သျှမ်းပြည်တောင်ပိုင်း တောင်ကြီးမြို့နယ် နမ့်ဆီးကျေးရွာအုပ်စုအတွင်းရှိ ပင်းပက်သံမဏိ စက်ရုံအတွက် ရထားလမ်းဖောက်လုပ်ရန် စစ်ကောင်စီက မြေ (၂၈) ဧက ကို အတင်းအဓမ္မ သိမ်းယူပြီး စုံစမ်းသိရှိရသည်။

စစ်တပ်အာဏာသိမ်းပြီးနောက် ၂၀၂၁ ခုနှစ် မေလ မှ စတင်ပြီး စစ်ကောင်စီ ခေါင်းဆောင် ဗိုလ်ချုပ်မှူးကြီး မင်းအောင်လှိုင် မှ ပင်းပက်စက်ရုံ စီမံကိန်း ပြန်လည်တည်ဆောက်ရန်အတွက် လုပ်ငန်းအကောင်အထည် ပြန်လည် စတင်ခဲ့သည်။

ထို့ကြောင့် ပင်းပက် သံမဏိ စက်ရုံမှထွက်သည့် ပစ္စည်းများကို သယ်ယူရန် အတွက် (၁၅) မိုင်ရှည်လျားမည့် ရထားလမ်းကို ဖောက်လုပ်သွားမည် ဟု သိရသည်။

“ပင်းပက်စက်ရုံ လုပ်ဆောင်မှုက မြန်လာတယ်။ ပင်းပက် နဲ့ ပတ်သက်ရင်တော့ အခုလောလောဆယ်က ရထားလမ်းဖောက်လုပ်နေတဲ့ ကိစ္စရပ်တွေရှိတယ်။ ရထားလမ်း အရှည်ကတော့ ကျမတို့ တွက်ချက်ရသလောက်တော့ (၁၅) မိုင် ရှည်တဲ့ ရထားလမ်းဖြစ်တယ်” ဟု ပအိုဝ်းလူငယ် အစည်းအရုံးမှ ပြောရေးဆိုခွင့်ရှိသူ နန်းကြည် က သတင်းစာရှင်းလင်းပွဲတွင် မီဒီယာများကို ဖြေကြားခဲ့သည်။

ထို ရထားလမ်းကို ပင်းပက်သံမဏိ စက်ရုံမှ ထွက်ရှိသည့် သံများကို မြင်းခြံမြို့ရှိ အမှတ် (၁) သံမဏိစက်ရုံသို့ ပို့ဆောင်ရန် အတွက် ရထားလမ်း ဖောက်လုပ်ခြင်းဖြစ်ကြောင်း သိရှိရသည်။

လက်ရှိ တာဝန်ယူပြီး ရထားလမ်းဖောက်နေသည့် ကုမ္ပဏီ (၃) ခု ရှိကြောင်း သိရသည်။

“ရထားလမ်းဖောက်တဲ့အနေအထားက အမြန်ကြီးသွားတာတော့မဟုတ်ဘူ။ ပုံမှန်သွားနေတယ်။ မေလကတည်းက စပြီး သွားနေတယ်။ ရထားလမ်း ဖောက်လုပ်နေတဲ့ ကုမ္ပဏီတွေ ကတော့ (၃) ခုရှိတယ်။ ရွှေမင်းသားဆောက်လုပ်ရေးကုမ္ပဏီ နဲ့ ထပ် (၂) ခုတော့ သေချာမသိရဘူး”ဟု နန်းကြည် က ပြောသည်။

စက်ရုံကို သတ်မှတ်ရက်အတွင်း စတင်လည်ပတ်ပြီး သံမဏိထုတ်လုပ်မှုကို အမြန်ဆုံး ဆောင်ရွက်နိုင်ရန်အတွက် နိုင်ငံခြားငွေသုံးစွဲမှုကို လျှော့ချနိုင်မည်ဖြစ်ကြောင်း၊ ထွက်ရှိလာသည့်သံရိုင်းနှင့် သံမဏိ တို့ကို သယ်ယူရန်အတွက် လျှပ်စစ်ရထားပြေးဆွဲနိုင်ရန် ရထားလမ်းများ တည်ဆောက်ရန်အတွက် ပြီးခဲ့သည့် ၂၀၂၁ ခုနှစ် အောက်တိုဘာ (၁) ရက်နေ့ က ဗိုလ်ချုပ်မှူးကြီး မင်းအောင်လှိုင် က ပြောဆိုခဲ့ဖူးသည်။

ပင်းပက်သံမဏိ စက်ရုံသည် စစ်အစိုးရ လက်ထက် ၂၀၀၄ -၂၀၀၅ ခုနှစ်မှ စတင်ပြီး စီမံကိန်း ဖော်ဆောင်ရန်အတွက် တောင်သူထံ မြေဧက ၅ ထောင်ကျော် သိမ်းယူခဲ့ခြင်း၊ ၂၀၁၀ ခုနှစ်မှာ မြေဧက (၁၀၀) ကျော် သိမ်းယူခဲ့ခြင်း နှင့် ၂၀၂၁ ခုနှစ် မေလ နောက်ပိုင်းမှာ ရထားလမ်းဖောက်လုပ်ရန်အတွက် မြေဧက (၂၈) ဧက သိမ်းယူခဲ့ကြောင်း ပအိုဝ်းလူငယ် အစည်းအရုံး၏ အစီရင်ခံစာ အရသိရသည်။

ပင်းပက်သံမဏိ စက်ရုံကို ၂၀၂၃- ၂၀၂၄ ခုနှစ်မှာ စက်ရုံလည်ပတ်နိုင်ရန်အတွက် ကြိုးပမ်းနေပြီး၊ ပင်းပက်သံမဏိ စက်ရုံ လည်ပတ်လျှင် အနီးပတ်ဝန်းကျင်ရှိ ကျေးရွာ (၃၀) နီးပါး တိုက်ရိုက် ထိခိုက်နိုင်ခြေရှိပြီး လူဦးရေ (၂) သောင်း နီးပါးခန့် နေထိုင်လျှက်ရှိကြောင်း သိရှိရသည်။

စီမံကိန်းကြောင့် မတရား အတင်းအဓမ္မ သိမ်းဆည်းထားသည့် မြေယာများကို မူလ တောင်သူများထံ ပြန်လည်ပေးအပ်ရန် နှင့် အသုံးပြုပြီးသော မြေများကို တရားမျှတသော လျော်ကြေး နစ်နာကြေးများဆောင်ရွက်ပေးရန်လည်း ပအိုဝ်းလူငယ် အစည်းအရုံးက တိုက်တွန်းပြောဆိုလိုက်သည်။

“ ကျနော်တို့ ဒေသခံ အများစုကတော့ စိုက်ပျိုးစရာ မြေမရှိကြတော့လို့ စားမရ၊ အိပ်မရ ဖြစ်နေကြပါတယ်။ လျော်ကြေး နစ်နာကြေး ဆိုတာ က ခေတ္တ တဖြုတ်အတွက် အဆင်ပြေမှုရှိပေမယ့်လည်း ကျနော်တို့ ရေရှည် အသက်မွေးဝမ်းကျောင်း လုပ်ငန်းဆုံးရှုံးနေကြတယ်။ ဒါကြောင့် အားလုံးက အနာဂတ် အတွက် တွေးပြီး စိုးရိမ်နေကြတယ်” ဟု တောင်သူတစ်ဦးက ပြောသည်။

ထို့အပြင် လက်ရှိ နိုင်ငံရေးကာလတွင် ဒေသခံများအတွက် အကျိုးမပြုသော အကြီးစားရင်းနှီးမြုပ်နှံမှုနှင့် စစ်ကောင်စီ အကျိုးပြု စီမံကိန်းများ အားလုံးကို ပိတ်သိမ်းရန်လည်း ပအိုဝ်းလူငယ်အစည်းအရုံးက တိုက်တွန်း အကြံပြုလိုက်သည်။

စစ်ကောင်စီ အာဏာသိမ်းပြီး နောက်ပိုင်း အာဏာသိမ်းမှု ကျောထောက်နောက်ခံ ရုရှား နှင့်အတူ နျူးကလီးယား စွမ်းအင် နှင့် နျူးကလီးယား ဓာတ်ပေါင်းဖို တည်ဆောက်ရေး မင်းအောင်လှိုင် ထုတ်ဖော်ပြောကြားခဲ့ပြီး ပင်းပက် သံမဏိ စက်ရုံ စီမံကိန်း နှင့် ဆက်စပ်ပြီး ပြည်တွင်း ပြည်ပ တွေ့ဆုံဆွေးနွေးမှုများလည်းရှိနေသည်။

လက်ရှိ စစ်ကောင်စီ နှင့် ရုရှား ရင်းနှီးမြုပ်နှံမှု ပင်းပက်သံမဏိစီမံကိန်းကို စစ်ကောင်စီမှ အကြီးအကျယ် ကြိုးပမ်းလျှက်ရှိ နေသည့် အခြေအနေတွင် စစ်ကောင်စီမှ တိုင်းပြည်ကို လက်နက်ဖြင့် အာဏာတည်မြဲရေး ကြိုးပမ်းမှုများ ရှိနေသည့် အပြင် တောင်သူများ မြေယာဆုံးရှုံးခြင်း ရေ နှင့် သစ်တော အရင်းအမြစ်ထိခိုက်သော စီမံကိန်းအား စစ်ကောင်စီမှ ရုရှားနှင့်အတူ အကောင်ထည်ဖော်ဆောင်လျက်ရှိနေကြောင်း ပအိုဝ်းလူငယ်အစည်းအရုံး မှ ထုတ်ပြန်ထားသည်။