သျှမ်းပြည် သီပေါမြို့နယ်တွင် ဖြတ်သန်းစီးဆင်းသွားသည့် ဒုဋ္ဌဝတီမြစ်ခေါ် မြစ်ငယ်မြစ် စံချိန်တင် ရေမြှင့်တက်လာခြင်းကြောင့် အနိမ့်ပိုင်းရပ်ကွက်ရှိ နေအိမ်များ စတင်ရွှေ့ပြောင်းနေရကြောင်း စုံစမ်းသိရသည်။

ယခုရက်ပိုင်း မိုးသည်းထန်စွာ ရွာသွန်းမှုကြောင့် ယမန်နေ့ (ဩဂုတ်လ ၄ ရက်) ညပိုင်းမှ စတင်ပြီး ဒုဋ္ဌဝတီမြစ်ရေ မြင့်တက်လာခြင်းကြောင့် သီပေါမြို့ပေါ် အနိမ့်ပိုင်းရပ်ကွက် မြစ်ကမ်းဘေးရှိ ပန်းတိမ်တောင်နှင့် ဈေးရပ်ကွက်များမှ ပြည်သူများ စတင်ရွှေ့ပြောင်းနေရကြောင်း သီပေါမြို့ခံများက ပြောသည်။

“မိုးကတော့ မနေ့ကရော သည်းနေတာ၊ ဒီညနေမှ နည်းနည်းတိတ်သွားတယ်။ မြစ်ရေကတော့ စံချိန်တင်လို့ ပြောရမယ်ထင်တယ်၊ တံတားကြီးနဲ့ ထိဖို့က ပေနည်းနည်းပဲ လိုတော့တယ်။ အခု မြစ်ဘေးက အနိမ့်ပိုင်းဘက်ရောက်တဲ့ ပန်းတိမ်တောင်နဲ့ ဈေးရပ်ကွက်က လူတွေကို ပရဟိတတွေ သွားကူရွှေ့ပေးနေတယ်” ဟု သီပေါဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

ဒုဋ္ဌဝတီမြစ်ရေ အဆမတန် မြင့်တက်လာခြင်းကြောင့် မိဘပြည်သူများ အသက်အန္တရာယ် ဖြစ်ပေါ်လာနိုင်သဖြင့် မြစ်အတွင်း စက်လှေများ ဖြတ်သန်းသွားလာမှုကို ပိတ်ထားကြောင်း သီပေါမြို့နယ် ပြည်သူ့လွှတ်တော်ကိုယ်စားလှယ် ဦးကောင်းသက်စံ က ၎င်းဖေ့စ်ဘုတ်လူမှုကွန်ရက်တွင် သတိပေးထားသည်။

ဒုဋ္ဌဝတီမြစ် စိုးရိမ်ရေမှတ်သည် ၆၀၀ စင်တီမီတာဖြစ်ပြီး ရေကြီးရေလျှံမှု အချိန်မရွေး ကြုံ့တွေ့လာနိုင်ခြင်းကြောင့် ရေဝင်ရောက်နိုင်သည့် မြေနိမ့်ပိုင်းရပ်ကွက်နှင့် မြစ်ချောင်းဘေးရှိ နေအိမ်များ ကြိုတင်ရွှေ့ပြောင်းထားရန် ဆောင်ရွက်နေကြောင်း သိရသည်။

“အဓိကတော့ ဇက်နဲ့ ကုန်ကူးတဲ့လူတွေကို စိုးရိမ်ရတာ၊ လူတွေကတော့ တံတားပေါ် အချိန်ပိုင်း ပေးဖြတ်နေတယ်။ အရင်လကလည်း စက်လှေကူးတဲ့ချိန် မှောက်ပြီး ကားကော လူကော ပျောက်တာ ဖြစ်ဖူးတော့ တော်တော် သတိထားရတယ်။ တာလုံဘက် လှေမှောက်တုန်းက လူ ၅ ယောက် ပါသွားတာ၊ တစ်ယောက်ပဲ အလောင်းပြန်ရတယ်” ဟု သီပေါဒေသခံ ၎င်းအမျိုးသမီးက ဆက်ပြောသည်။

လက်ရှိတွင် ဒုဋ္ဌဝတီမြစ် ခေါ် မြစ်ငယ်မြစ်ပေါ်တွင် ဆောက်လုပ်နေပြီး သျှမ်းပြည် လူထုအသိုင်းအဝန်းများက တောက်လျှောက် ဆန့်ကျင်ကန့်ကွက်ခဲ့သည့် အထက်ရဲရွာ ရေအားလျှပ်စစ် စီမံကိန်းကို ၂၀၂၉-၂၀၃၀ ခုနှစ်တွင် အပြီးသတ် လုပ်ဆောင်မည်ဟု စစ်အစိုးရဘက်မှ ဩဂုတ်လ ၃ ရက်နေ့ထုတ် မြန်မာ့အလင်း သတင်းစာတွင် ဖော်ပြထားသည်။