Monday, July 22, 2024

လဲချားမြို့နယ် တစ်ရက်ထဲ (၃) နေရာဗုံးပေါက်ကွဲ ဒေသခံ တစ်ဦး ဆွဲမိုင်းထိ

Must read

သျှမ်းပြည်တောင်ပိုင်း လဲချားမြို့နယ်အတွင်း (၃) နေရာဗုံးပေါက်ကွဲမှုဖြစ်ပွားခဲ့ပြီး ဒေသခံတစ်ဦး လယ်သွားစဥ် ဆွဲမိုင်း နင်းမိကြောင်း စုံစမ်းသိရှိရသည်။

ယမန်နေ့ (ဇူလိုင် ၂၄) ရက်တွင် လဲချားမြို့နယ် နောင်လုံကျေးရွာ နှင့် လွိုင်ကန့်ကော်ကျေးရွာတို့တွင် ဗုံးပေါက်ကွဲမှု ဖြစ်ပွားခဲ့ပြီး ပြည်သူတစ်ဦး ဆွဲမိုင်းနင်းမိကာ ထိခိုက်ဒဏ်ရာရရှိခဲ့ကြောင်း လဲချားမြို့မှ အသက် ၄၀ နှစ် အရွယ်ရှိ အမျိုးသားတစ်ဦးက သျှမ်းသံတော်ဆင့်ကို ပြောသည်။

“ မနေ့က ၃ နေရာလောက်ပေါက်ကွဲမှုဖြစ်တယ်။ မနက် ၉ နာရီက နောင်လုံကျေးရွာမှာ ပေါက်ကွဲပြီးတော့ ပြည်သူတစ်ဦးက ထိသွားတာ။ နေ့လည် ၃ နာရီလောက်မှာ လွိုင်ကန့်ကော်မှာ ထပ်တစ်နေရာပေါက်တယ်လို့ ပြောတယ်။ ပြီးတော့ ညပိုင်းအချိန်မှာ ထပ်တစ်နေရာပေါက်သေးတယ်” ဟု ၎င်းကဆိုသည်။

ဆွဲမိုင်းနင်းမိသူ

အဆိုပါ ဆွဲမိုင်းနင်းမိသည့် နောင်လုံဒေသခံတစ်ဦးသည် လက်ရှိမှာ လဲချားမြို့ရှိ ပြည်သူ့ဆေးရုံတွင် ဆေးကုသမှု ခံယူနေကြောင်း သိရသည်။

“အခုကတော့ လဲချားပြည်သူ့ဆေးရုံမှာ ရောက်နေပါတယ်။ ဒဏ်ရာအခြေနေတော့ သိပ်မပြင်းထန်ဘူး။ ခြေထောက်နားပဲ ထိသွားတာ။ အသက် (၄၅) နှစ် အမျိုးသားဖြစ်တယ်” ဟု လဲချားမြို့ အသက် ၂၅ နှစ်ဝန်းကျင်ရှိ အမျိုးသားတစ်ဦးက ပြောသည်။

ထိုအပြင် လဲချားမြို့နယ်အတွင်း ဗုံးပေါက်ကွဲမှု စတင်ကြားလာရသည့်အတွက် ပြည်သူများလည်း စိုးရိမ်ထိတ်လန့်နေကြကြောင်း သိရသည်။

“ မြို့ထဲကလူတွေလည်း စိုးရိမ်နေကြရတယ်။ ဒီလထဲကနေစပြီးတော့ ရှုပ်ထွေးလာတာပါ။ ည ၈ နာရီ လောက် ဆိုရင်လည်း သူများအပြင်သိပ်မထွက်တော့ဘူး။ ဆိုင်တွေလည်း ညအချိန်ဆို စောစောပိတ်နေကြပြီ။ ကျမတို့ဆိုင်လည်း ၇ နာရီလောက်ဆိုပိတ်ပြီ”ဟု လဲချားမြို့ ဒေသခံ အမျိုးသမီးတစ်ဦးက ပြောသည်။

လဲချားမြို့နယ်သည် ယခုလအတွင်း သျှမ်းတိုင်းရင်းသားလက်နက်ကိုင် တပ်ဖွဲ့ (၂) ဖွဲ့ ပြန်လည် သွားလာလှုပ်ရှား နေကြသည့် သတင်းကြောင့် ပြည်သူများက တိုက်ပွဲ ပြန်လည်ဖြစ်ပွားမည်ကို စိုရိမ်နေကြသည်။

Leave a Comments

- Advertisement -spot_img

Latest article