သျှမ်းပြည်အတွင်း ယခုရက်ပိုင်း နိုင်ငံခြားဆေးများ စျေးနှုန်းတက်လာပြီး ဝယ်ယူရန် ခက်ခဲလာသည့် အထိဖြစ်နေကြောင်း စုံစမ်းသိရသည်။
စစ်အာဏာသိမ်းပြီး တနှစ်ကျော် ကာလ ရှိလာပြီးနောက် မြန်မာနိုင်ငံတဝှမ်းတွင် နိုင်ငံခြားမှ တင်သွင်းသည့် လူသုံးကုန်ပစ္စည်းများ၊ ဆေးဝါးများနှင့် နေအိမ်သုံးပစ္စည်းများတင်ပို့ရန် ခက်ခဲလာသဖြင့် ပြည်သူများလည်း ဝယ်ယူသုံးစွဲရန် ခက်ခဲလာသည်။
ထို့အပြင် စစ်အာဏာရှင်၏ ပြောင်းလဲနေသည့် မူဝါဒများကြောင့် ကုန်တင်သွင်းသူများလည်း အခက်အခဲရှိလာပြီး ပြည်တွင်းဒေါ်လာစျေးတက်မှုကြောင့်လည်း ကုန်သည်များ အခက်အခဲကြုံလာကြသည်။
ထိုထဲမှ နေ့စဥ်ဆေးစွဲသောက်နေရသည့် နာတာရှည်ရောဂါအခံရှိသူဖြစ်သော သွေးတိုး၊ ဆီးချို နှင့် ဘီပိုး၊ စီပိုးရှိသူများအတွက် ဆေးဝယ်ယူရန်လည်း ခက်ခဲလာကြောင်း သျှမ်းပြည်မှ ပြည်သူများက ပြောပြသည်။
“အခု ဆေးတွေကလည်း စျေးကြီးလာတယ်။ တချို့ဆေးဆိုင်ဆိုရင် နိုင်ငံခြားကလာတဲ့ဆေးတွေ ပြတ်နေပြီ၊ ကျနော် အိမ်က အသက်ကြီးတဲ့သူတွေအတွက် ဆေးတွေမရမှာတော့ စိုးရိမ်ရတယ်” ဟု တောင်ကြီးမြို့မှ အသက် ၃၀ နှစ်အရွယ်ရှိ အမျိုးသားတစ်ဦးက သျှမ်းသံတော်ဆင့်ကိုပြောသည်။
နာတာရှည် ရောဂါဖြစ်သည့် သွေးတိုး၊ဆီးချိုဆေးများသည် ယခင်ကထက် စျေးမြင့်တက်လာသည့်အတွက် ဝင်ငွေနည်းသော မိသားစုဝင်များ ဝယ်ယူ သုံးစွဲရန် ကြပ်တည်းလာကြသည်။
လက်ရှိမှာ ဆီးချိုသမားများသောက်သုံးသည့် Galvas 50mg သည် ယခင်က (၁၀၅၀၀) ကျပ် ဖြစ်ပြီး လက်ရှိမှာ (၁၁၀၅၀) ကျပ်၊ Vita home အားဆေးသည် ယခင်က ၁၂၀၀ ကျပ် လက်ရှိမှာ ၁၅၀၀ ကျပ်ထိ မြင့်တက်နေကြောင်း သိရသည်။
“နိုင်ငံခြားဆေးတွေက ဆက်တက်ဖို့ပဲရှိတယ်။ ကျဖို့မရှိဘူး။ ကျမ သွေးတိုးဆေးတွေ နေ့တိုင်းသောက်နေရတယ်။ အခုတောင် ဝယ်ရခက်နေတယ်။ ဆေးပြတ်လပ်မှုတွေထိ ဖြစ်လာနိုင်တယ်” ဟု သွေးတိုးဆေး သောက်နေရသည့် လားရှိုးမြို့ မှ အမျိုးသမီး တစ်ဦး က သျှမ်းသံတော်ဆင့်ကိုပြောသည်။
ထို့အပြင် မြန်မာနိုင်ငံ အစားအသောက် နှင့် ဆေးဝါးကွပ်ကဲရေး ဦးစီးဌာနသည် နိုင်ငံခြားဆေးဝါးရောင်းချနေသည့် ဆေးကုမ္ပဏီများကိုလည်း ဆေးတမျိုးလျှင် မှတ်ပုံတင် (၆) လသာ ထုတ်ပေးကြောင်း တောင်ကြီး ဆေးကုမ္ပဏီဝန်ထမ်း အမျိုးသမီး တစ်ဦးကပြောသည်။
ထိုသို့ ဆေးဝါး မှတ်ပုံတင်ကို (၆) လ တကြိမ်သာထုတ်ပေးသည့်အတွက် ဆေးဝါးများ ရန်ကုန်မြို့ရှိ ဆိပ်ကမ်းသို့ရောက်လာလျှင် ထုတ်မရဘဲ တဖန်မှတ်ပုံတင် ပြန်တင်ရသည့် အဖြစ်မျိုးလည်း ကြုံတွေ့ရကြောင်း၊ ထို့ကြောင့် ဆေးဝါးများဈေးတက်ရကြောင်း ဝန်ထမ်းအမျိုးသမီးက ဆိုသည်။
“ FDA က မှတ်ပုံတင်တွေကို ဆေးတမျိုးဆို (၆) လ ပဲ ထားပေးတော့တယ်။ ဆေးကရောက်လာပြီဆို ဆိပ်ကမ်းမှာ ထုတ်မရဘဲ မှတ်ပုံတင် ပြန်လုပ်ခိုင်းလို့ဈေးတက်တယ်။ (expir date) ထိတယ်ပြီးတော့ လိုတဲ့ဆေးတွေက အချိန်မှီရောက်မလာတော့ ပြတ်နေတယ် “ ဟု ၎င်းဝန်ထမ်းတစ်ဦးက ပြောသည်။
ထို့ကြောင့် စျေးကွက်အတွင်းသို့ အချိန်မှီရောက်မလာနိုင်သည့် ဆေးများသည် အနည်းဆုံး (၁) လမှ အများဆုံး (၆) လထိ ပြတ်လတ်နိုင်ပြီး၊ ဆေးဝါးများ ဈေးတက်နှုန်းမှုမှာလည်း ၅ ရာခိုင်နှုန်းမှ ၁၀ ရာခိုင်နှုန်းထိ ဈေးမြင့်တက်နေနိုင်ကြောင်း ၎င်းကဆက်ပြောသည်။
ထိုအတူ ပြည်တွင်းထုတ် ဆေးဝါးတချို့များကိုလည်း အစားအသောက်နှင့် ဆေးဝါးကွပ်ကွဲရေး ဦးစီးဌာန (FDA) မှ ဆေးကုမ္ပဏီများထံ ပေးမသွင်းကြောင်း ဆေးကုမ္ပဏီ အသိုင်းအဝန်းက ပြောသည်။
“ပြည်တွင်းထုတ် PBI ဆေးတွေတောင် ဆေးဆိုင်တွေမှာ ပေးမသွင်းတာရှိတယ်” ဟု တောင်ကြီး ဆေးဆိုင်ရှင်တစ်ဦးက ပြောသည်။
ယခင်က ဆေးဝါးတင်သွင်းခွင့် ပါမစ်ကို စီးပွားရေးနှင့် ကူးသန်းရောင်းဝယ်ရေးဝန်ကြီးဌာနကိုသာ တင်ပြရသော်လည်း ဧပြီလမှစ၍ စစ်ကောင်စီ၏ လုပ်ငန်းကော်မတီဝန်ကြီးဌာန ၊ ကျန်းမာရေးဝန်ကြီးဌာန ၊ ကုန်သွယ်မှုနှင့် ကုန်စည်စီးဆင်းမှုများ မှန်ကန်မြန်ဆန်စေရေး ဗဟိုကော်မတီ စသည့်ဝန်ကြီးဌာနကို အဆင့်ဆင့် တင်ပြရပြီး ၎င်းတို့ခွင့်ပြုမှသာ တင်သွင်းခွင့်ရကြောင်း သိရသည်။
