သျှမ်းပြည်မြောက်ပိုင်း ကွတ်ခိုင်မြို့နယ် မန်နောင်ကျေးရွာ အနီးတွင် အာဏာသိမ်း စစ်ကောင်စီနှင့် ကချင် လွတ်မြောက်ရေးတပ်မတော်( KIA) တို့တိုက်ပွဲဖြစ်ပွားပြီး ကလေးငယ်တစ်ဦး လက်နက်ကြီးထိ ဒဏ်ရာပြင်းထန်စွာ ရရှိကြောင်း သတင်းသိရသည်။
ယနေ့ (ဇူလိုင် ၂၅) ရက် နံနက် ၇ နာရီဝန်းကျင်တွင် လွိုင်ဆမ်ဆစ်တောင်ခြေရှိ မန်နောင်ကျေးရွာနှင့် နမ့်ပါခီး အကြားတွင် တိုက်ပွဲဖြစ်ပွားပြီး မန်နောင်ကျေးရွာအတွင်းသို့် လက်နက်ကြီးကျသဖြင့် ကလေးငယ်တစ်ဦး ထိခိုက် ဒဏ်ရာပြင်းထန်စွာ ရရှိကြောင်း အသက် ၄၀ ဝန်းကျင်ဒေသခံအမျိုးသမီးက သျှမ်းသံတော်ဆင့်ကို ပြော သည်။
“တိုက်ပွဲက ၆ နာရီကျော် ၇ နာရီကတည်းက စဖြစ်လာတာပါ၊ မန်နောင်ရွာထဲကို လက်နက်ကြီးကျပြီး အိမ်တစ် လုံး နဲ့ ကလေးငယ်တစ်ဦးကိုကျည်မှန်သွားတယ်၊ ကလေးငယ်က ဦးခေါင်းပိုင်းကို ထိထားတာ၊ လက်ရှိတော့ ကွတ်ခိုင်ပြည်သူ့ဆေးရုံမှာ ဆေးကုသမှုခံယူနေပါတယ်” ဟု ၎င်းအမျိုးသမီးက ပြောသည်။
အဆိုပါ လက်နက်ကြီးကျည်ထိမှန်သည့် ကလေးငယ်သည် အသက် ၃ နှစ်ဝန်းကျင်သာ ရှိနေပြီး ဦးခေါင်းပိုင်း ပြင်းထန်စွာ ဒဏ်ရာရရှိသွားသည့်အတွက် လက်ရှိတွင် ဆေးရုံ၌ အောက်စီဂျင်ပေးထားပြီး အခြေအနေစောင့် ကြည့်နေရကြောင်း အသက် ၄၀ကျော် အမျိုးသမီးက ဆက်လက်ပြောသည်။
လက်ရှိတွင်တိုက်ပွဲပြီးဆုံးသွားသော်လည်း စစ်ကောင်စီဘက်မှ မန်နောင်ကျေးရွာနှင့် အနီးပတ်ဝန်းကျင်တွင် စစ်အင်အားဖြည့်တင်းမှုရှိနေသည့်အတွက် စစ်ရေးတင်းမှုနေလျက်ရှိကြောင်း အမည်မဖော်လိုသူ ဒေသခံ အမျိုးသား တစ်ဦးက ပြောသည်။
“မန်နောင်ရွာတွင်းမှာရော၊ အဲ့လမ်းပိုင်းတစ်လျှောက်မှာရော စစ်ကောင်စီတွေ ထပ်ပြီး အင်အားဖြည့်ထားတယ်၊ ရွာသားတွေလည်း အပြင်မထွက်ရဲဘူး၊ Ambulance( လူနာတင်ကား) တွေ အဲ့တိုက်ပွဲဖြစ်တဲ့ဘက် သွားတာတွေ့တော့ နှစ်ဖက် တပ်သားထိခိုက်မှုလည်းရှိမယ်ထင်ပါတယ်” ဟု အထက်ပါ အမျိုးသားက ပြောသည်။
လက်ရှိအချိန်ထိ နှစ်ဖက်တပ်ဖွဲ့၏ ထိခိုက်ကျဆုံးမှုများကို မသိရှိရသေးချေ။
ကွတ်ခိုင်မြို့နယ်အတွင်းတွင် အာဏာသိမ်း စစ်ကောင်စီတပ်နှင့် KIA၊ PDF၊ KPDF တို့က တိုက်ပွဲများ မကြာခဏတိုက်ပွဲ ဖြစ်ပွားလေ့ရှိသည့် နေရာဒေသဖြစ်သည်။
Leave a Comments