သျှမ်းပြည်မြောက်ပိုင်း မူဆယ်မြို့တွင် Lockdown (ဝင်၊ထွက်) သွားလာခွင့် ရပ်ကွက်တစ်ချို့က ပြန်ဖွင့်ပေးသွားမည်ဖြစ်သောကြောင့် ပရဟိတ အဖွဲ့များ ကိုဗစ် ၁၉ ပိုမြင့်တက်လာမှာကို စိုးရိမ်နေကြရကြောင်း စုံစမ်းသိရှိရသည်။
မူဆယ်မြို့တွင် ယနေ့ သြဂုတ် ၁၃ ရက်နေ့က စပြီး လော့ဒေါင်းချထားသည့် တောင်ရပ်ကွက်ကို ပြန်လည်ဖွင့်ပေးသွားကြောင်း မူဆယ်မြို့ ဒေသခံ အမျိုးသားတဦးကပြောသည်။
“ ဒီနေ့တော့ တောင်ရပ်ကွက်ကို ပြန်ဖွင့်ပေးလိုက်ပြီး။ တခြားရပ်ကွက်တွေကတော့ အရင်နေ့က တည်းကဖွင့်ပေးလိုက်ပြီး။ မဖွင့်ပေးလဲ သူတို့တွေက ဈေးဝယ်ကဒ်နဲ့ မလိုအပ်ဘဲထွက်နေတာရှိတယ်” ဟု မူဆယ်မြို့ဒေသခံအမျိုးသား တဦး ကပြောသည်။
ထိုသို့ ရပ်ကွက်လမ်းများကို ပြန်ဖွင့်ပေးခဲ့သောကြောင့် ကိုဗစ် ၁၉ ပိုးတွေ့လူနာ ပိုမိုမြင့်တက်လာမှာကို ပရဟိတအဖွဲ့များက စိုးရိမ်နေကြရသည်။
ယနေ့ သြဂုတ် ၁၃ ရက်နေ့ မနက်ပိုင်း အချိန်တွင် ကိုဗစ် ၁၉ ပိုးတွေ့လူနာ ၃ ဦးသေဆုံး သွားခဲ့ကြောင်းသိရသည်။
“ ဘာကြောင့်ပြန်ဖွင့်ပေးတာလဲတော့ ကျနော်တို့မသိဘူး။ အခုက ပိုးတွေ့ကများသေးတယ်။ ဒီနေ့မနက်တောင် ၃ ယောက် ဆုံးသွားပြီ။ မနေ့ကဆို ၁၀ ယောက်စစ်တာ ၈ ယောက်တွေ့တယ်။ မူဆယ်မှာ တောင်ရပ်ကွက်က စည်းကမ်းအရှိဆုံး။” ဟု မူဆယ်မြို့ ဂရုဏာလူမှုကူညီရေးအသင်းက ပြောသည်။
မူဆယ်မြို့တွင် ယခုလက်ရှိ ကိုဗစ်- ၁၉ လူနာသေဆုံးသူများသည် အောက်စီဂျင်အမြဲသုံးစွဲနေရသူများ၊ ရောဂါအခံရှိသူများက အများဆုံးသေဆုံးနေကြရကြောင်း၊ ကိုဗစ်-၁၉ လူနာ သေချာ ပြုစုကုသနေထိုင်ပါက (၁၄) ရက်အတွင်း ကုသပျောက်ဆုံးနိုင် ဖြစ်ကြောင်း ဂရုဏာလူမှုကူညီရေးအသင်း အဖွဲ့ဝင် က ပြောသည်။
“ အခုက သေဆုံးသူတွေက ရောဂါအခံရှိသူတွေ၊ သက်ကြီးရွယ်အို၊ အောက်စီဂျင်ကို အမြဲလိုသုံးနေတဲ့သူတွေက ပိုသေဆုံးကြတယ်။ အခုက ကိုယ်ကိုယ့်ဆေးစစ်ပြီးတော့ နေအိမ်မှာပဲ ဆေးကုနေကြတယ်။ သေချာကုသရင်တော့ ၁၄ ရက်အတွင်းပျောက်ပါတယ်။ အခုက လူနာတွေက ရက် ၂၀ လောက်ခံစားနေကြရတယ်” ဟု ၎င်းက ဆိုသည်။
မူဆယ်မြို့တွင် ရပ်ကွက် တစ်ချို့ Lockdown ဖွင့်ပေးသော်လည်း ကိုဗစ် ပိုးတွေ့မလျော့ကျသေးသောကြောင့် ပြည်သူများက အသွားအလာကို ပိုဆင်ခြေစေခြင်းကြောင်း ပရဟိတ အဖွဲ့များက တောင်းဆိုလိုက်သည်။
