သျှမ်းပြည်တောင်ပိုင်း ဟိုပုံးမြို့တွင် မိုးသည်းထန်စွာ ဆက်တိုက်ရွာသွန်းမှုကြောင့် ယနေ့ (ဩဂုတ်လ ၁၀ ရက်) နံနက်ပိုင်းမှစတင်ကာ မြို့ပေါ်ရှိ မြေနိမ့်ပိုင်းရပ်ကွက်များအတွင်း ရေကြီးရေလျှံမှုများ ဖြစ်ပေါ်လျက်ရှိကြောင်း သိရသည်။

ပြီးခဲ့သည့် ဩဂုတ်လ (၉) ရက်နေ့ ညပိုင်းမှစတင်ကာ မိုးအဆက်မပြတ် ရွာသွန်းခဲ့ခြင်းကြောင့် ယခုကဲ့သို့ ရေဝင်ရောက်မှုများ ဖြစ်ပေါ်လာခြင်းဖြစ်ပြီး၊ မြို့ပေါ်ရပ်ကွက်အချို့ရှိ လမ်းမများနှင့် နေအိမ်အချို့အတွင်းသို့ ရေများဝင်ရောက်လျက်ရှိသည်။

လက်ရှိအချိန်အထိ ရေကြီးမှုကြောင့် ထိခိုက်ပျက်စီးမှု အခြေအနေအသေးစိတ်နှင့် လူအသေအပျောက် ရှိ၊ မရှိကို မသိရသေးပေ။

ယခုရက်ပိုင်းအတွင်း သျှမ်းပြည်ဒေသတွင်း မိုးရွာသွန်းမှု များပြားနေခြင်းကြောင့် မြစ်ချောင်းများ ရေလျှံခြင်းနှင့် မြေနိမ့်ပိုင်း ရေကြီးခြင်းအန္တရာယ်များကို သတိပြုရန် မိုးလေဝသနှင့် ဇလဗေဒဆိုင်ရာ ခန့်မှန်းချက်များကလည်း သတိပေးထားသည်။