သျှမ်းပြည်တောင်ပိုင်း၊ ညောင်ရွှေမြို့နယ် အင်းလေးဒေသတွင် ရေတက်လာသောကြောင့် ဝက်သေများ မျောပါလာပြီး ရောဂါကူးစက်မည်ကို စိုးရိမ်ကြကြောင်း သိရသည်။

ပြီးခဲ့သည့် ဇူလိုင်လ ၁၀ ရက်မှစပြီး အင်းလေးဒေသတွင် မိုးရက်ဆက် ရွာသွန်းမှုကြောင့် ရေတက်လာပြီး ဝက်နာရောဂါဖြင့် သေဆုံးသည့်ဝက်များကို မြုပ်နှံထားရာမှ အဆိုပါ ရေကြီးမှုကြောင့် ပြန်လည်မျောပါလာခဲ့သည်။

ထိုသို့ မျောပါလာသောကြောင့် ရေများမှတဆင့် ဒေသခံများကို ရောဂါကူးစက်မည်ကို စိုးရိမ်ကြပြီး ဝက်သေများကို အမြန်ဖယ်ရှားရန် လိုအပ်နေကြောင်း သိရသည်။

“ဒီလဆိုရင် ရေကတက်နေကြပဲ ၊အခုလည်း ရေတက်လာပီ ၊ရေတက်လာတော့ အရင်က ဝက်နာကြောင့် သေလို့ ဝက်တွေမြှုပ်ထားတာ အခုပြန်ပေါ်လာပြီး ရေကြီးတော့ မျောပါလာတာ၊ ကျွန်းမျှောနဲ့ ခံပြီး ပုတ်နေတာ ရေဆိုနံကလည်း နံနဲ့ အဲကနေ တဆင့် ရောဂါတွေ ပြန်ကူးမှာ စိုးရိမ်တယ်၊ နောက်ပြီး တချို့အိမ်သာဆိုလည်း စနစ်တကျ မလုပ်ထားတော့ ရေကြီးရင် အကုန်မျောဆိုတော့ ရေက ပိုညစ်ညမ်းတယ်။”ဟု အင်းလေးဒေသခံ အမျိုးသားတစ်ဦးက ပြောသည်။

ထို့အပြင် အဆိုပါ ဝက်သေများကို နီးစပ်ရာ ကျေးရွာများက ဆယ်ယူ၍ သွားရောက်စွန့်ပစ်မှုများ ရှိသော်လည်း တချို့သော ကျေးရွာများတွင် ဆယ်ယူသူမရှိသောကြောင့် ပုတ်သိုးနေကြောင်း ၎င်းအမျိုးသားက ပြောသည်။

အဆိုပါ ဝက်သေများမှတဆင့် ငါးများကိုပါ ကူးစက်ရောဂါများ ဖြစ်ပွားပြီး ဖမ်းယူစားသောက်မိလျှင် လူတွေကိုပါ အသက်အန္တရာယ်ဖြစ်စေနိုင်သောကြောင့် ဒေသခံများ အနေဖြင့် အတူတကွ ပူးပေါင်းထိန်းချုပ်ရန် လိုအပ်ကြောင်း ဒေသခံ အမျိုးသားတစ်ဦးက အကြံပြုပြောထားသည်။

“ဝက်တွေက အရေခွံတွေကျွတ်ကျပြီး သေဆုံးကုန်တာများတယ်၊ ဝက်နာရောဂါလို့ ဆရာဝန်တွေက ပြောတယ်၊ အဲဒီဝက်သေတွေက အခု ရေထဲမှာ မျှောနေတော့ ငါးတွေက စားတယ်၊ ငါးတွေကနေတဆင့် လူတွေကို ကူးစက်တာမျိုးလည်း ဖြစ်နိုင်တယ် ဝက်သေတွေကို သွားမြုပ်ဖို့ တချို့ ဂိတ်တွေကလည်း သွားလာခွင့် ပြုပေးဖို့ လိုအပ်တယ်။ဒီတိုင်းဆို ရေညစ်ညမ်းမှုက ပိုဆိုးလာမှာ။”ဟု အဆိုပါ ဒေသခံ အသက် (၃၀)ကျော် အမျိုးသားတစ်ဦးက ပြောသည်။

ဆက်လက်ပြီး အင်းလေးတွင် ရေတက်လာသောကြောင့် စပါးခင်းနှင့် ခရမ်းစိုက်ခင်းများ နစ်မြုပ်ပျက်စီးကုန်ပြီး အရင်းနှီးများ ဆုံးရှုံးသွားကြောင်း သိရသည်။

ပြီးခဲ့သည့် ဇွန်လ ဒုတိယပတ်မှစပြီး သျှမ်းတောင်တွင် မိုးများ ရက်ဆက်ရွာသွန်းခဲ့ပြီး တောင်ကြီး၊ ကလော၊ ညောင်ရွှေဘက်မှ ရေများသည် အင်းလေးဒေသထဲသို့ စီးဝင်သောကြောင့် အင်းလေးဒေသမှာ ရေကြီးလျှံမှုများ ဖြစ်ပေါ်ခဲ့သည်။

ထိုသို့ ရေကြီးရေလျှံမှုကြောင့် သောက်သုံးရေ ရရှိမှုခက်ခဲပြီး သုံးစွဲရန် ရေများသည် သန့်ရှင်းမှုမရှိသောကြောင့် ငှက်ဖျားရောဂါ နှင့် ဝမ်းပျက်ဝမ်းလျောရောဂါများ ဖြစ်ပွားသူများလာကြောင်း သိရသည်။

အင်းလေးဒေသသည် ရေဘေး၊ လေဘေး နှင့် ငလျင်ဘေး စသည့် သဘာဝဘေးအန္တရာယ်များ အများဆုံးခံရသော ဒေသဖြစ်လာသည်။