မြန်မာ – တရုတ်နယ်စပ်ဒေသ မူဆယ်ဂိတ်များတွင် နှစ်နိုင်ငံဝင်ထွက်ခွင့်တစ်ခါသုံးကတ်ကို ယနေ့ (စက်တင်ဘာ ၄) ရက်မှစ၍ စတင်ပြုလုပ်ပေးနေကြောင်း စုံစမ်းသိရသည်။
.
ယနေ့ (စက်တင်ဘာလ ၄ ရက်) နေ့လယ် ၁၂ နာရီအချိန်တွင် မြန်မာ – တရုတ်နယ်စပ်ဒေသ မူဆယ်မြို့နယ်ရှိ နန်းတော်ဂိတ်၊ မန်ဝိန်းဂိတ် နှင့် ဆင်ဖြူဂိတ်တွင် မြန်မာနိုင်ငံသားကတ် (မှတ်ပုံတင်) ကိုင်ဆောင်ထားသူများ မည်သူမဆို နှစ်နိုင်ငံဝင်ထွက်ခွင့် တစ်ခါသုံးကတ် (TBP) ကို စတင်ပြုလုပ်ပေးနေကြောင်း မူဆယ်မြို့ဒေသခံ အမျိုးသားတစ်ဦးက ပြောသည်။
“ဒီနေ့ကစပြီး တကယ်လုပ်ပေးတာဗျ။ သွားလုပ်တဲ့သူတွေ အများကြီးပဲ တန်းစီနေရတယ်။ အဓိက ဆင်ဖြူဂိတ်နဲ့ နန်းတော်ဂိတ်တွေမှာ လုပ်ပေးနေတယ် “ ဟု ၎င်းဒေသခံတစ်ဦးက ပြောသည်။
အဆိုပါ နှစ်နိုင်ငံဝင်ထွက်ခွင့် တစ်ခါသုံးကတ် TBP ကို ပြုလုပ်ပါက တစ်ဦးလျှင် ကျပ်ငွေ ၂ ထောင်ကျော် ပေးဆောင်ရပြီး သက်တမ်း ၆ ည ၇ ရက် ရရှိကာ တရုတ်နိုင်ငံ ရွှေလီမြို့ထိ ဝင်ခွင့်ရသည်။
အလားတူ ဂိတ်များကိုလည်း မနက် ၆ နာရီခွဲမှ ည ၈ နာရီအထိ သတ်မှတ်၍ ဖွင့်လှစ်ပေးကြောင်း သိရသည်။
“ အခုလို ကတ်တွေပြန်လုပ်ပေးနေပြီ၊ နှစ်နိုင်ငံဝင်ထွက်ပေးတော့ အလုပ်လုပ်ချင်တဲ့သူတွေအတွက်တော့ ကောင်းတာပေါ့။ အခုလည်း အလုပ်မရှိဘူး။ တရုတ်ပြည်ကို သွားချင်တဲ့လူတွေ အများကြီးပဲလေ “ ဟု မူဆယ်မြို့ဒေသခံ အလုပ်သမားတစ်ဦးက ပြောသည်။
ထို့အပြင် တရုတ်နယ်စပ်ဒေသရှိ ဂိတ်များကို စစ်တပ်က အာဏာသိမ်းချိန် ၂၀၂၁ ဧပြီလပိုင်းမှစ၍ ပိတ်ထားခဲ့ရာ ၃ နှစ်ကျော်ကာလအတွင်း ယခုလို နှစ်နိုင်ငံဝင်ထွက်ခွင့် ကတ်ကို ပြုလုပ်ပေးပြီး တရုတ်ပြည်ဝင်ခွင့်ပေးနေကြောင်း သိရသည်။
