သျှမ်းပြည် မူဆယ် – နမ့်ခမ်းကြား ကားလမ်းမပေါ်ရှိ နောင်ဆိုင်ရွာအနီးတွင် စစ်ကောင်စီ နှင့် တအာင်း (ပလောင်) အမျိုးသားလွတ်မြောက်ရေး တပ်မတော် (TNLA) တို့ စစ်ရေးတင်းမာနေသဖြင့် ပြည်သူများ ဖြတ်သန်းသွား လာခွင့် မရကြောင်း စုံစမ်းသိရသည်။

.

ယနေ့ (သြဂုတ် ၁၆) ရက် နံနက် ၉ နာရီဝန်းကျင်တွင် မူဆယ် – နမ့်ခမ်းကြား ကားလမ်းမပေါ်ရှိ နောင်ဆိုင်ကျေးရွာအုပ်စုတွင် စစ်ကောင်စီ နှင့် TNLA တို့ စစ်ရေးတင်းမာနေလျက်ရှိသောကြောင့် စစ်ကောင်စီဘက်မှ ဖြတ်သန်းသွားခွင့် တားမြစ်ထားကြောင်း ကိုယ်တိုင်ကြုံတွေ့ရသည့် ဒေသခံတစ်ဦးက ပြောသည်။

“နောင်ဆိုင်ရွာထဲမှာ စစ်ကောင်စီတပ်တွေ ရှိတယ်။ ကိုင်းတော်ရွာ (ဝၢၼ်ႈၵၢႆးတူဝ်ႇ) ဘက်မှ TNLA တွေရှိနေတယ်။ သူတို့ စစ်ရေး တင်းမာနေတာ။ စစ်ကောင်စီဘက်ကလည်း ဒီလမ်းကို ဖြတ်ပြီး မသွားလာဖို့ တားမြစ်ထားတယ် “ ဟု ၎င်း ဒေသခံတစ်ဦးက ပြောသည်။

လက်ရှိမှာ စစ်ကောင်စီတပ်သည် နောင်ဆိုင်ကျေးရွာအုပ်စုထဲကို အင်အား ထပ်မံဖြည့်တင်းနေလျက်ရှိပြီး TNLA က နမ့်ခမ်းမြို့ဘက်မှ တောက်လျောက် စစ်အင်အား ဖြည့်တင်းလာနေကြောင်း သိရသည်။

ယင်းကဲ့သို့ နှစ်ဖက်တပ်ဖွဲ့ အပြိုင်အဆိုင် စစ်အင်အားဖြည့်တင်းပြီး စစ်ရေးတင်းမာနေလျက်ရှိသော်လည်း အပြန်အလှန် ပစ်ခတ်တိုက်ခိုက် တိုက်ပွဲများ မဖြစ်ပွားသေးပေ။

“အခု ကျနော်တို့ ပြည်သူတွေက စိုးရိမ်နေကြတယ်။ ကြောက်လည်း ကြောက်နေကြတာပေါ့။ သတိထားပြီး နေနေရတယ်။ သူတို့နှစ်တပ်က ဟိုဘက် ဒီဘက်နဲ့ လှမ်းမြင်နေတာ ပစ်ခတ်မှုတွေတော့ မရှိသေးဘူး “ ဟု ၎င်း ဒေသခံတစ်ဦးက ထပ်လောင်းပြောသည်။

ပြီးခဲ့သည့် ဇူလိုင် ၂၉ ရက် စယ်လန့်ကျေးရွာအတွင်း စစ်ကောင်စီနှင့် TNLA တို့ တိုက်ပွဲဖြစ်ပွားပြီးနောက်ပိုင်း နှစ်ဖက်တပ်ဖွဲ့သည် အပြိုင်အဆိုင် အင်အားဖြည့်တင်းနေလျက်ရှိရာ လက်ရှိအချိန်ထိ စစ်ရေးတင်းမာနေ သောကြောင့် တိုက်ပွဲများဖြစ်ပွားလာမည်ကို ဒေသခံများ စိုးရိမ်နေသည်။