သျှမ်းပြည် မူဆယ်မြို့ အကောက်ခွန်ဦးစီးဌာနရုံးရှိ အရာရှိလိုင်းခန်း (၆) ခန်း မီးလောင်ပျက်စီးခဲ့ပြီး သတင်းဖုံးဖိထားကြောင်း စုံစမ်းသိရသည်။
စက်တင်ဘာလ (၆) ရက် ညနေ (၃) နာရီခန့်တွင် မူဆယ်မြို့ ဟိုမွန်ရပ်ကွက် စစ်ကော်မရှင် လက်အောက်ခံ အကောက်ခွန်ဦးစီးဌာနရုံးရှိ အရာရှိလိုင်းခန်း (၆) ခန်း မီးလောင်ပျက်စီးခဲ့ပြီး မီးလောင်ရသည့် အကြောင်းရင်းကို သတင်းဖုံးဖိထားကြောင်း ဖြစ်စဉ်သိရှိသူများက ပြောသည်။
“ကာစတန်ရုံးက အရာရှိ လိုင်းခန်းမှာ မီးလောင်သွားတာ အထဲကော အပြင်ကော အားလုံးပေါင်း ၆ ခန်းလို့ သိရတယ်။ ဝါယာရှော့ခ် ဖြစ်တာလား ဘာကြောင့်ဖြစ်လဲဆိုတာ မပြောဘူး ကန့်သတ်ထားတာ။ အရင်ကလည်း တစ်ခေါက် မီးလောင်ဖူးတယ် တော်တော်ကြာပြီ၊ ကျယ်ခေါင်ဝင်ဖို့ ပိုက်ဆံတိုးကောက်တော့မယ် ထင်တယ်”ဟု မူဆယ်ဒေသခံ ကုန်သည်အမျိုးသမီးတစ်ဦးက သျှမ်းသံတော်ဆင့်ကို ပြောသည်။
အဆိုပါ မီးလောင်မှုကြောင့် မူဆယ်မြို့ အကောက်ခွန်ရုံး အရာရှိလိုင်းခန်း (၆) ခန်းမှ အိမ်အသုံးအဆောင်ပစ္စည်းများ အားလုံး ဆုံးရှုံးခဲ့ရပြီး မီးသတ်တပ်ဖွဲ့မှ အချိန်မီ မီးငြိမ်းသတ်နိုင်ခဲ့သော်လည်း ပျက်စီးဆုံးရှုံးမှုတန်ဖိုးကို မသိနိုင်ကြောင်း အဆိုပါ အမျိုးသမီးက ဆက်ပြောသည်။
ယမန်နှစ် ၂၀၂၄ အောက်တိုဘာလတွင်လည်း မူဆယ်မြို့ ပြည်သူ့ဆေးရုံရှိ ဆရာဝန်များ နေထိုင်ရာ သုံးထပ်တိုးချဲ့ဆောင် အပေါ်ထပ်တွင် ဒယ်အိုးနီဖြင့် ကြက်ဥပြုတ်ထားစဉ် မီးပြန်လာပြီးနောက် ရေခမ်းခြောက်ကာ မီးစတင် လောင်ကျွမ်းမှု ဖြစ်ပွားခဲ့ကြောင်း ဒေသခံများထံမှ သိရသည်။
Leave a Comments