သျှမ်းပြည်တောင်ပိုင်း ရွာငံမြို့နယ်တွင် ဗျူစောထီးအဖွဲ့မှ ဖမ်းဆီးသွားသည့် ရွာသား (၁၀) ဦး ကို ယမန်နေ့ (သြဂုတ် ၁၅) ရက်တွင် ထောင်ဒဏ် (၆) နှစ်စီ ချလိုက်ကြောင်း စုံစမ်းသိရသည်။
အဆိုပါ ရွာငံ ဒေသခံ (၁၀) ဦးကို မေလပိုင်းတွင် ဗျူစောထီးမှ ဖမ်းဆီးသွားပြီး စစ်ကောင်စီ လက်ထဲသို့ အပ်နှံခဲ့သည်။
ထိုဒေသခံများသည် ရွာငံမြို့နယ် နှင့် မန္တလေး သာစည်မြို့နယ်ကြားရှိ ငှက်ပျောတောကျေးရွာ တွင် နေထိုင်သူများ ဖြစ်သည်။
“ မနေ့ကတော့ ဖမ်းခံရတဲ့ ရွာသား (၁၀) ဦးကို ထောင်ဒဏ် (၆) နှစ်စီချလိုက်တယ်လို့ ကြားရတယ်။ ဗျူစောထီး က ဖမ်းဆီးသွားတဲ့ ရွာသားတွေ အများကြီးရှိတယ်။ သတင်းမထွက်လာတာတွေတော်တော်များတယ်” ဟု ရွာငံ ဒေသခံ အမျိုးသမီး တစ်ဦးက သျှမ်းသံတော်ဆင့်ကိုပြောသည်။
ထောင်ဒဏ်ချမှတ်ခံရသည့် ရွာသား (၁၀) ဦးကို မည်သည့် ထောင်တွင် ထားရှိသည်ကို မသိရသေးပေ။
ထိုဖမ်းခံရသည့် ရွာသားများ ပြန်လွှတ်ပေးရန် အတွက် ၎င်းမိသားစုဝင်များထံ တစ်ဦးလျှင် ကျပ်ငွေ (၅) သိန်းပေးရန် ဗျူစောထီးအုပ်စုမှ တောင်းခံခဲ့သည်။
“အစက ရွာသားတွေ ပြန်လွှတ်ပေးဖို့ တစ်ယောက်ကို (၅) သိန်း ကျပ်တောင်းခဲ့တယ်။ တက်နိုင်တဲ့သူတွေကပေးတယ်။ မတက်နိုင်တဲ့သူကတော့ နည်းနည်းပဲပေးတယ်။ ဒါပေမယ့် ပေးလည်းမထူးဘူး။ မပေးလည်းမထူးဘူး။ ထောင်ချလိုက်တာပဲ” ဟု အထက်ပါ အမျိုးသမီး ကဆိုသည်။
လက်ရှိ ဖမ်းခံထားရသည့် ရွာသားများကို စစ်ကောင်စီ အုပ်စုမှ (PDF) ထောက်ပို့ဟု စွပ်စွဲပြီး ထောင်ချလိုက်ခြင်းဖြစ်သည်။
ထို ရွာငံဗျူစောထီးအဖွဲ့သည် ၂၀၂၂ ခုနှစ် ဇန်နဝါရီလပိုင်းတွင် ဓနုတပ်မတော်အဖွဲ့ ဟု ဖွဲ့စည်းခဲ့သည်။
၂၀၂၂ ခုနှစ် ဖေဖော်ဝါရီ မှ ဧပြီလ အထိ စစ်ကောင်စီမှ ရွာငံ ပြည်သူ ၁၀ ဦးကို ရက်စက်စွာ သတ်ဖြတ်ခြင်းများ ပြုလုပ်သည့်အပြင် ပြည်သူ (၇) ဦးကို ဖမ်းဆီးခဲ့ပြီး နေအိမ် (၈) လုံးကို မီးရှို့ဖျက်ဆီးခဲ့ကြောင်း ရှမ်းလူ့အခွင့်အရေး မဏ္ဍိုင် SHRF ကလည်း ထုတ်ပြန်ချက်မှာ ရေးသားထားသည်။
Leave a Comments