သျှမ်းပြည် တောင်ကြီးမြို့နယ်မှ အငြိမ်းစားယူထားသည့် ဆရာမ (၁၀) ဦးကျော် ငွေသိန်းပေါင်း ရာချီ လိမ်လည်ခံလိုက်ရကြောင်း စုံစမ်းသိရှိရသည်။
.
ကိုယ်ပိုင်ကျောင်း တည်ဆောက်ရန်အတွက် တောင်ကြီးမြို့ ကန်ကြီးရပ်ကွက်မှာ ဖွင့်လှစ်ထားသည့် ငွေအိမ်နန်း ကိုယ်ပိုင်ကျောင်း တည်ထောင်သူ ဒေါ်နွဲ့နွဲ့ရီ သည် အငြိမ်းစားဆရာမများ၊ ကျောင်းအုပ်ဆရာမများထံ ချေးငွေယူပြီး အတိုး နှင့် ဆပ်မည်ဟု ဆိုကာ ချေးယူခဲ့ကြောင်း သိရသည်။
“ ကျမကတော့ ငွေကျပ်သိန်း ၃၀၀ လောက်ပါသွားတယ်လေ။ မြို့နယ် ပညာရေးမှူးတွေဆီကနေလည်း ပိုက်ဆံချေးပြီး မြေဝယ်လိုက်တယ်။ မြေဝယ်ပြီး ဘော်ဒါထောင်တာ။ ဆောက်လုပ်ရေးသမားတွေ ငှားပြီးတော့ အခု လေးထပ်တိုက်ကြီး နဲ့ အခုသွားကြည့်လိုက် အမှုရင်ဆိုင်နေရတယ်။ အဲ့ဒီ အကြွေးတွေလည်း မဆပ်ဘူး။ အိမ်ဆောက်ပစ္စည်းတွေဝယ်တဲ့ဟာတွေလည်း မဆပ်ဘူး။ ဆောက်လုပ်ရေးသမား တွေဆီကလည်း မဆပ်ဘူး။ ဆရာ၊ ဆရာမတွေကိုလည်း မဆပ်ဘူး။ ကျမက အငြိမ်းစား ဆရာမ တစ်ဦးပါ။ အခုက သမီးနဲ့လိုက်နေတာ။ အခုတော့ သူထွက်ပြေးသွားပြီ” ဟု အငြိမ်းစား ဆရာမ တစ်ဦး ကပြောသည်။
ငွေအိမ်နန်း ကိုယ်ပိုင်ကျောင်းကို ၂၀၁၆ – ၂၀၁၇ ခုနှစ်မှ စတင်တည်ထောင်ခဲ့ပြီး ၂၀၁၈ -၂၀၁၉ ခုနှစ်မှာ ကျောင်းစတင်ဖွင့်လှစ်ခဲ့ကြောင်း သိရှိရသည်။
“ငွေအိမ်နန်းကျောင်းကဆိုရင် သူတို့ကို သူတို့ အချင်းချင်း ယုံကြည်မှု နဲ့ အပေးယူ လုပ်တာထင်တယ်။ အခုက ငွေအိမ်နန်းကလည်း ကိုဗစ် ဖြစ်ကတည်းက ကျောင်းမဖွင့်ရလို့ အဆင်မပြေဘူးနဲ့တူတယ်။ တစ်ယောက်နဲ့ တစ်ယောက်ပြန်ပေးဆပ်ဖို့က နှောင့်နှေးသွားတယ်ထင်တယ်။ အဲ့လိုပဲ ရှိတာပါ။ ကိုဗစ် စဖြစ်ကတည်းက ပိတ်ခံလိုက်ရတာလေ။” ဟု တောင်ကြီးမြို့ ကန်ကြီးရပ်ကွက်နေ ဒေသခံ တစ်ဦးက ပြောသည်။
လက်ရှိ ငွေအိမ်နန်း ကိုယ်ပိုင်ကျောင်းကို မြန်မာ့စီးပွားရေးဘဏ်တွင် ပေါင်ထားကြောင်းလည်း စုံစမ်းသိရှိရသည်။
“အငြိမ်းစား ဆရာမတွေ အပြင် တစ်ခြားဒေသခံတွေထံကနေလည်း ငွေချေးငှားပြီးတော့ တည်ထောင်ပြီး အကြွေးမဆပ်ပဲ အခုထွက်ပြေးသွားခဲ့ပြီလို့ သိရတယ်။” ဟု အငြိမ်းစား မြို့နယ်ပညာရေးမှူးက ပြောသည်။
လက်ရှိ ငွေလိမ်လည်မှုသည် အချင်းချင်းကြား ယုံကြည်မှုကြောင့် ဖြစ်သွားသည့် ကိစ္စဖြစ်နိုင်ကြောင်း
၊ ငွေအိမ်နန်း ကိုယ်ပိုင်ကျောင်း တည်ထောင်သူ ဒေါ်နွဲ့နွဲ့ရီ သည် ငွေသိန်းပေါင်း ၇ ထောင်နီးပါး အကြွေးတင်ပြီး လက်ရှိမှာ ထွက်ပြေးသွားပြီဖြစ်ကြောင်းလည်း သိရသည်။
“အားလုံးပေါင်း ၆ ထောင် ၇ ထောင်လောက် ပါကြမှာပါ။ ဒါမဲ့ ကျမတို့က အငြိမ်းစား ဖြစ်တဲ့အတွက် ကျမတို့ရဲ့ သေစာရှင်စာတွေကို စုထားတာလေ။ အငြိမ်းစား ယူထားတာကြောင့် ကျမတို့ ပိုက်ဆံကို ကျမတို့ နှမြောတယ်လေ။ မစားရက်မသောက်ရက် စုထားတာလေ။ အငြိမ်းစားယူတဲ့သူတွေ ၁၀ ဦးလောက်ရှိတယ်။ ဖွံ့ဖြိုးရေးကျောင်းဆင်းတွေ လိမ်တယ်ဆိုတာ အမိတက္ကသိုလ်က မွေးထုတ်ပေးလိုက်တဲ့ တက္ကသိုလ်နာမည်လည်းပျက်တယ်။ ကိုယ့်အဖွားအရွယ်တွေကို ဒီမျိုးလိမ်တာဟာ ဒါသမိုင်းရိုင်းတယ်။ ရာဇာဝင်လည်းရိုင်းတယ် သမိုင်းလည်းရိုင်းတယ်။ ပညာရေးဝန်ထမ်းအချင်းချင်း ၊ စီးပွားရေး သမားလည်း မဟုတ်ဘူး။ ဘယ်လိုခံစားရလဲဆိုရင်တော့ အစိမ်းလိုက်ဝါးစားချင်တာပေါ့” ဟု အထက်တန်းပြ အငြိမ်းစားဆရာမ က သျှမ်းသံတော်ဆင့် ကိုပြောသည်။
ဒေါ်နွဲ့နွဲ့ရီ သည် စစ်ကိုင်း ဖွံ့ဖြိုးရေး သင်တန်းကျောင်းဆင်း တစ်ဦးဖြစ်ပြီး စစ်ကိုင်းတိုင်း ဟုမ္မလင်းမြို့နယ် က ဒေသခံ တစ်ဦးဖြစ်ကြောင်းလည်း သိရသည်။
စစ်တပ်မှ အာဏာသိမ်းပြီးနောက်ပိုင်း စီးပွားရေး ကျဆင်းလာမှုကြောင့် ငွေလိမ်လည်မှု နည်းမျိုးစုံ ပေါ်ထွက်လာခဲ့သည်။
