သျှမ်းပြည်မြောက်ပိုင်း နမ့်ခမ်းမြို့ရှိ စစ်ဘေးရှောင်စခန်းများတွင် ကိုဗစ် – ၁၉ ကူးစက်မှုအန္တရာယ်ကို စိုးရိမ်နေရကြောင်း သတင်းသိရသည်။
နမ့်ခမ်းမြို့နယ် အတွင်းတွင် စစ်ဘေးရှောင် စခန်း ၅ ခုရှိနေသည့် အပြင် စစ်ဘေးရှောင်သူဉီးရေ ရာဂဏန်းရှိသည့် အတွက် လက်ရှိကာလ အတွင်းကူးစက်ပျံ့ပွားမှုနှုန်း မြင့်မားနေသည့် ကိုဗစ် – ၁၉ တတိယလှိုင်း အန္တရယ်ကို စိုးရိမ်နေရကြောင်း စစ်ဘေးရှောင်များကို ကူညီထောက်ပံ့ပေးလေ့ရှိသူ တဉီးက ပြောသည်။
“နမ့်ခမ်းမြို့နယ်မှာ လူဉီးရေ များတယ်လို့ ပြောရမှာပေါ့၊ ပြီးတော့ စစ်ရှောင်စခန်းကလည်း ငါးခုတောင် ရှိနေတယ်၊ အခုမှာ ကိုဗစ် – ၁၉ ကူးစက်မှုနှုန်းကလည်း အရမ်းများနေတော့ စစ်ဘေးရှောင်တွေအတွက်ကို စိုးရိမ်ရ ပါတယ်” – ဟု အထက်ပါ ပုဂ္ဂိုလ်က ပြောသည်။
ပြီးခဲ့သည့် သြဂုတ်လ ၁၁ ရက်က နမ့်ခမ်းမြို့ရှိ နေဝန်းရီ စစ်ဘေးရှောင် ဒုက္ခသည် စခန်းမှ အသက် ၆၀ ခန့်ရှိ အမျိုးသမီး တစ်ဉီးတွင် ကိုဗစ် – ၁၉ ပိုး စစ်ဆေးတွေ့ရှိရကြောင်း သိရသည်။
“အဖွားက စစက ဖျားတာပါ၊ အဲ့နဲ့ ဆေးခန်းသွားပြတော့ နမ့်ခမ်း ပြည်သူ့ ဆေးရုံကို သွားပြခိုင်းတယ်၊ ဆေးရုံရောက်တော့ ကိုဗစ် ရှိ/မရှိ စစ်လိုက်တာ အဖြေက Positive ထွက်လာတယ်” ဟု စစ်ရှောင်စခန်းမှ ပြည်သူတစ်ဉီး ပြောသည်။
လက်ရှိတွင် နေဝန်းနီ စစ်ဘေးရှောင်စခန်းမှ ပိုးတွေ့သူ အမျိုးသမီးနှင့် ထိတွေ့မှုရှိသူ တစ်ဉီးသာ ရှိပြီး ၎င်းကို ဆေးစစ်ရာတွင် ကိုဗစ်ပိုးမရှိကြောင်း တွေ့ရသော်လည်း စခန်းအတွင်းတွင်မူ ဖျားနာနေသူ များပြားကြောင်း လည်း ၎င်းကပြောသည်။
“ အဖွားနဲ့ထိတွေ့မှု ရှိတဲ့သူကို ဆေးစစ်လိုက်တဲ့ အခါမှာတော့ ကိုဗစ်မရှိပါဘူး၊ သူကလည်း ကျန်းကျန်းမာမာ နဲ့ဘဲ ဘာမှဖြစ်တာ မရှိဘူး၊ ဒါပေမယ့် စခန်းအတွင်းမှာ ဖျားနာနေတဲ့သူတွေ ကလည်းများတယ်၊ ဒါပေမယ့် မိုးရာသီလည်း ဖြစ်နေတယ်ဆိုတော့ အရင်နှစ်ကလို ဖြစ်နေကျ ရာသီတုပ်ကွေးလို့ပဲ လူကြီး အများစုက မြင်ကြတယ်” ဟု ၎င်းက ပြောသည်။
လက်ရှိ နမ့်ခမ်းမြို့နယ်အတွင်း နေဝန်းနီ စစ်ရှောင်စခန်းအပြင် စိန်သောမတ် နဲ့ ဂျော် စစ်ရှောင် စခန်းများ မှာလည်း ဖျားနာသူအချို့ ရှိနေပြီး ရာသီတုပ်ကွေးဖျားနာခြင်းနှင့် အနံ့ပျောက် သူများ လည်း ရှိကြောင်း သိရသည်။
“နေဝန်းရီစခန်းကိုကျတော့ နေမကောင်းလို့ ဆေးခန်းပြတာ ပိုး တွေ့သွားတာပေါ့နော်၊ ဒါမယ့် တခြား စခန်းတွေမှာလည်း ပိုးကူးခံရတဲ့သူ မရှိဘူးလို့ မပြောနိုင်ဘူး၊ တကယ်လို့သာ စစ်ရှောင် စခန်းမှာ ရောဂါပိုးပျံ့ ရင်တော့ အားလုံးက ပိုခက်ခဲသွားလိမ့်မယ်” ဟုနမ့်ခမ်းမြို့နယ် အတွင်း ပရဟိတ လုပ်ဆောင်နေသူ တစ်ဉီး က ၎င်း၏ အမြင်ကို ပြောပြထားသည်။
နမ့်ခမ်းမြို့နယ် အတွင်းရှိ စစ်ရှောင်စခန်းများတွင် နေထိုင်ကြရသည့် ပြည်သူများသည် စားနပ်ရိက္ခာ အခက်အခဲများ အပြင် ကျန်းမာရေး စောင့်ရှောက်မှုနှင့် ဆေးဝါးများ၊ Hand Gel၊ နှာခေါင်းစည်း (Mask)၊ ဓါတ်ဆားကဲ့သို့သော အသုံးအဆောင် ပစ္စည်းများလည်း လိုအပ်လျက်ရှိကြော်း သိရသည်။
နမ့်ခမ်းမြို့ အောင် မေတ္တာရပ်ကွက် တွင် အမှတ် (၁) ဂျော် စစ်ရှောင်စခန်း (ကချင်) နှင့် စိန်သောမတ် စစ်ရှောင်စခန်း(ကချင်)၊ မန့်ခမ်းကျေးရွာတွင် အမှတ် (၂) ဂျော် စစ်ရှောင်စခန်း(ကချင်)၊ သာယာ ကုန်း – နေဝန်းနီ စစ်ရှောင်စခန်း (ပလောင်) နှင့် ပန်လုံ စစ်ရှောင်စခန်း(ကချင်+ပလောင်) စသဖြင့် စစ်ရှောင်စခန်း ၅ ခုရှိသည်။ အများစု မှာ ကချင်ပြည်နယ် မန်စီ မြို့နယ် မှာ လာသည့်စစ်ရှောင်များ ဖြစ်ကြောင်း၊ နမ့်ခမ်းမြို့နယ် ကျေးရွာ တချို့သာ လာရောက်ခိုလှုံမှုရှိကြောင်း နမ့်ခမ်းမြို့ခံများ ပြောပြချက်အရသိရသည်။
