သျှမ်းပြည် ကျောက်မဲမြို့နယ် နောင်ပိန်ကျေးရွာတွင် မိုးသည်းထန်စွာ ရွာသွန်းမှုကြောင့် ရေကြီးရေလျှံဖြစ်ပွား၍ ကားတစ်စီး ရေထဲမျှောပါသွားပြီး လူနှစ်ဦး ပျောက်ဆုံးနေကြောင်း စုံစမ်းသိရသည်။
ယနေ့ (ဩဂုတ်လ ၆ ရက်) နေ့လယ်ပိုင်းမှ စတင်ပြီး ကျောက်မဲမြို့နယ်အတွင်း မိုးသည်းထန်စွာ ရွာသွန်းခဲ့ပြီး နောင်ပိန်ကျေးရွာအနီး လုပ်ပါရေကန် ကျိုးပေါက်ခြင်းကြောင့် (၅) ရပ်ကွက်ရှိ နောင်ပိန်-ပုံဝိုးလမ်းမကြီးတွင် ရေကြီးရေလျှံဖြစ်ပွားနေသည်။
ထိုစဉ် ရေကျော်နေသည့် လမ်းမပေါ် ဖြတ်မောင်းသွားသည့် ကားတစ်စီး ရေထဲမျှောပါသွားပြီး ကားထဲတွင်ပါသည့် လူနှစ်ဦးပျောက်ဆုံးနေကြောင်း ဒေသခံများက ပြောသည်။
“မိုးက တနေကုန်ရွာတော့ ညနေပိုင်းရောက်တော့ ၅ ကွက်က ရွှေလမင်းဆီဆိုင်နား လယ်တွေ ရေမြှုပ်ကုန်တာ။ ရေစီးသန်နေတဲ့ချိန် လမ်းပေါ်ဖြတ်သွားတဲ့ ကားတစ်စီး ရေထဲမျှောသွားတယ်၊ ကားပေါ် လူနှစ်ယောက်ပါတယ်ပြောလို့ ရှာနေတာ မတွေ့သေးဘူး။ ၁၅ နှစ်အတွင်း လုပ်ပါကန် ရေလျှံပြီး အခုလို ရေကြီးတာပဲ”ဟု နောင်ပိန်ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ရေစီးနှင့်အတူ မျှောပါသွားသည့် လူနှစ်ဦးကို နောင်ပိန်ရွာရှိ ဒေသခံများနှင့် ကမ်းလင့်လက်များ လူမှုကူညီရေးအသင်း တာဝန်ရှိသူများမှ ရှာဖွေလျက်ရှိပြီး လက်ရှိအချိန်ထိ ရှာမတွေ့သေးဘဲ ရေထဲဖြတ်သန်းသွားလာခြင်း မပြုလုပ်ရန် သတိပေးထားသည်။
နောင်ပိန်ကျေးရွာအနီးရှိ လုပ်ပါရေကန် ကျိုးပေါက်ခြင်းကြောင့် ရပ်ကွက်(၅) ရှိ နေအိမ်များလည်း ရေနစ်မြှုပ်လျက်ရှိပြီး ရေကြီးမှုဖြစ်စဉ်ကြောင့် ပြောင်းဖူးခင်း၊ ကြံခင်းနှင့် စပါးခင်း ဧကများစွာ ရေနစ်မြှုပ်ကာ ဆုံးရှုံးမှုများနိုင်ကြောင်း ဒေသခံများထံမှ သိရသည်။
အလားတူ နောင်ပိန်ကျေးရွာအတွင်း အနိမ့်ပိုင်းရှိ ရပ်ကွက်(၃) နှင့် ရွာလယ်လမ်းမကြီးတစ်လျှောက် နေအိမ်များထဲ တောင်ကျရေ ဝင်ရောက်လာကြောင်း ဒေသခံများထံမှ သိရသည်။
ကျောက်မဲမြို့နယ်ရှိ နောင်ပိန်တိုက်နယ်အတွင်း ရောက်ရှိနေသည့် နောင်ချို၊ ကျောက်မဲနှင့် သီပေါမြို့တို့မှ စစ်ဘေးရှောင်များမှာ ရေဘေးကြောင့် နေရာထပ်မံပြောင်းရွှေ့ရသူများလည်း ရှိနေပြီး စစ်ရှောင်စခန်း (၇) နေရာတွင် ယခင်က စစ်ရှောင်ဦးရေ တစ်သောင်းခန့် ရှိရာမှ လက်ရှိတွင် ၂၀၀၀ ကျော် ကျန်ရှိနေသေးကြောင်း စစ်ရှောင်ကူညီသူများက ပြောသည်။
ပြီးခဲ့သည့် ဇူလိုင်လ နောက်ဆုံးပတ်အတွင်း၌ နောင်ချိုစစ်ကောင်စီတပ်သည် ဂုတ်ထိပ်တဖက်ကမ်းရှိ ကျောက်မဲမြို့နယ် SSPP/SSA ထိန်းချုပ်သည့် နောင်ပိန်ကျေးရွာအတွင်းသို့ လက်နက်ကြီးနှင့် ဒရုန်းတို့ဖြင့် ပစ်ခတ်တိုက်ခိုက်ခဲ့ခြင်းကြောင့် အရပ်သား (၄) ဦး သေဆုံးပြီး (၁၀) ဦးထက်မနည်း ထိခိုက်ဒဏ်ရာရှိခဲ့ကြောင်း ဒေသခံများထံမှ သိရသည်။
ပုံစာ – နောင်ပိန်(၅)ရပ်ကွက်တွင် ရေကြီးရေလျှံပြီး ကားတစ်စီး ရေစီးနှင့်မျှောပါ လူနှစ်ဦးပျောက်ဆုံး (ဓာတ်ပုံ-ဒေသခံ)
Leave a Comments