သျှမ်းပြည် ညောင်ရွှေမြို့နယ် အင်းလေးဒေသမှ ဖမ်းဆီးခေါ်ဆောင်ခံရသည့် မိသားစုဝင် ၄ ဦးထဲမှ ကလေးနှစ်ဦး ပြန်လည် လွှတ်လာပြီး၊ မိဘ ၂ ဦး ဖမ်းဆီးထားဆဲကြောင်း စုံစမ်းသိရသည်။

.

ပြည်သူ့ကာကွယ်ရေးတပ်ဖွဲ့ PDF နှင့် ပတ်သက်သည်ဟု စွပ်စွဲပြီး စစ်ကောင်စီတပ်သား နှင့် ရဲတပ်ဖွဲ့တို့ သြဂုတ် ၂၈ ရက် ညနေပိုင်းတွင် အင်းလေး သပြေပင်သစ် အမှတ် (၃) ကျေးရွာနေ မိသားစု ၄ ဦးကို ဖမ်းဆီးခဲ့သည်။

ထို့ဖမ်းဆီးမှုအပြီး မိသားစုဝင် (၄) ဦးမှ အသက် ၁၈ နှစ်အရွယ် အမျိုးသမီး နှင့် အသက် ၁၅ နှစ်အရွယ် အမျိုးသားလူငယ်တစ်ဦးကို သြဂုတ် ၃၁ ရက်တွင် ပြန်လည်လွတ်ပေးခဲ့ရာ မိဘ (၂) ဦးကို လက်ရှိအချိန်ထိ မည်သည့်နေရာတွင် ဖမ်းဆီးချုပ်နှောင်ထားသည်ကို မသိရှိရသေးကြောင်း ၎င်းနှင့် နီးစပ်သူ အမျိုးသမီး တဦးက သျှမ်းသံတော်ဆင့်ကို ပြောသည်။

“ကလေးနှစ်ယောက်တော့ ပြန်လွတ်လာပြီ။ သူ့အဖေ၊ အမေတွေတော့ ပြန်မလွတ်လာသေးဘူး။ သတင်းလည်း လုံးဝ အစအန မရဘူး။ ကလေးတွေကတော့ အိမ်ပြန်ရောက်သွားတယ်။ သူတို့ စိတ်အခြေအနေက အရမ်းကိုကြောက်နေတာ။ ဘာမှမပြောရဲဘူး။ သူတို့ဆွေမျိုးတွေလည်း ကြောက်နေတယ် “ ဟု ၎င်း အမျိုးသမီးတစ်ဦးက ပြောသည်။

အင်းလေးအမျိုးသမီးသမဂ္ဂ အဖွဲ့အစည်းမှ အမည်မဖော်လိုသူတစ်ဦးက စစ်တပ်က အာဏာသိမ်းပြီးနောက်ပိုင်း အင်းလေးဒေသတွင် ဖမ်းဆီးခံရသည့် အမျိုးသမီးများရှိပြီး အချို့သည် ပြန်လည်လွတ်မြောက်လာသော်လည်း တချို့မှာ တောင်လေးလုံးထောင်အတွင်း ပြန်လည် ဖမ်းဆီးခံထားရဆဲကြောင်း ဆိုသည်။

“အမျိုးသမီးတွေရဲ့ ဘဝက လုံးဝ လုံခြုံမှုမရှိဘူး။ အချိန်မရွေး ထိခိုက်အန္တရာယ်ရှိနိုင်တဲ့ အခြေအနေပါ။ ညဖက်သွားလာဖို့ မပြောနဲ့၊ အိမ်မှာနေရင်တောင် အချိန်မရွေး အန္တရာယ်ရှိတယ်။ အချိန်မတော် ဝင်ရောက်ဖမ်းဆီး ခေါ်ဆောင်မှုတွေရှိပြီး အမျိုးသမီးတွေအတွက် အကာအကွယ် မဲ့နေလို့ပါ “ ဟု ၎င်းအင်းလေးအမျိုးသမီး သမဂ္ဂမှ အဖွဲ့အစည်းမှ အမည်မဖော်လိုသူတစ်ဦးက ပြောသည်။

ပြီးခဲ့သည့် ဇန်နဝါရီ ၂၃ ရက်တွင် အင်းလေးဒေသ ဟဲယာရွာမကျေးရွာဘက် ညကင်းလှည့်သည့် စစ်ကောင်စီ တပ်ဖွဲ့နှင့် ဗျူစောထီးတို့ သေနတ်ဖြင့် ရမ်းသမ်းပစ်ခတ်မှုကြောင့် ကလေးချော့တိတ်နေသည့် နေအိမ်ထဲရှိ အမျိုးသမီးတစ်ဦး၏ နားထင်ကို သေနတ်ကျည်ဆံ ထိမှန်ကာ သေဆုံးခဲ့သည်။

ထို့အပြင် စစ်တပ်က အာဏာသိမ်းပြီးနောက်ပိုင်း အင်းလေးဒေသတွင် ပြည်သူများ၏ လုံခြုံရေး အခြေအနေသည် ၈၉ ရာခိုင်နှုန်း မရှိကြောင်း အင်းလေးဒေသ အဖွဲ့အစည်းဖြစ်သည့် JMC- Innlay မှ စုစည်းထားသည့် သတင်းအချက်အလက် သိရသည်။