုးကြီး လေပြင်း တိုက်သဖြင့် ကျေးရွာရှိ လူနေအိမ် ၃၄ လုံး ပျက်စီးခဲ့ရကြောင်း ရွာသားတစ်ဦးထံမှ သိရသည်။
ယမန်နေ့ (မေ၂)ရက် ည ၅နာအချိန်တွင် မိုးကြီးပြီး လေပြင်း တိုက်ခတ်ခဲ့ပြီး၊ လူနေအိမ်၃၄လုံး ပျက်စီးခဲ့ရပြီး လူထိခိုက်ဒဏ်ရာရရှိခြင်းမရှိကြောင်း သိရသည်။
“တစ်ချို့က စားဝတ်နေရးအဆင်မပြေတော့ အိမ်ပြန်ပြင်ဖို့ အကူညီလိုအပ်တာတွေ ရှိတယ်။မိုးကလည်း ရုတ်တရက်ကြီး လေလည်း အရမ်းပြင်းတော့ လန့်တောင် လန့်သွားတယ်။ကံကောင်းကြတော့ လူထိခိုက်မှုမရှိဘူး။”ဟု ရွာခံအမျိုးသားတစ်ဦးကပြောသည်။
အလားတူ တစ်ချိန်တည်းမှာပင် ကလောမြို့နယ် မိုးကောင်းကျေးရွာတွင်လည်း မိုးကြီး၊လေပြင်း တိုက်ခိုက်မှုကြောင့် လူအိမ်၅လုံး ထက်မနည်းလည်း ပျက်စီးခဲ့ရကြောင်း သိရသည်။
“သဘာဝဘေးကြောင့် ဒုက္ခရောက်ရသူ အိမ်ပျက်စီးရသူတွေကို ကူညီပေးဖို့ တိုက်တွန်းချင်ပါတယ်။ကျေးရွာအထိ သွားရောက် လှူဒါန်းကူညီနိုင်ပါတယ်။”ဟု ၄င်းကဆက်ပြောသည်။
ထို့အပြင် အောင်ပန်း-ရွာငံ သွားလမ်းပေါ် လည်း မိုးကြီးလေပြင်းတိုက်ခတ်မှုကြောင့် လမ်းဘေးရှိ သစ်ပင်များ လမ်းထဲ အပင်၊အကိုင်းများ လှဲကျသဖြင့် ခရီးသွားကားများ ပိတ်မိခဲ့သေးကြောင်း သိရသည်။
ပြီးခဲ့သည့် ဧပြီလ ၁၂ရက်နေ့တွင်လည်း ပင်းတယမြို့နယ်တွင် မိုးကြီးခဲ့ပြီး၂လက်မခန့်အရွယ်ရှိသော မိုးသီးပါကြွေကျသဖြင့် သီးနှံပင်ဖြစ်သည့် ကော်ဖီ၊လက်ဖက်၊လိမ္မော်ပင်မှ အဖူး၊အပွင့် အညွှတ်များစွာလည်းပျက်စီးခဲ့ရကြောင်းသိရသည်။
Leave a Comments